ടിപ്പുവി​െൻറ കാലത്തേതെന്നു​ കരുതുന്ന 1000 റോക്കറ്റുകൾ ശിവമൊഗ്ഗയിൽ കണ്ടെത്തി

ബംഗളൂരൂ: ടിപ്പു സുൽത്താ​​െൻറ കാലത്തേതെന്നു കരുതുന്ന 1000 റോക്കറ്റുകൾ ശിവമൊഗ്ഗയിൽ കണ്ടെത്തി. ഹൊസനഗര താലൂക്കിലെ നഗര ഗ്രാമത്തിൽ പുരാവസ്തു വകുപ്പ് നടത്തിയ ഉൽഖനനത്തിലാണ് റോക്കറ്റുകൾ കണ്ടെത്തിയത്. 2002ൽ നഗരയിലെ നാഗരാജ റാവുവി​​െൻറ സ്ഥലത്തെ ഉപയോഗശൂന്യമായ കിണറിൽ 102 പുരാതന റോക്കറ്റുകൾ ഉപേക്ഷിച്ച നിലയിൽ കണ്ടെത്തിയിരുന്നു.

18ാം നൂറ്റാണ്ടിൽ ഉപയോഗിച്ചിരുന്ന റോക്കറ്റുകളാണ് അവയെന്ന കണ്ടെത്തലിൽ പുരാവസ്തു ഗവേഷകർ കഴിഞ്ഞ ദിവസങ്ങളിൽ വീണ്ടും ഖനനം നടത്തുകയായിരുന്നു. മൂന്നു ദിവസം മുമ്പ്​ 500 റോക്കറ്റുകൾ കണ്ടെത്തിയതിനെ തുടർന്ന്​ പ്രതീക്ഷയോടെ ഖനനം തുടർന്ന പുരാവസ്​തു വകുപ്പ്​ അധികൃതർ 500 എണ്ണം കൂടി കഴിഞ്ഞദിവസം കണ്ടെടുക്കുകയായിരുന്നു. 

പുരാതനകാലത്ത് ബിദനൂർ എന്നറിയപ്പെട്ടിരുന്ന നഗര, പഴയ മൈസൂരു സ്​റ്റേറ്റി​​െൻറ ഭരണസിരാകേന്ദ്രങ്ങളിലൊന്നായിരുന്നു. ടിപ്പു സുൽത്താൻ ഇവിടെ ആയുധ നിർമാണശാലയും നാണയശാലയും സ്ഥാപിച്ചിരുന്നുവെന്നാണ് പറയപ്പെടുന്നത്. ഇത്തരം വിവരങ്ങളുടെ അടിസ്ഥാനത്തിലാണ് കണ്ടെത്തിയ റോക്കറ്റുകൾ ടിപ്പുസുൽത്താ​​െൻറ കാലത്തേതാണെന്ന നിഗമനത്തിൽ ചരിത്രകാരന്മാരെത്തിയത്. പൊട്ടാസ്യം നൈട്രേറ്റും കരിയും നിറച്ച ഇരുമ്പു കവചത്തോടെയുള്ള ഏഴു മുതൽ പത്തുവരെ ഇഞ്ച് വലുപ്പവും മൂന്നു മീറ്റർ വ്യാസവുമുള്ള റോക്കറ്റുകളാണ് കണ്ടെത്തിയത്. 

ടിപ്പു സുൽത്താൻ യുദ്ധമുഖങ്ങളിൽ പ്രയോഗിക്കുന്നതിന് റോക്കറ്റുകൾ വികസിപ്പിച്ചിരുന്നുവെന്ന രാഷ്​​ട്രപതി രാംനാഥ് കോവിന്ദ്​ മുമ്പ്​ പരാമർശം നടത്തിയത്​ ബി.ജെ.പിയെ ചൊടിപ്പിച്ചിരുന്നു. പരാമർശത്തിനെതിരെ രൂക്ഷ പ്രതികരണവുമായി മൈസൂരു^കുടക്​ എം.പി പ്രതാപ്​ സിംഹ രംഗത്തെത്തിയിരുന്നു.