രാമക്ഷേത്രത്തിൽ പ്രാർഥിച്ച്​ യു.പി തെരഞ്ഞെടുപ്പ്​ ​പ്രചാരണത്തിന്​ തുടക്കമിട്ട്​ ആം ആദ്​മി പാർട്ടി

അയോധ്യ: ഉത്തർപ്രദേശിൽ അടുത്തവർഷം നടക്കുന്ന നിയമസഭാ തെരഞ്ഞെടുപ്പിനായുള്ള പ്രചാരണത്തിന്​ തുടക്കമിട്ട്​ ആം ആദ്​മി പാർട്ടി​. എ.എ.പി നേതാക്കളായ മനീഷ് സിസോദിയയും സഞ്ജയ് സിങ്ങും അയോധ്യയിലെ രാമജന്മഭൂമിയിലും ഹനുമാനഗരി ക്ഷേത്രത്തിലും പ്രത്യേക പ്രാർത്ഥന നടത്തിയാണ്​ പ്രചാരണം ആരംഭിച്ചത്​.

ചൊവ്വാഴ്ച ഫൈസാബാദിൽ ആം ആദ്മി പാർട്ടിയുടെ തിരംഗ യാത്രക്കും ഇരുവരും നേതൃത്വം നൽകും. 18ാം നൂറ്റാണ്ടിലെ നവാബ് ഷുജാവുദ്ദൗലയുടെ മഖ്ബറയിൽനിന്ന് ആരംഭിച്ച് നഗരത്തിലെ ഗാന്ധി പാർക്കിൽ യാത്ര അവസാനിക്കും.

ഡൽഹി ഉപമുഖ്യമന്ത്രി മനീഷ് സിസോദിയയും ഉത്തർപ്രദേശിന്‍റെ ചുമതലയുള്ള സഞ്ജയ് സിങ്ങും ക്ഷേത്രത്തിൽവെച്ച്​ മന്ത്രോച്ചാരണങ്ങൾ ഉരുവിട്ടാണ്​ പ്രാർത്ഥന നിർവഹിച്ചത്​. കൂടാതെ സരയൂ നദിയിൽ മുങ്ങുകയും സാധുക്കളോടൊപ്പം ഉച്ചഭക്ഷണം കഴിക്കുകയും ചെയ്​തു.

ഉത്തർപ്രദേശിൽ രാമരാജ്യം സ്ഥാപിക്കാൻ ശ്രീരാമനോടും എ.എ.പിയെ അനുഗ്രഹിക്കാൻ ഹനുമാനോടും പ്രാർത്ഥിച്ചതായി സിസോദിയ പറഞ്ഞു. അതുവഴി ഉത്തർപ്രദേശിൽ ആപ്പ്​ സർക്കാർ രൂപീകരിക്കാനും സംസ്ഥാനത്തെ ജനങ്ങൾക്ക് ഡൽഹിയിലെ പോലെ നല്ല വിദ്യാഭ്യാസം, ഗുണമേന്മയുള്ള ആരോഗ്യ സേവനങ്ങൾ, വൈദ്യുതി, വെള്ളം, തൊഴിൽ എന്നിവ നേടാനും കഴിയുമെന്ന്​ അദ്ദേഹം കൂട്ടിച്ചേർത്തു.

'ശുദ്ധമായ ഭരണത്തിനും ഭരണനിർവഹണത്തിനുമുള്ള ഏറ്റവും വലിയ പ്രചോദനം രാമരാജ്യമാണ്. ശ്രീരാമന്‍റെയും വിശുദ്ധരുടെയും അനുഗ്രഹവും കൊണ്ട് ഡൽഹി മുഖ്യമന്ത്രി അരവിന്ദ് കെജ്​രിവാളിന്‍റെ നേതൃത്വത്തിലുള്ള ആം ആദ്മി പാർട്ടി സത്യസന്ധതയുടെയും വികസനത്തിന്‍റെയും പുതിയ നിർവചനമായി മാറുകയാണ്. തിരംഗ യാത്ര അത്തരം രാഷ്​ട്രീയത്തിന് പുതിയ മാനം നൽകും. ശ്രീരാമചന്ദ്ര ജിയുടെ അനുഗ്രഹത്തോടെ ഞങ്ങൾ ത്രിവർണ്ണപതാക ഉയർത്തുകയും യഥാർത്ഥ ദേശീയത പഠിപ്പിക്കുകയും ചെയ്യും' -സിസോദിയ പറഞ്ഞു.

അയോധ്യയിൽനിന്ന് ആപ്പ്​ ഉത്തർപ്രദേശിലെ തെരഞ്ഞെടുപ്പ്​ പ്രചാരണം ആരംഭിക്കുന്നതിൽ ഏറെ പ്രാധാന്യമുണ്ട്​. ബി.ജെ.പി, എസ്​.പി, ബി.എസ്.പി അടക്കമുള്ള രാഷ്​ട്രീയ പാർട്ടികളും 2022ലെ തെരഞ്ഞെടുപ്പിനുള്ള പ്രചാരണം ഇവിടെനിന്നാണ്​ ആരംഭിച്ചത്​. കോടതി വിധിയുടെ അടിസ്​ഥാനത്തിൽ അയോധ്യയിൽ രാമക്ഷേത്രത്തിന്‍റെ നിർമാണം പുരോഗമിക്കുകയാണ്​.