16കാരി ദേവിശ്രീയടക്കം ഈ സ്​ത്രീകളുണ്ട്​​; ഏറ്റുവാങ്ങാനാളില്ലാത്ത കോവിഡ്​ മൃതദേഹങ്ങൾക്ക്​ അന്ത്യയാത്രയൊരുക്കാൻ...

16 വയസ്സേയുള്ളു ദേവിശ്രീക്ക്​. തന്‍റെ പ്രായത്തിലുള്ള കുട്ടികൾ കോവിഡ്​ കാലത്ത്​ വീട്ടകങ്ങളിൽ പഠനവും വിനോദവുമായി കഴിയു​േമ്പാൾ, സന്നദ്ധ പ്രവർത്തനങ്ങളിൽ സജീവമാകുകയാണ്​ ദേവിശ്രീ. കോവിഡ്​ ബാധിച്ച്​ മരിച്ചതിൽ ഏറ്റുവാങ്ങാൻ ആളില്ലാത്ത മൃതദേഹങ്ങൾ ഏറ്റെടുത്ത്​ മറവുചെയ്യുന്ന സന്നദ്ധ സംഘടനയിലെ പ്രവർത്തകയാണ്​ ദേവിശ്രീ. തെലങ്കാനയിലെ ഖമ്മാമിൽ പ്രവർത്തിക്കുന്ന അന്നം സേവ ഫൗ​ണ്ടേഷനാണ്​ ഏറ്റെടുക്കാൻ ആരുമില്ലാത്ത കോവിഡ്​ മൃതദേഹങ്ങൾക്ക്​ അർഹതപ്പെട്ട യാത്രാമൊഴി നൽകുന്നത്​.

അന്നം സേവ ഫൗ​ണ്ടേഷന്‍റെ വനിതാ പ്രവർത്തകരാണ്​ ഈ പുണ്യകർമത്തിൽ അണിനിരക്കുന്നത്​. ഏറ്റെടുക്കാൻ ആളില്ലാത്ത കോവിഡ്​ മൃതദേഹങ്ങൾ എവിടെയെങ്കിലും ഉപേക്ഷിക്കപ്പെടുകയല്ല ചെയ്യുന്നതെന്ന്​ ഇവർ ഉറപ്പാക്കുന്നു. റെയിൽവേ ട്രാക്കുകളിൽ നിന്ന്​ ലഭിക്കുന്ന, ആരും ഏറ്റെടുക്കാത്ത മൃതദേഹങ്ങൾ സംസ്​കരിക്കുന്ന പ്രവൃത്തിയിലാണ്​ ഇവർ ആദ്യം ഏർപ്പെട്ടിരുന്നത്​. ഇപ്പോൾ, മഹാമാരിയുടെ കാലത്ത്​ കോവിഡ്​ ബാധിച്ച്​ മരിച്ചവരുടെ ശവസംസ്​കാരത്തിന്‍റെ ചുമതല ഏറ്റെടുക്കുകയായിരുന്നു. പൊലീസ്​ ആണ്​ ഏറ്റെടുക്കാൻ ആരുമില്ലാത്ത മൃതദേഹങ്ങളെ കുറിച്ച്​ ഇവരെ അറിയിക്കുന്നത്​. അനാഥാലയത്തിൽ വളർന്ന, ബി.എസ്​.എൻ.എല്ലിൽനിന്ന്​ വിരമിച്ച ശ്രീനിവാസ്​ റാവു ആണ്​ അന്നം സേവ ഫൗ​ണ്ടേഷന്‍റെ സ്​ഥാപകൻ.