മോദിയെ പുകഴ്ത്തി 'ലോക്കൽ' ഗാർഡിയൻ; പാരഡി പൊളിച്ചടുക്കി ട്വിറ്ററാറ്റികൾ​

ന്യൂഡൽഹി: കോവിഡ്​ രണ്ടാം തരംഗത്തെ നേരിടുന്നതിലെ പിടിപ്പുകേടുകൊണ്ട്​ രൂക്ഷ വിമർശനം ഏറ്റുവാങ്ങുകയാണ്​ പ്രധാനമന്ത്രി നരേന്ദ്രമോദി. അന്താരാഷ്​ട്ര മാധ്യമങ്ങളടക്കം നരേന്ദ്ര മോദി സർക്കാറിനെ വിമർശിച്ച്​ രംഗത്തെത്തി.

ഇൗ സാഹചര്യത്തിൽ കോവിഡ്​ പ്രതിരോധ പ്രവർത്തനത്തിൽ 'കഠിനാധ്വാനം' ചെയ്യുന്ന മോദിജിയെ പ്രകീർത്തിച്ച്​ 'ദ ഡെയ്​ലി ഗാർഡിയൻ' പ്രസിദ്ധീകരിച്ച ലേഖനം ഉയർത്തി പിടിക്കുകയായിരുന്നു മന്ത്രിമാരടക്കമുള്ള ബി.ജെ.പി അനുകൂല സോഷ്യൽ മീഡിയ അക്കൗണ്ടുകൾ.

ഇത്​ വരെ കേട്ടുകേൾവി പോലുമില്ലാത്ത മാധ്യമ സ്​ഥാപനമാണ്​ ദ ഡെയ്​ലി ഗാർഡിയൻ. യു.കെ ആസ്​ഥാനമായ ഒറിജിനൽ ഗാർഡിയന്​ ഇതുമായി പുലബന്ധം പോലുമില്ല. അന്താരാഷ്​ട്ര മാധ്യമങ്ങളിലൊന്ന്​​ മോദിയെ പ്രശംസിച്ചുവെന്ന്​ കുറച്ച്​ പേരെയെങ്കിലും വിശ്വസിപ്പിക്കാൻ ലേഖനം കൊണ്ട്​ ബി.ജെ.പിക്കായി. എന്നാൽ ഇതിനെ പൊളിച്ചടുക്കിക്കൊണ്ട്​ രംഗത്തെത്തിയിരിക്കുകയാണ്​ ട്വിറ്ററാറ്റികൾ.

പാർട്ടിക്കായി ടി.വി സംവാദങ്ങളിൽ പ​ങ്കെടുക്കുന്നയാളു​ം ബി.ജെ.പിയുടെ മീഡിയ റിലേഷൻസ്​ ഡിപാർഡ്​മെന്‍റ്​ കൺവീനറുമായ സുധേഷ്​ വർമയാണ്​ ലേഖനം എഴുതിയിരിക്കുന്നതെന്ന്​ ആൾട്​ ന്യൂസ്​ റിപ്പോർട്ട്​ ചെയ്യുന്നു.

രാജ്യത്തിന്‍റെ നന്മക്കായി നരേന്ദ്ര മോദി നിശബ്​ദനായി കോവിഡിനെതിരെ പട നയിക്കുകയാണെന്നാണ്​ ലേഖനം പറഞ്ഞുവെക്കുന്നത്​. മുഖ്യമന്ത്രിമാർ അനാവശ്യമായി ഓരോ ആരോപണങ്ങൾ ഉന്നയിക്കുകയാണെന്നും പറയുന്നു. മുമ്പുണ്ടായിരുന്ന കോൺഗ്രസ്​ സർക്കാറുകൾ രാജ്യത്തെ ആരോഗ്യ രംഗത്തെ അടിസ്​ഥാന സൗകര്യ വികസനങ്ങൾക്കായി ഒന്നും ചെയ്​തില്ലെന്നും വിമർശകർ മോദിയുടെ മുഖത്ത്​ കരിവാരിത്തേക്കാൻ ശ്രമിക്കുകയാണെന്നുമാണ്​ ലേഖനത്തിൽ പറയുന്നത്​.

ബി.ജെ.പി ഐ.ടി സെൽ തലവൻ അമിത്​ മാളവ്യ, കേന്ദ്ര മന്ത്രി കിരൺ റിജിജു, ബി.ജെ.പി എം.പി ഡോ. ജിതേന്ദ്ര സിങ്​ എന്നിവരെ കൂടാതെ നിരവധി കേന്ദ്ര മന്ത്രിമാരും ലേഖനം സോഷ്യൽ മീഡിയയിൽ പങ്കുവെച്ചിരുന്നു. ഇന്ത്യ ഇപ്പോൾ നേരിടുന്ന പ്രതിസന്ധിക്ക്​ മോദി ഒഴികെ മറ്റെല്ലാവരും ഉത്തരവാദികളാണെന്ന്​ ലേഖകൻ സ്​ഥാപിക്കാൻ ശ്രമിക്കുന്നുണ്ട്​.

'സൺഡേ ഗാർഡിയ'ന്‍റെ ഉടമസ്​ഥരായ ഐ.ടി.വി നെറ്റ്​വർക്കാണ്​ ഈ ഫെബ്രുവരിയിൽ ദ ഡെയ്​ലി ഗാർഡിയൻ ആരംഭിച്ചത്​. പ്രശസ്​ത മാധ്യമപ്രവർത്തകനും കേന്ദ്രമന്ത്രിയുമായിരുന്ന എം.ജെ.അക്​ബറാണ് സൺഡേ ഗാർഡിയൻ തുടങ്ങിയത്​. ന്യൂസ്​ എക്​സിന്‍റെ മാതൃസ്​ഥാപനമാണ്​ ഐ.ടി.വി നെറ്റ്​വർക്ക്​. ഓൺ​ൈലൻ പത്രമായ ദ ഡെയ്​ലി ഗാർഡിയന്​ പ്രിന്‍റ്​ എഡിഷനില്ല. വെബ്​സൈറ്റിന്‍റെ ഡൊമൈൻ 2007ൽ രജിസ്റ്റർ ചെയ്​തെങ്കിലും 2020ലാണ്​ ട്വിറ്റർ അക്കൗണ്ട്​ തുടങ്ങിയത്​. യൂട്യൂബിൽ വെറും 43 സബ്​സ്​ക്രൈബേഴ്​സ്​ മാത്രമാണുള്ളത്​. ഇതുവരെ യൂട്യബ്​ ചാനലിൽ ഒരു വിഡിയോ പോലും പങ്കു​െവച്ചിട്ടില്ല.