ഇന്നലെ തൃണമൂലിന്​ വോട്ട്​ ചെയ്യാനാവശ്യപ്പെട്ടു, ഇന്ന്​ ബി.ജെ.പിക്കും; വോട്ടർമാരെ കൺഫ്യൂഷനാക്കി ബോളിവുഡ്​ നടി

കൊൽക്കത്ത: പശ്ചിമ ബംഗാളിലെ വോട്ടർമാരി​ൽ ചിലരെങ്കിലും കൺഫ്യൂഷനിലാണ്​. തങ്ങളുടെ പ്രിയപ്പെട്ട നടി കഴിഞ്ഞദിവസം പറഞ്ഞത്​ തൃണമൂൽ കോൺഗ്രസിന്​ വോട്ട്​ ചെയ്യണമെന്നായിരുന്നു. എന്നാൽ, ഇന്ന്​ ആവശ്യപ്പെട്ടത്​​ ബി.ജെ.പി സ്​ഥാനാർഥിയെ ജയിപ്പിക്കണമെന്നും. ബോളിവുഡ്​ നടിയും പശ്ചിമ ബംഗാളിലെ ഡാർജിലീങ്​ സ്വദേശിനിയുമായ മഹിമ ചൗധരിയാണ്​ വോട്ടർമാരെ കുഴപ്പത്തിലാക്കിയത്​.

പശ്ചിമ ബംഗാളിലെ നോർത്ത് 24 പരാഗനാസ് ജില്ലയിൽ തിങ്കളാഴ്ച നടന്ന പരിപാടിയിൽ ബി.ജെ.പിക്ക്​ വേണ്ടി വോട്ട് ചെയ്യണമെന്നാണ്​ ഇവർ ആവശ്യപ്പെട്ടത്​. എന്നാൽ, കഴിഞ്ഞദിവസം തൃണമൂൽ കോൺഗ്രസ് സ്ഥാനാർത്ഥിക്കായി ഇവർ റോഡ്​ഷോയിൽ പ​ങ്കെടുക്കുകയും സ്​ഥാനാർഥിയെ വിജയിപ്പിക്കണമെന്നും അഭ്യർഥിച്ചു.

294 സീറ്റുള്ള പശ്ചിമ ബംഗാൾ നിയമസഭ കീഴടക്കാനായി ഇരുപാർട്ടികളും കടുത്ത പോരാട്ടമാണ്​ നടത്തുന്നത്​. എട്ട്​ ഘട്ടങ്ങളായാണ്​ ഇവിടെ വോ​ട്ടെടുപ്പ്​. നാല്​ ഘട്ടങ്ങൾ സമാപിച്ചു. ഇതിനിടയിൽ നിരവധി ആക്രമണങ്ങളാണുണ്ടായത്​. നിരവധി പേർ​ മരിക്കുകയും ചെയ്​തു.

ഇത്രയും ചൂടേറിയ രാഷ്ട്രീയ അന്തരീക്ഷത്തിനിടെയാണ്​ മഹിമ ചൗധരി ബി.ജെ.പിക്കും ടി.എം.സിക്കും വേണ്ടി പ്രചാരണം നടത്തുന്നത്​. നോർത്ത് 24 പരാഗനാസ് ജില്ലയിലെ ലേക്ക്​ ടൗൺ ഏരിയയിലെ ബി.ജെ.പി സ്​ഥാനാർഥി സബ്യാസാച്ചി ദത്തക്ക്​ വേണ്ടിയാണ്​ തിങ്കളാഴ്ച ഇവർ രംഗത്ത്​ വന്നത്​. കഴിഞ്ഞദിവസം കാമർഹതിയിൽ ടി.എം.സി സ്ഥാനാർത്ഥി മദൻ മിത്രക്ക്​ വേണ്ടിയാണ്​ റോഡ്‌ഷോയിൽ അണിനിരന്നത്​. ഏപ്രിൽ 17നാണ്​ അഞ്ചാംഘട്ട വോ​ട്ടെടുപ്പ്​ നടക്കുന്നത്​.