മഹാരാഷ്​ട്രയിൽ മൂന്നു പേർക്കുകൂടി കോവിഡ്​

മുംബൈ: മഹാരാഷ്​ട്രയിൽ കോവിഡ്​ -19 സ്ഥിരീകരിച്ചവരുടെ എണ്ണം 22 ആയി ഉയർന്നു. വിദർഭ മേഖലയിയെ യവത്​മാലിൽ രണ്ടുപേർക് കും നാഗ്​പുരിൽ ഒരാൾക്കുമാണ്​ ശനിയാഴ്​ച രോഗം സ്ഥിരീകരിച്ചത്​. മാർച്ച്​ ഒന്നിന്​ ദുബൈയിൽ നിന്നെത്തിയവരാണ്​ യ വത്​മാലിൽ രോഗം ബാധിച്ചവർ. ഇവർക്കൊപ്പമുണ്ടായിരുന്ന മറ്റ്​ ഏഴുപേർ ഏകാന്ത വാർഡിൽ നിരീക്ഷണത്തിലാണ്​.

ഇതിനിടെ, വൈറസ്​ ബാധ സംശയിച്ച്​ ഏകാന്ത വാർഡിൽ നിരീക്ഷണത്തിലായിരുന്ന നാലുപേർ നാഗ്​പുരിലെ ആശുപത്രിയിൽനിന്ന്​ ചാടിപ്പോയത്​ ആശങ്കയുണ്ടാക്കി. വെള്ളിയാഴ്​ച രാത്രിയാണ്​ സംഭവം. മൂന്നുപേരെ ശനിയാഴ്​ച അധികൃതർ പിടികൂടി തിരികെയെത്തിച്ചു.

കോവിഡ്​ -19 സ്​ഥിരീകരിക്കുന്നതിനു മുമ്പ്​ 64കാരനെ ചികിത്സിച്ച മുംബൈ സ്വകാര്യ ഹോസ്​പിറ്റലിലെ എട്ടു​ ഡോക്​ടർമാരെയും നഴ്​സുമാരെയും ആശുപത്രിയിലെ ഏകാന്ത വാർഡിലേക്ക്​ മാറ്റി. മറ്റ്​ 74 പേർ വീടുകളിൽ നിരീക്ഷണത്തിലാണ്​.

കഴിഞ്ഞ എട്ടിന്​ ഭാര്യക്കും മകനുമൊപ്പം ദുബൈയിൽ നിന്നെത്തിയ 64കാരൻ അസ്വസ്ഥതയെ തുടർന്ന്​ സ്വകാര്യ ഹോസ്​പിറ്റലിൽ എത്തുകയായിരുന്നു. ഇദ്ദേഹത്തെ കിടത്തിച്ചികിത്സിക്കുകയും ചെയ്​തു. വെള്ളിയാഴ്​ചയാണ്​ രോഗം സ്ഥിരീകരിച്ചത്​.