പുതിയ പേര്​ 'ഇലോൺ മസ്ക്​'; ഐ.എം.എയുടേതടക്കം മൂന്ന്​ ട്വിറ്റർ അക്കൗണ്ടുകൾ ഹാക്ക്​ ചെയ്തു

ന്യൂഡൽഹി: ഇന്ത്യൻ കൗൺസിൽ ഓഫ്​ വേൾഡ്​ അഫയേഴ്​സ്​ (ഐ.സി. ഡബ്ല്യു.എ), ഇന്ത്യൻ മെഡിക്കൽ അസോസിയേഷൻ (ഐ.എം.എ), മൻദേശി മഹിള ബാങ്ക്​ എന്നിവയുടെ ട്വിറ്റർ അക്കൗണ്ടുകൾ ഞായറാഴ്ച ഹാക്ക്​ ചെയ്തു. 'ഇലോൺ മസ്​ക്​' എന്നാണ്​ ട്വിറ്റർ അക്കൗണ്ടുകൾ ഹാക്കർമാർ പുനർനാമകരണം ചെയ്തത്​.

പ്രധാനമന്ത്രി നരേന്ദ്ര മോദിയുടെ ട്വിറ്റർ അക്കൗണ്ട്​ ഹാക്ക്​ ചെയ്യപ്പെട്ട സമയത്ത്​ പ്രത്യക്ഷപ്പെട്ടതിന്​ സമാനമായി ക്രിപ്​റ്റോ കറൻസി പ്രചാരണത്തിന്​ വേണ്ടിയുള്ള ട്വീറ്റുകളാണ്​ ഇവിടെയും പോസ്റ്റ്​ ചെയ്യപ്പെട്ടത്​. പാസ്​വേഡ്​ ചോർച്ചയെ തുടർന്നോ അല്ലെങ്കിൽ അപകടകരമായ ലിങ്കുകളിൽ ക്ലിക്ക്​ ചെയ്​തതിനെ തുടർന്നോ ആകാം ഹാക്കിങ്​ അര​ങ്ങേറിയതെന്നാണ്​ വിവരം.

ഐ.സി.ഡബ്ല്യു.എയുടെ ട്വിറ്റർ അക്കൗണ്ട് വീണ്ടെടുത്തെങ്കിലും ഐ.എം.എയുടെയും മൻ ദേശി മഹിളാ ബാങ്കിന്‍റെയും ട്വിറ്റർ ഹാൻഡിലുകളിൽ ഇത്തരം ട്വീറ്റുകൾ ഇപ്പോഴും ദൃശ്യമാണ്. ഇലക്​ട്രോണിക്സ്​-ഐ.ടി മന്ത്രാലയത്തിലെ ഐ.ടി സുരക്ഷ വിഭാഗം വിഷയം പരിശോധിക്കുന്നുണ്ട്​.

പ്രധാനമന്ത്രി മോദിയുടെ സ്വകാര്യ ട്വിറ്റർ ഹാൻഡിൽ ഡിസംബർ 12ന് ഹാക്ക് ചെയ്യപ്പെട്ടിരുന്നു. കുറച്ച് സമയത്തിന് ശേഷം അക്കൗണ്ട് പുനഃസ്ഥാപിച്ചു. എന്നാൽ ക്രിപ്‌റ്റോകറൻസി പ്രോത്സാഹിപ്പിക്കുന്ന ട്വീറ്റ് അതിനോടകം പങ്കുവെക്കപ്പെട്ടിരുന്നു. ഈ ട്വീറ്റ്​ പിന്നീട്​ ഡിലീറ്റ്​ ചെയ്തു.