ത്രിപുരയിൽ മാധ്യമ പ്രവർത്തകരെയടക്കം യു.എ.പി.എ കാട്ടി വിരട്ടി ബി.ജെ.പി സർക്കാർ

'ത്രിപുര കത്തി എരിയുന്നു എന്ന മൂന്ന്​ വാക്കുകൾ എഴുതിയതിന്‍റെ പേരിൽ ത്രിപുരയിലെ ബി.ജെ.പി സർക്കാർ എന്‍റെ മേൽ യു.എ.പി.എ ചുമത്തിയിരിക്കുന്നു. ഒരു കാര്യം ആവർത്തിച്ചു പറയ​ട്ടെ, നീതിക്കു വേണ്ടി നിലയുറപ്പിക്കാൻ എനിക്ക്​ ഒരു മടിയുമില്ല. എന്‍റെ നാട്ടിലെ പ്രധാനമന്ത്രി ഒരുപക്ഷേ ഭയപ്പെടുന്നുണ്ടാകും. പക്ഷേ, ഞങ്ങൾ മാധ്യമപ്രവർത്തകർക്ക്​ ഭയമില്ല. നിങ്ങളുടെ ജയിലറയെയും ഞാൻ ഭയക്കുന്നില്ല'. ത്രിപുരയിൽ നിന്നുള്ള മാധ്യമപ്രവർത്തകൻ ശ്യാം മീര സിങ്​ ട്വിറ്ററിൽ കുറിച്ചതാണീ വാക്കുകൾ.

ശ്യാം അടക്കം 102 പേ​ർക്കെതിരെയാണ്​ അക്രമത്തെയും അനീതിയെയും എതിർത്തു സംസാരിച്ചതിന്‍റെ പേരിൽ ത്രിപുരയിലെ ബിപ്ലബ്​ ​ദേബിന്‍റെ സർക്കാർ യു.എ.പി.എ ചുമത്തി കേസ്​ എടുത്തിരിക്കുന്നത്​. സമൂഹ മാധ്യമങ്ങൾ വഴി മനഃപൂർവം വിദ്വേഷം പരത്താൻ ശ്രമിച്ചു എന്നാണ്​ യു.എ.പി.എ ചുമത്താൻ കാരണമായി ബി.ജെ.പി ഭരണകൂടം ചൂണ്ടിക്കാണിക്കുന്നത്​. സംസ്​ഥാനത്തിന്‍റെ വടക്കൻ ജില്ലകളിൽ അടുത്തിടെ ശക്​തമായ ന്യൂനപക്ഷങ്ങൾക്കെതിരായ വംശീയ സംഘർഷങ്ങളെ എതിർത്തതിനാണ്​ നടപടി. ജനാധിപത്യപരമായ പ്രതിഷേധ സമരങ്ങളെ ക്രിമിനൽ വത്​കരിച്ച്​ നടപടിയെടുക്കുന്ന ബി.ജെ.പിയുടെ നയങ്ങളുടെ ഭാഗം തന്നെയാണിത്​.

68 ട്വിറ്റർ അക്കൗണ്ടുകൾക്കും 32 ഫേ​സ്​ബുക്ക്​​ ഉപയോക്​താക്കൾക്കും രണ്ട്​ യു ട്യൂബ്​ അക്കൗണ്ടുകൾക്കും എതിരെയാണ്​ നിലവിൽ യു.എ.പി.എ ചുമത്തിയിരിക്കുന്നത്​. വെസ്റ്റ്​ അഗർത്തല പൊലീസ്​ സ്​റ്റേഷനിൽ റിപ്പോർട്ട്​ ചെയ്​ത ആദ്യ കേസുകൾ ഇപ്പോൾ സംസ്​ഥാന ക്രൈം ബ്രാഞ്ചിന്​ കൈമാറിയിട്ടുണ്ട്​​. ഡൽഹി ആസ്​ഥാനമാക്കി പ്രവർത്തിക്കുന്ന അഭിഭാഷകരായ അൻസാർ ഇന്ദോരി, മുകേഷ്​ എന്നിവർക്കെതിരെ പൊലീസ്​ സമാന വിഷയത്തിൽ യു.എ.പി.എ ചുമത്തി കേസ്​ എടുത്തിരുന്നു. തീവ്ര ഹിന്ദുത്വ സംഘടനകൾ മുസ്​ലിംകൾക്കെതിരെ നടത്തിയ അതിക്രമങ്ങളുടെ വസ്​തുതാന്വേഷണ റിപ്പോർട്ട്​ പുറത്തുവിട്ടതിനെ തുടർന്നാണ്​ അഭിഭാഷകർക്കെതിരെ കേസെടുത്തത്​. ഇതിനെതിരെയും പ്രതിഷേധം ശക്​തമായിട്ടുണ്ട്​.

