ഉന്നത സ്ഥാപനങ്ങളിൽ മുസ്‍ലിം വിദ്യാർഥികളുടെ എണ്ണം കൂടി -വിദ്യാഭ്യാസ മന്ത്രാലയം

ഡൽഹി: ഉന്നത വിദ്യാഭ്യാസ സ്ഥാപനങ്ങളിൽ ചേരുന്ന മുസ്‍ലിം വിദ്യാർഥികളുടെ എണ്ണം 2016-2021 കാലയളവിൽ വർധിച്ചതായി കേന്ദ്ര വിദ്യാഭ്യാസ സഹമന്ത്രി സുഭാഷ് സർക്കാർ രാജ്യസഭയെ അറിയിച്ചു. 2016-17 കാലയളവിൽ ഉന്നത വിദ്യാഭ്യാസ സ്ഥാപനങ്ങളിൽ ചേരുന്ന മുസ്‍ലിം വിദ്യാർഥികളുടെ എണ്ണം 17.39 ലക്ഷം ആയിരുന്നെങ്കിൽ 2020-21 കാലയളവിൽ 19.22 ലക്ഷമായി ഉയർന്നു.

സമാനമായി മുസ്‍ലിം സമുദായത്തിൽ നിന്നുള്ള അധ്യാപകരുടെ എണ്ണത്തിലും വർധനവുണ്ട്. 2016-17 കാലയളവിൽ 67,215 അധ്യാപകരാണ് ഉണ്ടായിരുന്നതെങ്കിൽ 2020-21 കാലയളവിൽ 86,314 ആയി വർധിച്ചു. അഖിലേന്ത്യ ഉന്നത വിദ്യാഭ്യാസ സർവേ (എ.ഐ.എസ്.എച്ച്.ഇ) 2020-21ലെ കണക്കുകൾ ഉദ്ധരിച്ചാണ് മന്ത്രി രേഖാമൂലമുള്ള ചോദ്യത്തിന് മറുപടി നൽകിയത്.

മുസ്‍ലിം, ക്രിസ്ത്യൻ, ബുദ്ധ, ജൈന, സിഖ്, സൊരാഷ്ട്രിയൻ ന്യൂനപക്ഷ വിഭാഗങ്ങളിലെ വിദ്യാർഥികൾക്കായി കേന്ദ്ര സർക്കാർ മൂന്ന് വിദ്യാഭ്യാസ ശാക്തീകരണ പദ്ധതികൾ നടപ്പാക്കുന്നതായും മന്ത്രി അറിയിച്ചു.