ട്രംപ്​ ഇന്ന്​ മോദിയുമായി സംസാരിക്കും

ന്യൂഡൽഹി: അമേരിക്കൻ പ്രസിഡൻറ്​ ഡൊണൾഡ്​ ട്രംപ്​ ഇന്ത്യൻ പ്രധാനമന്ത്രി നരേന്ദ്രമോദിയുമായി ഇന്ന്​ ഫോണിൽ സംസാരിക്കും. ​​വൈറ്റ്​ ഹൗസ്​ പുറത്തിറക്കിയ പത്രക്കുറിപ്പിൽ പ്രദേശിക സമയം ഉച്ചക്ക്​ ഒരു മണിക്ക്​ സംസാരിക്കുമെന്നാണ്​ അറിയിച്ചിരിക്കുന്നത്​.

പ്രസിഡൻറ്​ തെരഞ്ഞെടുപ്പിൽ വിജയിച്ചതിനെ തുടർന്ന്​ നവംബർ എട്ടിന്​ മോദി ട്രംപിനെ ഫോണിൽ വിളിച്ച് അഭിനന്ദനം അറിയിക്കുകയും അമേരിക്കൻ പ്രസിഡൻറായി അധികാരമേറ്റശേഷം ട്രംപുമായി ചേർന്ന്​ പ്രവർത്തിക്കാൻ ആഗ്രഹിക്കുന്നതായി മോദി ട്വീറ്റു ചെയ്തിരുന്നു.

അധികാരമേറ്റശേഷം ട്രംപ്​ ​ഫോണിൽ ബന്ധപ്പെടുന്ന അഞ്ചാമത്തെ വിദേശ നേതാവാണ്​ മോദി. ജനുവരി 21ന്​ കനേഡിയൻ പ്രധാനമന്ത്രി ജസ്​റ്റിൻ ട്രേൂഡോയെയും മെക്​സിക്കൻ പ്രസിഡൻറ്​ പിന നീയേറ്റൊയെയും ഞായറാഴ്ച ഇസ്രായേൽ പ്രധാനമന്ത്രി ബെന്യമിൻ നെതന്യാഹുവിനെയും കഴിഞ്ഞ ദിവസം ഇൗജിപ്​ത്​ പ്രസിഡൻറ്​ അബ്​ദുൽ ഫതാഹ്​ അൽ സീസിയെയും ട്രംപ്​ ഫോണിൽ വിളിച്ചിരുന്നു.