ത്രിപുര തെരഞ്ഞെടുപ്പ്​; വോ​ട്ടെണ്ണൽ പുരോഗമിക്കുന്നു, ആത്മവിശ്വാസത്തോടെ​ ബി.ജെ.പിയും തൃണമൂല​ും

ന്യൂഡൽഹി: ത്രിപുരയിൽ നഗരസഭകളിലേക്കും അഗർത്തല മുനിസിപ്പൽ കോർപറേഷനിലേക്കുമായി നടന്ന തെരഞ്ഞെടുപ്പിൽ വോ​ട്ടെണ്ണൽ പ​ുരോഗമിക്കുന്നു. സംസ്​ഥാനത്തെ ഭരണകക്ഷിയായ ബി.ജെ.പിയും തൃണമൂൽ കോൺഗ്രസും തമ്മിലുള്ള കടുത്ത രാഷ്​ട്രീയ പോരാട്ടത്തിനിടയിലായിരുന്നു തെരഞ്ഞെടുപ്പ്​.

2018ൽ ത്രിപുരയിൽ ബി.ജെ.പി അധികാരത്തിലെത്തിയതിന്​ ശേഷം സംസ്​ഥാനത്ത്​ നേരിടുന്ന ആദ്യ തെരഞ്ഞെടുപ്പാണിത്​. അംബാസ, ജിറാനിയ, തെലിയമുറ, സബ്​റൂം എന്നിവിടങ്ങളിൽ ബി.ജെ.പി ലീഡ്​ ചെയ്യുന്നതായി സംസ്​ഥാന തെരഞ്ഞെടുപ്പ്​ കമീഷൻ അറിയിച്ചു.

334 സീറ്റുകളിലേക്കാണ്​ മത്സരം. ഇതിൽ അഗർത്തല മുനിസിപ്പൽ കോർപറേഷനിലെ 51 വാർഡുകളും 13 മുനിസിപ്പൽ കൗൺസിലുകളും ആറ്​ നഗര പഞ്ചായത്തുകളും ഉൾപ്പെടും.

പ്രതിപക്ഷ സാന്നിധ്യമില്ലാത്തതിനാൽ ബി.ജെ.പി 112 സീറ്റിലേക്ക്​ എതിരില്ലാതെ തെരഞ്ഞെടുക്കപ്പെട്ടിരുന്നു. 222 സീറ്റുകളിലേക്കാണ്​ നിലവിലെ മത്സരം. ഈ സീറ്റുകളിലേക്കായി 785 പേർ ജനവിധി തേടി. ബി.ജെ.പി, തൃണമൂൽ കോൺഗ്രസ്​, സി.പി.എം എന്നീ പാർട്ടികൾ തമ്മിലാണ്​ പ്രധാന മത്സരം.

അതേസമയം, ബി.ജെ.പി തെരഞ്ഞെടുപ്പ്​ അട്ടിമറിച്ചുവെന്ന ആരോപണവുമായി തൃണമൂൽ ​േകാൺഗ്രസ്​ രം​ഗത്തെത്തിയിരുന്നു. ബി.ജെ.പി തെരഞ്ഞെടുപ്പിനെ പ്രഹസനമാക്കിയതി​നാൽ തെരഞ്ഞെടുപ്പ്​ റദ്ദാക്കണമെന്നാണ്​ തൃണമൂൽ ആവശ്യം. അഗർത്തല മുനിസിൽ കോർപറേഷനിലെ അഞ്ചുവാർഡുകളിലെ തെരഞ്ഞെടുപ്പ്​ റദ്ദാക്കണമെന്ന ആവശ്യവുമായി സി.പി.എമ്മും രംഗത്തെത്തിയിരുന്നു.