അവർ എന്നെ മുഖ്യമന്ത്രിയാക്കണ​മായിരുന്നു; നവജ്യോത്​ സിങ്​ സിദ്ദുവിന്‍റെ വിഡിയോ വൈറൽ

ന്യൂഡൽഹി: പഞ്ചാബിൽ കോൺഗ്രസിന്‍റെ പ്രതിസന്ധി അവസാനിച്ചിട്ടില്ലെന്ന്​ വ്യക്തമാക്കുന്ന പഞ്ചാബ്​ കോൺഗ്രസ്​ എം.എൽ.എയും മുൻ സംസ്​ഥാന അധ്യക്ഷനുമായ നവ​ജ്യോത് സിങ്​ സിദ്ദുവിന്‍റെ വിഡിയോ പുറത്ത്​. ​മുഖ്യമന്ത്രി സ്​ഥാനത്തിനായി സിദ്ദു ആഗ്രഹിച്ചിരുന്നുവെന്ന്​ വ്യക്തമാക്കുന്നതാണ്​ വിഡിയോ. അവർ എന്നെ മുഖ്യമന്ത്രിയാക്കണമായിരുന്നുവെന്ന്​ സിദ്ദു പറയുന്നു.

മുഖ്യമന്ത്രി ചരൺജിത്​ സിങ്​ ചന്നിയെ പരാമർശിച്ചു​െകാണ്ടാണ്​ സിദ്ദുവിന്‍റെ വാക്കുകൾ. സർക്കാരിനെ നയിക്കാൻ തന്നെ അനുവദിക്കുകയാണെങ്കിൽ അത്​ കൂടുതൽ വിജയത്തിലേക്ക്​ എത്തുമായിരുന്നുവെന്ന്​ സിദ്ദു പറയുന്നു. നിലവിലെ പ്രതിസന്ധി 2022ലെ തെരഞ്ഞെടുപ്പിൽ കോൺ​ഗ്രസിന്​ തിരിച്ചടിയാകുമെന്ന്​ പറയുന്ന സിദ്ദു മുഖ്യമന്ത്രിയെ അധിക്ഷേപിക്കുകയും ചെയ്യുന്നുണ്ട്​. ദിവസങ്ങൾക്ക്​ മുമ്പുള്ളതാണ്​ വിഡിയോ.

അതേസമയം സിദ്ദുവിന്‍റെ പരാമർശങ്ങൾക്കെതിരെ ശിരോമണി അകാലി ദൾ രംഗത്തെത്തി. എസ്​.സി വിഭാഗത്തിൽപ്പെട്ട ഒരാൾ മുഖ്യമന്ത്രിയായതിൽ സിദ്ദുവിന്​ അസൂയയാണെന്നായിരുന്നു അകാലിദളിന്‍റെ പ്രതികരണം. പഞ്ചാബിൽ കോൺഗ്രസിന്‍റെ പരാജയം മറച്ചുവെക്കാൻ ദലിത്​ കാർഡ്​ പാർട്ടി പുറത്തെടുത്തു. ഇത്​ കോൺഗ്രസിന്​ തന്നെ തിരിച്ചടിക്കുമെന്നും അകാലിദൾ വൈസ്​ പ്രസിഡന്‍റ്​ ദാൽജിത്​ സിങ്​ ചീമ പറഞ്ഞു.

മാസങ്ങളായി കടുത്ത പ്രതിസന്ധിയിലായിരുന്നു പഞ്ചാബ്​ കോൺഗ്രസ്​. സിദ്ദുവും മുൻ മുഖ്യമന്ത്രി അമരീന്ദർ സിങ്ങും തമ്മിലുള്ള കലാപം അമരീന്ദറിന്‍റെ രാജിയിൽ കലാശിക്കുകയായിരുന്നു. എന്നാൽ, പുതിയ മുഖ്യമന്ത്രിയായി ചരൺജിത്​ സിങ്​ ചന്നിയെ തെരഞ്ഞെടുത്തതോടെ സിദ്ദുവിന്‍റെ കണക്കുകൂട്ടലുകൾ തെറ്റി. ഇതോടെ അധ്യക്ഷസ്​ഥാനം രാജിവെച്ചുകൊണ്ടുള്ള കത്ത്​ സിദ്ദു ഹൈകമാൻഡിന്​ കൈമാറി. എന്നാൽ രാജി അംഗീകരിക്കാൻ നേതൃത്വം തയാറായില്ലെന്ന്​ മാത്രമല്ല, സിദ്ദുവിനെ നേതൃസ്​ഥാനത്തേക്ക്​ തിരിച്ചുകൊണ്ടുവരാൻ നീക്കം നടത്തുകയും ചെയ്യുന്നുണ്ട്.