ബി.ജെ.പി എം.പിയുടെ ഭാര്യ സുജാത മൊണ്ഡാൽ തൃണമൂൽ ടിക്കറ്റിൽ മത്സരിക്കും

കൊൽക്കത്ത: ബി.​െജ.പി എം.പി സൗമിത്ര ഖാന്‍റെ ഭാര്യ സുജാത മൊണ്ഡാൽ തൃണമൂൽ കോൺഗ്രസ്​ സ്​ഥാനാർഥിയായി മത്സരിക്കും. ആരംബാഗ്​ മണ്ഡലത്തിൽനിന്നാണ്​ ഇവർ ജനവിധി തേടുക.

2020 ഡിസംബറിലാണ്​ സുജാത മൊണ്ഡാൽ ബി.ജെ.പി വിട്ട്​ തൃണമൂൽ കോൺഗ്രസിലെത്തുന്നത്​. ഭാർത്താവ്​ സൗമിത്ര ഖാനെതിരെ ഗുരുതര ആരോപണങ്ങൾ ഉയർത്തിയതിന്​​ തൊട്ടുപിന്നാലെയായിരുന്നു സുജാതയുടെ തൃണമൂൽ പ്രവേശനം. ഭാര്യ തൃണമൂലിൽ ചേർന്നതോടെ സൗമിത്ര ഖാൻ വിവാഹമോചന നോട്ടീസ്​ അയച്ചു.

ബി.ജെ.പിയ​ുടെ യുവമോർച്ച പ്രസിഡന്‍റും ബിഷ്​ണുപുർ എം.പിയുമാണ്​ സൗമിത്ര ഖാൻ. തൃണമൂൽ കോൺഗ്രസ്​ തന്‍റെ കുടുംബം തകർത്ത​ുവെന്നായിരുന്നു സൗമിത്ര ഖാനിന്‍റെ പ്രതികരണം.

പശ്​ചിമ ബംഗാളിൽ മുഖ്യമന്ത്രി മമത ബാനർജി 291 സ്​ഥാനാർഥികളെ പ്രഖ്യാപിച്ചു. സ്വന്തം സീറ്റായ ഭൊവാനിപൂർ വിട്ട്​ ഇത്തവണ നന്ദിഗ്രാമിലായിരിക്കും മമത മത്സരിക്കുക​. തൃണമൂൽ വിട്ട്​ ബി.ജെ.പിയിലേക്ക്​ പോയ സുവേന്ദു അധികാരിയുടെ കോട്ടയായി അറിയപ്പെടുന്ന നന്ദിഗ്രാം എന്തുവില കൊടുത്തും പിടിക്കാനാണ്​ സ്വന്തമായി ആ മണ്ഡലത്തിൽ വോട്ടുതേടി മമത തന്നെ ഇറങ്ങുന്നത്​.

മമതയുടെ സീറ്റായ ഭൊവാനിപൂരിൽ​ തൃണമൂൽ പ്രതിനിധിയായി സുവൻദേബ്​ ച​ട്ടോബാധ്യായ ആകും ഇത്തവണ ജനവിധി തേടുക. 291 സീറ്റുകളിലും സ്​ഥാനാർഥികളെ പ്രഖ്യാപിച്ച മമത പ്രായം 80 പിന്നിട്ട ആരും ഇത്തവണ തൃണമൂൽ ബാനറിൽ മത്സരിക്കില്ലെന്ന്​ വ്യക്​തമാക്കി. ഇതിന്‍റെ ഭാഗമായി 20ലേറെ നിലവിലെ എം.എൽ.എമാരെ പാർട്ടി മാറ്റിനിർത്തിയിട്ടുണ്ട്​. 50 വനിതകളെയും 42 മുസ്​ലിംകളെയും 79 പട്ടിക ജാതിക്കാരെയും 17 പട്ടിക വർഗക്കാരെയുമാണ്​ തൃണമൂൽ അണിനിരത്തിയിരിക്കുന്നത്​.