'ലോക്സഭാ തെരഞ്ഞെടുപ്പിൽ ഒന്നിച്ചുനിന്ന്​ മാറ്റത്തിന്​ വോട്ടു ചെയ്യൂ'; കർഷകരോട്​ മേഘാലയ ഗവർണർ

ന്യൂഡൽഹി: അടുത്ത ലോക്സഭാ തെരഞ്ഞെടുപ്പിൽ ഒന്നിച്ച്​ മാറ്റത്തിനായി വോട്ടു ചെയ്യാൻ, കർഷക സമരത്തെ പിന്തുണച്ച ബി.ജെ.പി നേതാവും മേഘാലയ ഗവർണറുമായ സത്യപാൽ മല്ലിക്​ കർഷകരോട്​ ആവശ്യപ്പെട്ടു. കർഷകർ ഒന്നിച്ചു നിന്നാൽ ഡൽഹിയിൽ അധികാരത്തിലിരിക്കുന്നവർ ഓടിയൊളിക്കുമെന്നും ഹരിയാനയിലെ ജിൻഡിൽ കണ്ട്​ല, മാജ്​റ ഖാപ്​​ പഞ്ചായത്തുകൾ ആദരിക്കാൻ സംഘടിപ്പിച്ച ചടങ്ങിൽ മല്ലിക്​ ഓർമിപ്പിച്ചു.

അടുത്ത ആറ്​ മാസത്തിനകം ഗവർണറുടെ കാലാവധി പൂർത്തിയാകുന്നതോടെ കർഷകരെ ഒന്നിപ്പിക്കാൻ താൻ ഉത്തരേന്ത്യയിലുടനീളം പര്യടനം നടത്തുമെന്നും അദ്ദേഹം വ്യക്​തമാക്കി. ലോക്സഭാ തെരഞ്ഞെടുപ്പിന്​ രണ്ട്​ വർഷം മാത്രമാണുള്ളത്​. റോഡിലിരുന്ന്​ സമരം നടത്തുന്നതിന്​ പകരം കർഷകർ ഒന്നിച്ചുനിന്ന്​ രാഷ്ട്രീയ ശക്​തി നേടണം.

നിങ്ങൾ ഒരുമിച്ച്​ വോട്ടു ചെയ്താൽ ഡൽഹിയിൽ അധികാരത്തിലുള്ളവർ ഒലിച്ചുപോകും. കർഷകർ യാചകരാണ്​ എന്നാണ്​ അധികാരത്തിലിരിക്കുന്നവർ കരുതുന്നത്​. അവരുടെ വിളകൾക്ക്​ യഥാർഥ വില നൽകുന്നില്ല. ഒരുമിച്ചുനിന്ന്​ സ്വന്തം സർക്കാറുണ്ടാക്കുക.

ഇനിയും വലിയ പദവികൾ വേണ്ട​. കർഷക വിഷയത്തിൽ മിണ്ടാതിരുന്നാൽ ഉപരാഷ്ട്രപതിയോ രാഷ്​​​ട്രപതിയോ ആകാമായിരുന്നുവെന്നാണ്​ സുഹൃത്തുക്കൾ ഉപദേശിച്ചത്​. അത്​ വേണ്ടെന്ന്​ ഞാൻ അവരോട്​ പറഞ്ഞു. മൂന്ന്​ കർഷക നിയമങ്ങൾ പിൻവലിച്ചത്​ പൂർത്തിയായിട്ടില്ലെന്നും വലിയ ചോദ്യം അവശേഷിക്കുകയാണെന്നും മല്ലിക്​ പറഞ്ഞു.