കോവിഡ്​:​ ഉന്നതല യോഗത്തിൽ അസ്വസ്ഥനായി മോദി; പ്രതിരോധ പാളിച്ചകളിൽ ഉദ്യോഗസ്ഥർക്ക്​ വിമർശനം

ന്യൂഡൽഹി: കോവിഡിന്‍റെ രണ്ടാം തരംഗം രാജ്യത്ത്​ അതിവേഗം വ്യാപിക്കുന്നതിനിടെ പ്രതിസന്ധി കൈകാര്യം ചെയ്യുന്നതിൽ ഉദ്യോഗസ്ഥർക്ക്​ വീഴ്ചയു​ണ്ടായെന്ന്​ വ്യക്​തമാക്കി പ്രധാനമന്ത്രി നരേന്ദ്ര മോദി. ഉന്നത ഉദ്യോഗസ്ഥരുടെ യോഗത്തിൽ മോദി വിമർശനം ഉന്നയിച്ചുവെന്ന്​ ദ പ്രിന്‍റ്​ റിപ്പോർട്ട്​ ചെയ്യുന്നു.

കാബിനറ്റ്​ സെക്രട്ടറി രാജീവ്​ ഗൗബ, പ്രിൻസിപ്പൽ സെക്രട്ടറി പി.കെ മിശ്ര, ആഭ്യന്തര സെക്രട്ടറി അജയ ഭല്ല, ആരോഗ്യ സെക്രട്ടറി രാജേഷ്​ ഭൂഷൻ, ഫാർമ സെക്രട്ടറി എസ്​. അപർണ, നീതി ആയോഗ്​ അംഗം വി.കെ പോൾ എന്നിവരാണ്​ യോഗത്തിൽ പ​ങ്കെടുത്തത്​. യോഗത്തിൽ അസ്വസ്ഥനായി കാണപ്പെട്ട മോദി, കഴിഞ്ഞ തവണത്തെ ആവേശം കോവിഡിനെ പ്രതിരോധിക്കുന്നതിൽ ഇല്ലാതാകുന്നത്​ എന്തുകൊണ്ടാണെന്ന്​ ചോദിച്ചു.

കഴിഞ്ഞ തവണ നമുക്ക്​ പി.പി.ഇ കിറ്റുകളോ മാസ്​കോ ഉണ്ടായിരുന്നില്ല. എന്നാൽ, ​ഈ വെല്ലുവിളികളെ നാം മറികടന്നു. പി.പി.ഇ, കിറ്റുകളും മാസ്​കും വെന്‍റിലേറ്റുകളും നിർമിച്ചു. എന്നാൽ, ഇത്തവണ നാം കുറച്ച്​ കൂടി മുന്നൊരുക്കം നടത്തേണ്ടതായിരുന്നുവെന്ന്​ മോദി പറഞ്ഞു.