ഇന്ത്യയിൽ കോവിഡ്​ മൂന്നാംതരംഗത്തിന്​ സാധ്യതയില്ലെന്ന്​ വിദഗ്​ധർ

ന്യൂഡൽഹി: ഇന്ത്യയിൽ കോവിഡ്​ മൂന്നാംതരംഗത്തിന്​ നിലവിൽ സാധ്യതയില്ലെന്ന്​ വിദഗ്​ധർ. ജനിതക മാറ്റം സംഭവിച്ച കൊറോണ വൈറസ്​ വ​കഭേദങ്ങൾ വീണ്ടും രാജ്യത്ത്​ പടർന്നു പിടിച്ചാൽ മാത്രമേ ഇനി മൂന്നാം തരംഗത്തിന്​ സാധ്യതയുള്ളുവെന്നാണ്​ വിദഗ്​ധരുടെ അഭിപ്രായം. ജനിതക മാറ്റം സംഭവിച്ച കൊറോണ വൈറസ്​ വകഭേദം പടർന്നാൽ മാത്രം ഇനി മൂന്നാം തരംഗത്തെ ഭയപ്പെട്ടാൽ മതിയെന്ന്​ ​കാൺപൂർ ഐ.ഐ.ടി പ്രഫസറായ മനീന്ദ്ര അഗർവാൾ പറഞ്ഞു.

കേരളത്തിലെ രോഗികളുടെ എണ്ണം കൂടി കുറയുന്നതോടെ രാജ്യത്തെ കോവിഡ്​ സാഹചര്യം കൂടുതൽ മെച്ചപ്പെടുമെന്ന്​ അദ്ദേഹം പറഞ്ഞു. ഏപ്രിൽ-മെയ്​ മാസങ്ങളിൽ 20 ശതമാനത്തിന്​ മുകളിലായിരുന്ന ടി.പി.ആർ ഇപ്പോൾ 2.5 ശതമാനമായി കുറഞ്ഞിട്ടുണ്ട്​. ലോകാരോഗ്യസംഘടനയുടെ മാർഗനിർദേശം അനുസരിച്ച്​ ഒരു നിശ്​ചിത കാലയളവിൽ ടി.പി.ആർ അഞ്ച്​ ശതമാനത്തിന്​ താഴെയാണെങ്കിൽ രോഗബാധ കുറഞ്ഞതായി കണക്കാക്കാം. ഇന്ത്യയിൽ ടി.പി.ആർ കഴിഞ്ഞ രണ്ടാഴ്ചയായി അഞ്ച്​ ശതമാനത്തിന്​ താഴെയാണ്​.

ഇന്ത്യയിലെ അതിവേഗത്തിലുള്ള വാക്​സിനേഷനും കോവിഡ്​ തടയുന്നതിന്​ സഹായകമാവുമെന്നാണ്​ വിദഗ്​ധരുടെ പ്രതീക്ഷ. ഇന്ത്യയിൽ നിലവിൽ രണ്ട്​ അതിതീവ്രമായ കോവിഡ്​ വ്യാപനമാണ്​ റിപ്പോർട്ട്​ ചെയ്യപ്പെട്ടിട്ടുള്ളത്​. കഴിഞ്ഞ വർഷം ആഗസ്റ്റ്​-സെപ്​റ്റംബർ മാസങ്ങളിലായിരുന്നു കോവിഡിന്‍റെ ഒന്നാം തരംഗം. ഈ വർഷം ഏപ്രിൽ-മെയ്​ മാസങ്ങളിൽ രണ്ടാം തരംഗവുമുണ്ടായി.