രോഗിയുമായി പറന്നുയർന്ന എയർ ആംബുലൻസിൻന്‍റെ ചക്രം ഊരിത്തെറിച്ചു; അപകടമൊഴിവാക്കി മുംബൈയിൽ 'ബെല്ലി ലാൻഡിങ്​'- വിഡിയോ കാണാം

മുംബൈ: നാഗ്​പൂരിൽനിന്ന്​ രോഗിയെയും വഹിച്ച്​ പറന്നുപൊങ്ങുന്നതിനിടെ ചക്രം ഊരിത്തെറിച്ച എയർ ആംബുലൻസ്​ മുംബൈ വിമാനത്താവളത്തിൽ ബെല്ലി ലാൻഡിങ്​ (പള്ളകുത്തി ഇറക്കൽ) നടത്തി ദുരന്തമൊഴിവാക്കുന്ന വിഡിയോ വൈറൽ. ബീച്ച്​ക്രാഫ്​റ്റ്​ വി.ടി-ജെ.​െഎ.എൽ വിമാനമാണ്​ ഒരു രോഗിയും ഒരു കൂട്ടിരിപ്പുകാരും രണ്ട്​ വൈമാനികരുമായി പറന്നുയർന്നത്​. ചക്രം ഊരിത്തെറിച്ചത്​ ശ്രദ്ധയിൽപെട്ട ഉടൻ മുംബൈ വിമാനത്താവളത്തിൽ വിളിച്ച്​ അടിയന്തര ലാൻഡിങ്ങിന്തി തേടുകയായിരുന്നു.

ചക്രമില്ലാതെ ഇറങ്ങുന്നതിനാൽ വിമാനം ഉരസി തീപിടിക്കാൻ സാധ്യത കണക്കിലെടുത്ത്​ ആവശ്യമായ സുരക്ഷ മുൻകരുതൽ സ്വീകരിച്ചിരുന്നു. ഫോമിങ്​ നടത്തിയ റൺവേയിൽ വലിയ ശബ്​ദത്തോ​ടെ അമിത വേഗത്തിൽ നിലംതൊട്ട എയർ ആംബുലൻസ്​ ഏറെ ദൂരം ഓടിയ ശേഷം യാത്ര അവസാനിപ്പിച്ചു. യാത്രക്കാർ സുരക്ഷിതരായിരുന്നു.

ഒരു ദിവസം കഴിഞ്ഞ്​ സമൂഹ മാധ്യമങ്ങളിൽ പ്രചരിച്ച വിഡിയോ വൈറലാണ്​. വൈമാനികന്‍റെ മനഃസാന്നിധ്യമാണ് തുണയായതെന്നും ക്യാപ്​റ്റൻ കേസരി സിങ്ങിനെ അഭിനന്ദിക്കുന്നതായും മന്ത്രി ഹർദീപ്​ സിങ്​ പുരി പറഞ്ഞു.