പക്ഷികൾ കോവിഡ്​ പരത്തുമെന്ന്​ നഗരസഭ; അസമിൽ മുളങ്കൂട്ടം മുറിച്ചു നീക്കി

ഉദൽ‌ഗുരി: കോവിഡ്​ പരത്തുന്നുവെന്നാരോപിച്ച്​ മുളങ്കൂട്ടം മുറിച്ചുനീക്കി അസമിലെ ഒരു നഗരസഭ. ഉദൽ‌ഗുരി ജില്ലയിലെ തങ്‌ല നഗരസഭയാണ്​ കോവിഡ്​ വ്യാപിപ്പിക്കുന്നുവെന്ന കാരണം ചൂണ്ടിക്കാട്ടി അഞ്ചുപേരുടെ ഉടമസ്​ഥതയിലുള്ള മുളങ്കാടുകൾ വെട്ടിവീഴ്​ത്തിയത്​. ഇവയിൽ കൂടുകൂട്ടിയിരുന്ന നിരവധി കൊറ്റി പക്ഷികൾ നഗരസഭയുടെ മുളവെട്ടൽ 'ഓപറേഷനി'ടെ കൊല്ലപ്പെട്ടു.

കൊറ്റികളുടെ പ്രജനന കാലമായതിനാൽ ഏതാനും ദിവസം പ്രായമുള്ള നിരവധി കുഞ്ഞുങ്ങളും അടവെച്ച്​ വിരിയാറായ നിരവധി മുട്ടകളും കൂടുകളിലുണ്ടായിരുന്നു. ഇവയെല്ലാം നിർദയം നശിപ്പിക്കപ്പെട്ടതായി നാട്ടുകാർ പറഞ്ഞു.

ജൂൺ 8 നാണ്​ തങ്​ല മുനിസിപ്പൽ കമ്മിറ്റി 1, 2 വാർഡുകളിലെ അഞ്ച്​ ഭൂവുടമകൾക്ക്​ മുള മുറിക്കാൻ നിർദേശിച്ചുള്ള കത്ത്​ നൽകിയത്​. "നിങ്ങളുടെ സ്​ഥലത്ത്​ വളരുന്ന മുളകളിൽ കൂടുണ്ടാക്കിയ പക്ഷികൾ കാഷ്​ടിച്ച്​ വൃത്തിഹീനമായ അന്തരീക്ഷമാണ്​ നിലവിലുള്ളത്​. ഇത് കോവിഡ് കേസുകൾ വർധിക്കാൻ ഇടയാക്കും. അതിനാൽ, നിങ്ങളുടെ പരിസരത്തെ മുളച്ചെടികൾ മുറിച്ച് പ്രദേശത്ത് ശുചിത്വമുള്ള ജീവിതസാഹചര്യം സൃഷ്ടിക്കണമെന്ന്​ നിങ്ങളോട് ആവശ്യപ്പെടുന്നു" എന്നാണ്​ തങ്‌ല മുനിസിപ്പൽ കമ്മിറ്റി എക്സിക്യൂട്ടീവ് ഓഫിസർ ഒപ്പിട്ട കത്തിൽ ഉള്ളത്​. അയൽവാസികൾ പരാതിപ്പെട്ടതായും കത്തിൽ ചൂണ്ടിക്കാട്ടുന്നു.

എന്നാൽ, മുള വെട്ടാൻ ഭൂവുടമകളായ മഹേന്ദ്ര ദേക, അമിയോ നർസാരി, രജത് ഭട്ടാചാർജി, ലോക്ജിത് സുതർ, ഗീതിക ദാസ് എന്നിവർ വിസമ്മതിച്ചതോടെ നഗരസഭ തൊഴിലാളികളെ ഏർപ്പാടാക്കി ​വെട്ടിനിരത്തുകയായിരുന്നു.

നൽകിയ സമയ പരിധിക്കുള്ളിൽ മുളമുറിക്കാൻ ഭൂവുടമകൾ തയാറാകാത്തതിനാലാണ്​ അധികൃതർ മുറിച്ചുനീക്കിയതെന്ന്​ തങ്‌ല പൊലീസ് സ്റ്റേഷൻ ഓഫിസർ സോമേശ്വർ കോൺവാർ പറഞ്ഞു. പക്ഷികൾ കൊല്ലപ്പെട്ടതിനെ കുറിച്ച്​ തങ്ങൾക്ക്​ കൃത്യമായ വിവരം ലഭ്യമായിട്ടില്ലെന്നും അദ്ദേഹ​ം പറഞ്ഞു. വനംവകുപ്പ് അധികൃതരും ഇക്കാര്യത്തിൽ കൈമലർത്തി.