ബംഗാളിൽ പോളിങ്ങിനിടെ ബി.ജെ.പി-ടി.എം.സി തർക്കം

കൊൽക്കത്ത: പശ്​ചിമ ബംഗാളിൽ ബി.ജെ.പി-തൃണമൂൽ കോൺഗ്രസ്​ പ്രവർത്തകർ തമ്മിൽ തല്ല്​. ബരാക്​പൂരിലെ ബി.ജെ.പി സ്​ഥാനാർഥി അർജുൻ സിങ്ങിനു നേരെ ഇന്ന്​ രാവിലെ ആക്രമണം നടന്നു. ബരാക്​പൂരിലെ അംതാലയിൽ ബി.ജെ.പിയുടെ പോളിങ്​ ഏജൻറിനെ കാണാനില്ലെന്നും ബൂത്തിൽ കയറാൻ അനുവദിക്കുന്നില്ലെന്നും ഏജൻറിൻെറ മാതാവ്​ അർജുൻ സിങ്ങിനോട്​ പരാതിപ്പെട്ടു. തുടർന്ന്​​ ഏജൻറിനെ കണ്ടെത്തി അർജുൻ സിങ് അദ്ദേഹത്തെ ബൂത്തിനുള്ളിൽ ഇരുത്തി. അതിനു പിറകെ തൃണമൂൽ പ്രവർത്തകർ അർജുൻ സിങ്ങിനെ ആക്രമിക്കുകയായിരുന്നുവെന്ന്​ ബി.ജെ.പി പറയുന്നു. അർജുൻ സിങ്ങിന്​ പരിക്കേറ്റിട്ടുണ്ട്​. എന്നാൽ അർജുൻ സിങ്​ വനിതാ പ്രവർത്തകയോട്​ അപമര്യാദയായി പെരുമറിയതാണ്​ അക്രമത്തിന്​ വഴിവെച്ചതെന്നാണ്​ തൃണമൂലിൻെറ വാദം. ബംഗാളിലെ മൂന്ന്​ ജില്ലകളിലായി ബോൻഗോൺ, ബരാക്​പുർ, ഹൗറ, ഉലുബെറിയ, സെരംപൂർ, ഹൂഗ്ലി, അരംബാഗ്​ എന്നീ ഏഴ്​ മണ്ഡലങ്ങളിലാണ്​ അഞ്ചാംഘട്ടത്തിൽ പോളിങ്​ നടക്കുന്നത്​. ഏഴ്​ മണ്ഡലങ്ങളിലായി 83 സ്​ഥാനാർഥികളാണ്​ ജനവിധി തേടുന്നത്​.