കോവിഡ് നിയന്ത്രണങ്ങൾ ലംഘിച്ച് ഗുജറാത്തിൽ ബി.ജെ.പി നേതാവിന്റെ ഡി​.ജെ പാർട്ടി

ഗാന്ധിനഗർ: കോവിഡ് കേസുകൾ കുതിച്ചുയരുന്ന ഗുജറാത്തിൽ നിയന്ത്രണങ്ങൾ ലംഘിച്ച് ബി.ജെ.പി നേതാവിന്റെ നേതൃത്വത്തിൽ ഡി.ജെ പാർട്ടി. തിങ്കളാഴ്ചയാണ് തപി ജില്ലയിലെ ബി.ജെ.പി നേതാവിന്റെ വീട്ടിലെ കല്യാണത്തിന് ഡി.ജെ ഡാൻസ് ​സംഘടിപ്പിച്ചത്. ഇതിൽ ആയിരക്കണക്കിനുപേർ പ​ങ്കെടുത്തതായാണ് വിവരം.

ഇതിന്റെ വീഡിയോ ദൃശ്യങ്ങൾ സമൂഹ മാധ്യമങ്ങളിൽ വൈറലാണ്. കോവിഡ് വർധിച്ചുവരുന്ന സാഹചര്യത്തിൽ 150 പേരിൽ കൂടുതൽ വിവാഹത്തിൽ പ​ങ്കെടുക്കരുതെന്ന സർക്കാർ ഉത്തരവ് നിലവിൽ നിൽക്കേയാണിത്. ജില്ലയിലെ ദോൽവൻ ​ബ്ലോക്കിലാണ് പ്രാദേശിക ബി.ജെ.പി നേതാവിന്റെ വീട്ടിൽ ഡി.ജെ പാർട്ടി അരങ്ങേറിയത്. സംഭവവുമായി ബന്ധപ്പെട്ട് പൊലീസ് തെളിവുകൾ ശേഖരിച്ച് അന്വേഷണം ആരംഭിച്ചിട്ടുണ്ട്.

ഗുജറാത്തിൽ തിങ്കളാഴ്ച 12,753 കോവിഡ് കേസുകളും അഞ്ച് മരണങ്ങളുമാണ് റിപ്പോർട്ട് ചെയ്യപ്പെട്ടത്. നിലവിൽ ഗുജറാത്തിൽ 70,000ത്തിലേറെ കോവിഡ് രോഗികളുണ്ട്.