രാജ്യത്ത്​ പ്രതിദിന കോവിഡ്​ രോഗികളുടെ എണ്ണം അഞ്ച്​ ലക്ഷമായി ഉയർന്നാലും നേരിടാൻ തയാറെന്ന്​ കേന്ദ്രം

ന്യൂഡൽഹി: രാജ്യത്ത്​ പ്രതിദിന കോവിഡ്​ രോഗികളുടെ എണ്ണം അഞ്ച്​ ലക്ഷമായി ഉയർന്നാലും നേരിടാൻ തയാറെന്ന്​ കേന്ദ്രം​. നീതി ആയോഗ്​ അംഗം വി.കെ.പോളാണ്​ ഇക്കാര്യം അറിയിച്ചത്​. മൂന്നാംതരംഗം എത്രത്തോളം തീവ്രമായിരിക്കുമെന്ന്​ ഇപ്പോൾ പറയാനാകില്ല. 71 ശതമാനം പേർക്ക്​ ഇതുവരെ ഒന്നാം ഡോസ്​ വാക്​സിൻ നൽകിയിട്ടുണ്ടെന്നും അദ്ദേഹം പറഞ്ഞു.

രാജ്യത്ത്​ 34 ജില്ലകളിൽ ടെസ്റ്റ്​ പോസിറ്റിവിറ്റി നിരക്ക്​ 34 ശതമാനത്തിനും മുകളിലാണ്​. 28 ജില്ലകളിൽ അഞ്ചിനും പത്തിനും ഇടയിലാണ്​ പോസിറ്റിവിറ്റി നിരക്ക്​. രാജ്യത്ത്​ ഉത്സവസീസൺ ആരംഭിക്കാനിരിക്കെ ജനങ്ങൾ ജാഗ്രത പുലർത്തണമെന്ന്​ ആരോഗ്യമന്ത്രാലയം ജോയിന്‍റ്​ സെക്രട്ടറി ലവ്​ അഗർവാൾ ആവശ്യപ്പെട്ടു.

ആഘോഷങ്ങൾ പരമാവധി വീട്ടിലാക്കണമെന്ന്​ കേന്ദ്രസർക്കാർ നിർദേശിച്ചു. വാക്​സിനെടുക്കാനും എല്ലാവരും ശ്രദ്ധിക്കണമെന്നും അദ്ദേഹം നിർദേശിച്ചു. ലക്ഷദ്വീപ്​, ഛണ്ഡിഗഢ്​, ഗോവ, ഹിമാചൽ​പ്രദേശ്​, ആൻഡമാൻ&നിക്കോബാർ, സിക്കിം തുടങ്ങിയ സംസ്ഥാനങ്ങളിൽ 100 ശതമാനം പേർക്കും വാക്​സിൻ നൽകിയെന്ന്​ കേന്ദ്രസർക്കാർ അറിയിച്ചു.