‘വീണ്ടും ട്രംപ് സര്‍ക്കാര്‍’വിവാദം: മോദിയുടെ പ്രസ്​താവന വിശദീകരിച്ച്​ ജയ്​ശങ്കർ

വാഷിങ്ടണ്‍: ഹൂസ്റ്റണില്‍ നടന്ന ‘ഹൗഡി മോദി’ പരിപാടിക്കിയിൽ ഡൊണാള്‍ഡ് ട്രംപിനെ ഒരിക്കൽ കൂടി പ്രസിഡൻറായി തെരഞ്ഞെടുക്കണമെന്ന പ്രധാനമന്ത്രി നരേന്ദ്രമോദിയുടെ പ്രസ്​താവന വളച്ചൊടിച്ചതാണെന്ന്​ വിദേശകാര്യ മന്ത്രി എസ്. ജയ്ശങ്കര്‍. ‘ഒരിക്കൽ കൂടി ട്രംപ്​ സർക്കാർ’ എന്ന ഡൊണാൾഡ്​ ട്രംപി​​​െൻറ മുദ്രാവാക്യം മോദി ആവർത്തിക്കുകയാണ്​ ഉണ്ടായത്​. പരാമര്‍ശം തെറ്റായി വ്യാഖ്യാനിക്കരുതെന്നും ഇന്ത്യക്ക്​ അമേരിക്കൻ രാഷ്ട്രീയത്തില്‍ പ്രത്യേക പക്ഷമില്ലെന്നും ജയ്ശങ്കര്‍ പറഞ്ഞു. വാഷിങ്​ടണിൽ മാധ്യമപ്രവർത്തകരോട്​ സംസാരിക്കുകയായിരുന്നു അദ്ദേഹം.

‘ഹൗഡി മോദി’ പരിപാടിക്കെത്തിയ ട്രംപിനെ മോദി ‘ഒരിക്കൽ കൂടി ട്രം്​ സർക്കാർ’ എന്ന മുദ്രാവാക്യത്തോടെയാണ്​ സ്വാഗതം ചെയ്​തത്​. 2020 ല്‍ നടക്കാനിരിക്കുന്ന അമേരിക്കന്‍ പ്രസിഡൻറ്​ തെരഞ്ഞെടുപ്പില്‍ ട്രംപിന് അനുകൂലമായി നടത്തിയ പ്രചാരണമായിരുന്നു ഇതെന്ന്​ വിമർശനമുയർന്നിരുന്നു. ഈ സാഹചര്യത്തിലാണ്​ ത്രിദിന സന്ദർശനത്തിനായി യു.എസിലെത്തിയ വിദേശകാര്യമന്ത്രി ജയ്ശങ്കർ ഇത്​ സംബന്ധിച്ച വിശദീകരണം നടത്തിയത്​.

പ്രധാനമന്ത്രി പറഞ്ഞത് എന്താണെന്ന് വളരെ ശ്രദ്ധയോടെ പരിശോധിക്കണമെന്നാണ് എനിക്ക് തോന്നുന്നത്. പ്രസിഡൻറ്​ സ്ഥാനാര്‍ഥിയായ ട്രംപ് ജനങ്ങളോട് പറയാറുള്ള വാചകം ത​​െൻറ പ്രസംഗത്തില്‍ സൂചിപ്പിക്കുക മാത്രമാണ് അദ്ദേഹം ചെയ്തതെന്നാണ് മനസ്സിലാക്കുന്നത്, ജയശങ്കർ പറഞ്ഞു. പ്രധാനമന്ത്രി പറഞ്ഞതിനെ തെറ്റായി വ്യാഖ്യാനിക്കരുതെന്നും അങ്ങനെ ചെയ്യുന്നത് നല്ലകാര്യമാണെന്ന് താന്‍ കരുതുന്നില്ല. താൻ എന്താണ്​ സംസാരിക്കുന്നത്​ എന്നതിനെ കുറിച്ച്​ അദ്ദേഹത്തിന്​ വ്യക്തതയുണ്ടെന്നും ജയ്​ശങ്കർ പറഞ്ഞു.

‘ഹൗഡി മോദി’ പരിപാടിയിൽ മോദി ട്രംപിന്​ വേണ്ടി തെരഞ്ഞെടുപ്പ്​ പ്രചരണം നടത്തുകയാണ്​ ചെയ്​തതെന്നും ​പ്രധാനമന്ത്രി മറ്റൊരു രാജ്യത്തി​​െൻറ തെരഞ്ഞെടുപ്പു നടപടിക്രമങ്ങളില്‍ ഇടപെട്ടത് നയതന്ത്ര കീഴ്വഴക്കങ്ങളുടെ ലംഘനമാണെന്നും പ്രതിപക്ഷം ആരോപിച്ചിരുന്നു.