ട്വിറ്റർ മേധാവി ഇന്ന്​ ഗാസിയാബാദ്​ പൊലീസിനു മുന്നിൽ; കാത്തിരിക്കുന്നത്​ 11 ചോദ്യങ്ങൾ

ന്യൂഡൽഹി: ഐ.ടി നിയമം അംഗീകരിച്ചില്ലെന്ന പേരിൽ വടിപിടിച്ചിറങ്ങിയ പൊലീസി​െൻറ ചോദ്യങ്ങൾക്ക്​ മറുപടി പറയാൻ ഇന്ന്​ ട്വിറ്റർ മാനേജിങ്​ ഡയറക്​ടർ ഹാജരാകും. ഗാസിയാബാദിൽ മുസ്​ലിം വയോധികൻ ആക്രമിക്കപ്പെട്ട സംഭവത്തിലാണ്​ പൊലീസ്​ ട്വിറ്ററിനെതിരെ കേസ്​ എടുത്തത്​. വിഡിയോ കോൺഫറൻസ്​ വഴി ഹാജരാകാമെന്ന്​ അറിയിച്ചെങ്കിലും ഇത്​ തള്ളി പുതിയ സമൻസ്​ അയച്ച്​ ഹാജരാകാൻ നിർദേശിക്കുകയായിരുന്നു. നേരിട്ട്​ വരാതിരിക്കാൻ പറഞ്ഞ കാരണങ്ങൾ ന്യായമല്ലെന്നും ട്വിറ്ററി​െൻറ ഇന്ത്യയിലെ പ്രതിനിധിയെന്ന നിലക്ക്​ നിയമപ്രകാരം ഹാജരാകേണ്ടതുണ്ടെന്നുമായിരുന്നു പൊലീസ്​ അയച്ച നോട്ടീസ്​. രാവിലെ 10.30ന്​ അഭിഭാഷകനൊപ്പം പൊലീസ്​ സ്​റ്റേഷനിലെത്തുമെന്നാണ്​ സുചന.

72കാരനായ മുസ്​ലിം വയോധികനെ ആൾക്കൂട്ടം ആക്രമിക്കുന്നതും താടിമുറിച്ചുകളയുന്നതുമുള്ള വിഡിയോ ട്വിറ്ററിൽ വന്നതാണ്​ പൊലീസിനെ പ്രകോപിപ്പിക്കുന്നത്​. ജയ്​ ശ്രീറാം വിളിക്കാൻ ആവശ്യപ്പെട്ടായിരുന്നു മർദനം.

ആക്രമണത്തിന്​ സാമുദായിക വശമില്ലെന്ന്​ പറഞ്ഞ പൊലീസ്​ സംഭവത്തി​െൻറ വിഡിയോ ദൃശ്യങ്ങൾ പ്രചരിപ്പിച്ചതിനാണ്​ ട്വിറ്റർ മേധാവിക്കെതിരെ കേസ്​ എടുത്തത്​. നിരവധി കോൺഗ്രസ്​ പ്രവർത്തകർ, മാധ്യമ​ പ്രവർത്തകർ തുടങ്ങിയവർക്കെതിരെയും കേസ്​ എടുത്തിട്ടുണ്ട്​. ആക്രമണം നടത്തിയതിന്​ അറസ്​റ്റിലായ എല്ലാ പ്രതികൾക്കും ഇടക്കാല ജാമ്യം അനുവദിച്ചിരുന്നു.