കോവിഡ്​ ചികിത്സയിൽ നിന്ന്​ ചില മരുന്നുകളെ ഒഴിവാക്കി

ന്യൂഡൽഹി: കോവിഡ്​ രോഗികളെ ചികിത്സിക്കുന്നതിനുള്ള മാർഗനിർദേശം പുതുക്കി കേന്ദ്രസർക്കാർ. കോവിഡ്​ ​രോഗികൾക്ക്​ നൽകുന്ന ചില മരുന്നുകൾ ഒഴിവാക്കിയാണ്​ ഡയറക്​ട​റേറ്റ്​ ജനറൽ ഓഫ്​ ഹെൽത്ത്​ സർവീസി​െൻറ ഉത്തരവ്​. ഹൈഡ്രോക്​സിക്ലോറക്വീൻ, ഐവർമെക്​ടിൻ, ഡോക്​സിസൈക്ലീൻ, സിങ്​ക്​ തുടങ്ങിയ മരുന്നുകളാണ്​ ഒഴിവാക്കിയത്​. സി.ടി സ്​കാൻ ആവശ്യമെങ്കിൽ മാത്രം നടത്തിയാൽ മതിയാകുമെന്നും നിർദേശത്തിൽ പറയുന്നു.

രോഗലക്ഷണമില്ലാത്തവർക്കും ചെറിയ രോഗലക്ഷണമുള്ളവർക്കും മരുന്ന്​ നൽകേണ്ടെന്നാണ്​ കേന്ദ്രസർക്കാർ പറയുന്നത്​. ചെറിയ രോഗലക്ഷണമുള്ള കോവിഡ്​ രോഗികൾ സ്വയം നിരീക്ഷണത്തിൽ കഴിഞ്ഞാൽ മതിയാകും. ഇവർക്ക്​​ രോഗലക്ഷണങ്ങൾ പ്രകടമാവുകയാണെങ്കിൽ മാത്രം മരുന്ന്​ നൽകിയാൽ മതിയാകും. ആശുപത്രിയിൽ ചികിത്സയിലുള്ള ഗുരുതര രോഗികൾക്ക്​ മാത്രം റെംഡസിവീർ മരുന്ന്​ നൽകിയാൽ മതിയാകുമെന്നും ഉത്തരവിൽ പറയുന്നു.

ചെറിയ രോഗലക്ഷണമുള്ളവർക്ക്​ സ്​റ്റിറോയിഡി​െൻറ ആവശ്യമില്ല. സ്​റ്റിറോയിഡ്​ ഉപയോഗം ഇത്തരക്കാരിൽ ശരീരത്തിന്​ ഹാനികരമാവുമെന്നും ഉത്തരവിൽ വ്യക്​തമാക്കുന്നു.