രഞ്ജൻ ഗൊഗോയിയുടെ രാജ്യസഭ നാമനിർദേശം ചോദ്യംചെയ്ത ഹരജി സുപ്രീംകോടതി തള്ളി

ന്യൂഡൽഹി: മുൻ ചീഫ് ജസ്റ്റിസ് രഞ്ജൻ ഗൊഗോയിയെ രാജ്യസഭയിലേക്ക് സർക്കാർ നാമനിർദേശം ചെയ്തത് ചോദ്യം ചെയ്ത് സമർപ്പിച്ച പൊതുതാൽപര്യ ഹരജി സുപ്രീംകോടതി തള്ളി. പ്രശസ്തിക്കുവേണ്ടിയാണ് ഹരജിയെന്ന് ചൂണ്ടിക്കാട്ടി ജസ്റ്റിസുമാരായ സഞ്ജയ് കിഷൻ കൗൾ, അഭയ് എസ്. ഓഖ എന്നിവരടങ്ങിയ ബെഞ്ചാണ് തള്ളിയത്. രാജ്യസഭയിലേക്ക് നാമനിർദേശം ചെയ്യാൻമാത്രം യോഗ്യനല്ല മുൻ ചീഫ് ജസ്റ്റിസെന്ന് ഹരജിക്കാരന്റെ അഭിഭാഷകൻ സതീഷ് എസ്. കാമ്പിയെ വാദിച്ചു. ആരാണ് യോഗ്യത നിശ്ചയിക്കുകയെന്ന് ചോദിച്ച ബെഞ്ച് ഈ ഹരജിക്ക് പ്രസക്തിയില്ലെന്നും വ്യക്തമാക്കി.

ഗൊഗോയിയെ 2020 മാർച്ച് 16നാണ് സർക്കാർ രാജ്യസഭയിലേക്ക് നാമനിർദേശം ചെയ്തത്. രാജ്യസഭയിലേക്ക് നാമനിർദേശം ചെയ്യപ്പെടുന്ന ഇന്ത്യയുടെ ആദ്യ മുൻ ചീഫ് ജസ്റ്റിസാണ് അദ്ദേഹം. നേരത്തെ മുൻ ചീഫ് ജസ്റ്റിസ് രംഗനാഥ് മിശ്ര രാജ്യസഭാംഗമായിരുന്നെങ്കിലും കോൺഗ്രസ് ടിക്കറ്റിലാണ് തെരഞ്ഞെടുക്കപ്പെട്ടത്