ഇന്ന്​ 18ന്​ മുകളിലുള്ളവർക്ക്​ വാക്​സിനേഷൻ ആരംഭിക്കുന്നത് ഈ​ ആറ്​ സംസ്​ഥാനങ്ങളിൽ മാത്രം

ന്യൂഡൽഹി: കോവിഡ്​ വ്യാപനം രൂക്ഷമായ സാഹചര്യത്തിൽ മേയ്​ ഒന്നുമുതൽ 18 വയസിന്​ മുകളിലുള്ളവരെ വാക്​സിനേഷന്​ വിധേയമാക്ക​ുന്ന യജ്ഞത്തിന്​ തുടക്കമിടുമെന്ന്​ കേന്ദ്ര സർക്കാർ പ്രഖ്യാപിച്ചിരുന്നു. എന്നാൽ വാക്​സിൻ ക്ഷാമം കാരണം ആറ്​ സംസ്​ഥാനങ്ങൾ മാത്രമാണ്​ നിലവിൽ യജ്ഞത്തിന്​ തുടക്കമിട്ടത്​.

മഹാരാഷ്​ട്ര, രാജസ്​ഥാൻ, ഉത്തർപ്രദേശ്​, ഛത്തിസ്ഗഢ്​, ഗുജറാത്ത്​, ഒഡീഷ സംസ്​ഥാനങ്ങളിലാണ്​ ഭാഗികമായി വാക്​സിനേഷൻ യജ്ഞങ്ങൾ തുടങ്ങുന്നത്​. ഈ സംസ്​ഥാനങ്ങളിൽ ചില ജില്ലകളിൽ മാത്രമാണ്​ സൗകര്യം ലഭ്യമാകുക. ​

വെള്ളിയാഴ്ച മൂന്ന്​ ലക്ഷം ഡോസ്​ കോവിഡ്​ വാക്​സിന്​ ലഭ്യമായതിനാൽ മഹാരാഷ്​ട്രയിലെ ചില ജില്ലകളിൽ കുത്തിവെപ്പ്​ തുടങ്ങും​. പൂനെ, മുംബൈ, താനെ എന്നിവിടങ്ങളിലേക്ക്​ 20,000 ഡോസ്​ വീതം നൽകി. മറ്റിടങ്ങളിലേക്ക്​ 3000 മുതൽ 10000 ഡോസുകൾ വരെയാണ്​ നൽകിയത്​.

കോവിഡ്​ ഏറ്റവും രൂക്ഷമായി ബാധിച്ച നഗരങ്ങളിൽ ഒന്നായ മുംബൈയിൽ കോവിഡ്​ വാക്​സിനേഷൻ കേന്ദ്രങ്ങൾ മൂന്ന്​ ദിവസം അടച്ചിടുകയാണെന്ന്​ അധികൃതർ അറിയിച്ചിരുന്നു. വാക്​സിന്​ ഡോസ്​ തികയാതെ വന്നതോടെയാണ്​ വെള്ളിയാഴ്ച മുതൽ വാക്​സിനേഷൻ കേന്ദ്രങ്ങൾ പ്രവർത്തിപ്പിക്കേണ്ടെന്ന്​ തീരുമാനിച്ചതെന്ന്​ പ്രാദേശിക ഭരണകൂടം വാർത്താ കുറിപ്പിൽ അറിയിച്ചു.

ഉത്തർപ്രദേശിലെ 75 ജില്ലകളിൽ ഏഴിടത്ത്​ മാത്രമാണ്​ 18ന്​ മുകളിലുള്ളവർക്കുള്ള വാക്​സിനേഷൻ ആരംഭിച്ചത്​. ലഖ്​നോ, കാൺപൂർ, പ്രയാഗ്​രാജ്​, വാരണാസി, ഖോരക്​പൂർ, മീററ്റ്​, ബറേലി ജില്ലകളിലാണ്​ യജ്ഞം ആരംഭിക്കുന്നത്​.

രാജസ്​ഥാനിൽ അജ്​മീർ, ജയ്​പൂർ, ജോധ്​പൂർ എന്നിവിടങ്ങളിൽ മാത്രമാണ്​ വാക്​സിനേഷൻ ഉണ്ടാകുക. ഗുജറാത്തിലെ 33 ജില്ലകളിൽ 10 ഇടങ്ങളിൽ മാത്രമാണ്​ 18ന്​ മുകളിലുള്ളവർക്ക്​ വാക്​സിനെടുക്കാൻ സാധിക്കുക. കഴിഞ്ഞ ദിവസം വൈകീട്ട്​ 1.5 ലക്ഷം കോവാക്​സിൻ ലഭിച്ചതിനാൽ ഒഡീഷ സർക്കാർ ഇന്ന്​ വാക്​സിനേഷൻ ആരംഭിക്കും.

ചത്തിസ്​ഗഢ് സർക്കാറും വാക്​സിനേഷൻ ആരംഭിച്ചിട്ടുണ്ട്​. എന്നാൽ അന്ത്യോദയ കാർഡ്​ ഉള്ളവർക്കും പിന്നോക്കാവസ്​ഥയിലുള്ള ആദിവാസികൾക്കുമാകും ഘട്ടത്തിൽ കൂടുതൽ പരിഗണന ലഭിക്കുക.

മതിയായ വാക്​സിൻ ഡോസുകൾ ഇതുവരെ ലഭ്യമാകാത്തിനാൽ 18 വയസ്​ മുതൽ 44 വയസ്സുവരെ പ്രായമുള്ളവർ മേയ്​ ഒന്നിന്​ വാക്​സിൻ കേന്ദ്രത്തിൽ എത്തേണ്ടതില്ലെന്ന്​ ഡൽഹി മുഖ്യമന്ത്രി അരവിന്ദ്​ കെജ്​രിവാൾ അറിയിച്ചിരുന്നു.

രണ്ട്​ ദിവസത്തിനകം മൂന്ന്​ ലക്ഷം ഡോസ്​ കോവിഡീൽഡ്​ വാക്​സിൻ എത്തുമന്നും അതിന്​ ശേഷം കുത്തിവെപ്പ്​ തുടങ്ങുമെന്നും അദ്ദേഹം വ്യക്തമാക്കി.

കേരളം, പഞ്ചാബ്​, ഉത്തരാഖണ്ഡ്​, ആന്ധ്ര പ്രദേശ്​, ഡൽഹി എന്നീ സംസ്​ഥാനങ്ങൾ വാക്​സിൻ ക്ഷാമം മൂലം ഇപ്പോൾ 18ന് ​മുകളിലുള്ളവർക്ക്​ വാക്​സിനേഷൻ നടത്താനാകില്ലെന്ന്​ അറിയിച്ചിരുന്നു.

ഇന്ന്​ വാക്​സിനേഷൻ ആരംഭിക്കില്ലെന്ന്​ അസം, തെലങ്കാന, തമിഴ്​നാട്​, കർണാടക ​എന്നീ സംസ്​ഥാനങ്ങളും വ്യക്തമാക്കി. പശ്ചിമ ബംഗാളിൽ മെയ്​ അഞ്ച്​ മുതലാണ്​ 18ന്​ മുകളിൽ പ്രായമായാവർക്കുള്ള വാക്​സിനേഷൻ ആരംഭിക്കുന്നത്​.