നവംബർ മൂന്നിനാണ്​ സംഘർഷത്തിനെതിരെ പ്രതികരിച്ച 68 ട്വിറ്റർ അക്കൗണ്ടുകളുടെ വിവരങ്ങൾ കൈമാറണമെന്നും പോസ്റ്റുകൾ നീക്കം ചെയ്യണമെന്നും ആവശ്യപ്പെട്ട്​ വെസ്റ്റ്​ അഗർത്തല പൊലീസ്​ ട്വിറ്ററിനെ സമീപിക്കുന്നത്​. സംഭവത്തെ സംബന്ധിച്ച യഥാർഥ വിവരങ്ങളല്ല സമൂഹ മാധ്യമങ്ങളിൽ ഇവർ പങ്കുവെച്ചതെന്നും വ്യാജ ചിത്രങ്ങളാണ്​ അക്രമങ്ങളുടേതെന്ന പേരിൽ ഉപയോഗിച്ചതെന്നുമാണ്​ പൊലീസിന്‍റെ വാദം.

കേസെടുക്കപ്പെട്ട ട്വിറ്റർ അക്കൗണ്ടുകളിൽ ഭൂരിഭാഗവും മാധ്യമ പ്രവർത്തകരുടേതാണ്​. യഥാർഥ വാർത്തകൾ പുറംലോകത്തെ അറിയിക്കാൻ സമൂഹമാധ്യമം ഉപയോഗിച്ചതിനാണ്​ തങ്ങൾക്കെതിരെ ജാമ്യമില്ലാ വകുപ്പുകൾ ചുമത്തിയിരിക്കുന്നതെന്ന്​ മാധ്യപ്രവർത്തകർ പറയുന്നു. അതേസമയം, ഇതുവരെ ആരെയും അറസ്റ്റ്​ ചെയ്​തിട്ടില്ലെന്നും സ്വാഭാവിക നടപടി മാത്രമാണുണ്ടായതെന്നും പൊലീസ്​ അസിസ്റ്റന്‍റ്​ ഇൻസ്​പെക്​ടർ ജനറൽ സുബ്രത ചക്രബർത്തി പറയുന്നു.

പ്രതിപക്ഷ കക്ഷികളും ശക്​തമായ പ്രതിഷേധവുമായി രംഗത്തെത്തിയിട്ടുണ്ട്​. ഭരണഘടന വിരുദ്ധമായ നടപടിയാണ്​ പൊലീസിന്‍റെ ഭാഗത്തു നിന്നുണ്ടായതെന്ന്​ സി.പി.എം മുൻ എം.പി ചിതേന്ദ്ര ചൗധരി പറഞ്ഞു. സംസ്​ഥാനത്ത്​ വർഗീയ സംഘർഷം ഉണ്ടായി എന്നതും സംഘ്​ പരിവാർ ശക്​തികളാണ്​ അതിന്​ പിന്നിലെന്നതും യാഥാർഥ്യമാണ്​. ബി.ജെ.പിയുടെ ഭരണ പരാജയങ്ങൾ മറച്ചുവെക്കാനാണ്​ ഇത്തരത്തിലുള്ള നടപടികളെന്നും അദ്ദേഹം പ്രതികരിച്ചു.

കൊളോണിയൽ മാനസികാവസ്​ഥയാണ്​ ത്രിപുര പൊലീസിനെ നയിക്കുന്നതെന്ന്​ ഇൻഡിജനസ്​ പ്രോഗ്രസിവ്​ റിജിയനൽ അലയൻസ്​ നേതാവ്​ പ്രദ്യോത്​ ദേബ്​ ബർമ പറഞ്ഞു. ചിലരുടെ രാഷ്​​ട്രീയ അജണ്ടകൾക്ക്​ ​യോജിക്കാത്ത വാർത്തകൾ പുറത്തുവരുന്നതിന്‍റെ വിഷയമാണിത്​. സർക്കാർ കുറച്ചുകൂടി പക്വതയിൽ കാര്യങ്ങൾ നോക്കിക്കാണണമെന്നും അദ്ദേഹം പറഞ്ഞു.

അക്രമത്തിനെതിരെ ശബ്​ദമുയർത്തിയതിന്​ പൊലീസ്​ നടപടിയെടുത്തിട്ട്​ ഇതാണ്​ ഗുജറാത്തി മോഡൽ എന്നാണ്​ ബി.ജെ.പി പറയുന്നതെന്ന്​ തൃണമൂൽ കോൺഗ്രസ്​ നേതാവ്​ സുഷ്​മിത ദേബ്​ പരിഹസിച്ചു. വർഗീയ കലാപം റിപ്പോർട്ട്​ ചെയ്​ത മാധ്യമ പ്രവർത്തകർക്കെതിരെ യു.എ.പി.എ ചുമത്തി കേസ്​ എടുത്ത സംഭവം ഞെട്ടിക്കുന്നതാണെന്ന്​ എഡിറ്റേഴ്​സ്​ ഗിൽഡ്​ പ്രതികരിച്ചു.