'അത്രയ്​ക്കും സ്​നേഹിക്കുന്നു ഞാൻ, നീയില്ലാതെ ജീവിക്കാനാകില്ല വിവേക്​'... മരണക്കുറിപ്പെഴുതി സ്വാതി പോയി, വഴിയേ പ്രിയതമനും

മുംബൈ: ''നിന്നെ ഞാൻ അത്രയ്​ക്കും സ്​നേഹിക്കുന്നു വിവേക്​. എനിക്ക്​ നീയില്ലാതെ ജീവിക്കാനാവില്ല. നിന്‍റെ ആരോഗ്യം അപകടാവസ്​ഥയിലാണെന്നെനിക്കറിയാം. രോഗത്തിൽനിന്ന്​ നിന്നെ രക്ഷിക്കുന്നതിൽ ഞാൻ പരാജയപ്പെട്ടുപോയിരിക്കുന്നു. എന്‍റെ കുടുംബാംഗങ്ങ​െളല്ലാം കോവിഡ്​ ബാധിച്ച്​ ഇപ്പോൾ ആശുപത്രിയിലാണ്​. ഞാൻ ജീവിതം അവസാനിപ്പിക്കുകയാണ്​. നീയില്ലാതെ ജീവിക്കാനാകില്ല വിവേക്​'- മരണത്തിലേക്ക്​ നടന്നടുക്കും മുമ്പ്​ സ്വാതി മറാത്തിയിലെഴുതിയ കുറിപ്പ്​ വസായ്​ പൊലീസ്​ കണ്ടെടുക്കു​േമ്പാൾ ആ 35കാരി ഈ ലോകം വിട്ടകന്നിരുന്നു. കോവിഡ്​ ബാധിതനായ ഭർത്താവ്​ വിവേക്​ ഡിസിൽവ ഗുരുതരാവസ്​ഥയിൽ ചികിത്സയിലായതോടെ ജീവിതം അവസാനിപ്പിക്കാൻ തീരുമാനിച്ച്​ സ്വാതി എഴുതിയ ആത്​മഹത്യാ കുറിപ്പ്​ പൊലീസ്​ പിന്നീട്​ കണ്ടെടു​ക്കുകയായിരുന്നു.

കണ്ണീരുറഞ്ഞ ആ മരണക്കുറിപ്പിലെ സ്വാതിയുടെ ആധികൾക്കൊപ്പമായിരുന്നു വിവേകിന്‍റെ വിധിയും. പ്രിയതമൻ തന്നെ വിട്ടുപിരിയുമെന്ന സങ്കടത്തിൽ ചൊവ്വാഴ്​ച ജീവൻ അവസാനിപ്പിച്ച സ്വാതിക്കൊപ്പം രണ്ടു ദിവസത്തിനുശേഷം വിവേകും മരണത്തിന്‍റെ വഴിയേ മറഞ്ഞു. കോവിഡ്​ ചികിത്സക്കിടെ വ്യാഴാഴ്ചയായിരുന്നു 38കാരനായ വിവേകിന്‍റെ അന്ത്യം.

വസായ്​ സ്വദേശിയായ വിവേക്​​ ജൂലൈ 17നാണ്​ കോവിഡ്​ പൊസിറ്റീവായത്​. സ്വാതിക്ക്​ നേരത്തേ, കോവിഡ്​ ബാധിച്ചിരു​ന്നു. ആശുപത്രിയിൽ​ ചികിത്സ തേടിയ സ്വാതി പിന്നീട്​ നെഗറ്റീവായി. എന്നാൽ, ഗുരുതരമായ ആരോഗ്യ പ്രശ്​നങ്ങൾ കാരണം വിവേകിനെ ആശുപത്രിയിൽ പ്രവേശിപ്പിച്ചു.

ചൊവ്വാഴ്ച ആശുപത്രിയിൽനിന്ന്​ സ്വാതിയെ വിളിച്ചിരുന്നു. വിവേകിന്‍റെ അവസ്​ഥ ഗുരുതരമാണെന്നും വെന്‍റിലേറ്ററിലേക്ക്​ മാറ്റാൻ അനുമതി നൽകണമെന്നും ഡോക്​ടർ ആവശ്യപ്പെട്ടു. ആശുപത്രിയിലെത്തി, ഭർത്താവിനെ വെന്‍റിലേറ്ററിലേക്ക്​ മാറ്റാനുള്ള നടപടിക്രമങ്ങൾ അവർ പൂർത്തിയാക്കി. ശേഷം, വീട്ടിൽ തിരിച്ചെത്തിയ സ്വാതി ഫാനിൽ തൂങ്ങിമരിക്കുകയായിരുന്നു.

വിവേകിന്‍റെ മാതാപിതാക്കളും കോവിഡ്​ ബാധിതരാണ്​. അവർ ഐ​സൊലേഷൻ സെന്‍ററിൽ കഴിഞ്ഞുവരവേയാണ്​ മകന്‍റെയും മരുമകളുടെയും ആകസ്​മിക വിയോഗം.