ഒഴുക്കൻ ഇംഗ്ലീഷ്​ പരസ്യവുമായി ബന്ധമി​ല്ലെന്ന്​ തരൂർ; ഇംഗ്ലീഷ്​ സംസാരിക്കുന്നതിന്‍റെ രഹസ്യം വെളിപ്പെടുത്തണമെന്ന്​ സോഷ്യൽ മീഡിയ

ഇംഗ്ലീഷ്​ പഠിപ്പിക്കുന്ന ആപിന്‍റെ പരസ്യവാചകമിങ്ങനെ: 'ശശിതരൂരിനെ പോലെ ഒഴുക്കൻ ഇംഗ്ലീഷ്​ സംസാരിക്കാം'. പരസ്യത്തിൽ അദ്ദേഹത്തിന്‍റെ ഫോ​േട്ടായുമുണ്ട്​. ഈ പരസ്യത്തിന്‍റെ സ്​ക്രീൻ ഷോ​ട്ട്​ സഹിതം 'തനിക്ക്​ ഇതുമായി ഒരു ബന്ധവുമില്ലെ'ന്ന്​ ശശി തരൂർ തന്നെ ട്വീറ്റ്​ ചെയ്​തതോടെ ചർച്ച ഏറ്റെടുത്തിരിക്കുകയാണ്​ സോഷ്യൽ മീഡിയ. തന്‍റെ പേരും ഫോ​േട്ടായും ഉപയോഗിച്ചതിന്​ നിയമനടപടി കൈകൊള്ളുമെന്നും തരൂർ ട്വീറ്റ്​ ചെയ്​തു.

എഴുത്തുകാരനും കോൺഗ്രസ്​ നേതാവുമായ ശശി തരൂരിന്​ ഇംഗ്ലീഷ്​ ഭാഷയിലുള്ള അവഗാഹം പ്രസിദ്ധമാണ്​. പൊതു സമൂഹത്തിന്​ പരിചിതമല്ലാത്ത വാക്കുകളും പ്രയോഗങ്ങളും പരിചയപ്പെടുത്തി ഏറെ കയ്യടി നേടിയയാൾ കൂടിയാണ്​ തരൂർ.

'നിരവധി വിദ്യാർഥികൾ അബദ്ധത്തിൽ ചാടിയപ്പോഴാണ്​ ഇത്​ (പരസ്യം) എന്‍റെ ശ്രദ്ധയിൽ പെടുന്നത്​. ഈ ആപുമായി എനിക്കൊരു ബന്ധവുമില്ലെന്ന്​ വ്യക്​തമാക്കുകയാണ്​. എന്‍റെ പേരും ചിത്രവും വാണിജ്യ ആവശ്യത്തിന്​ ഉപയോഗിക്കുന്നതിനെതിരെ നിയമ നടപടി കൈകൊള്ളും' - തരൂർ ട്വീറ്റ്​ ചെയ്​തു. ബ്ലാക്ക്​ബോർഡ്​ റേഡിയോ എന്ന ആപിന്‍റെ പരസ്യചിത്രവും കൂടെ ചേർത്തിട്ടുണ്ട്​.

തരൂരിന്‍റെ ട്വീറ്റിനെ തുടർന്ന്​ വ്യത്യസ്​ത പ്രതികരണമാണ്​ സാമൂഹിക മാധ്യമങ്ങളിൽ നിറഞ്ഞത്​. തരൂരിനെ ഉദാഹരണമായി ചൂണ്ടികാണിക്കുക മാത്രമാണ്​ പരസ്യത്തിൽ ചെയ്​തതെന്ന്​ ചിലർ ചൂണ്ടികാട്ടി. ഇംഗ്ലീഷ്​ പഠിപ്പിക്കുന്ന ആപ്​ ശശി തരൂർ തന്നെ തുടങ്ങണമെന്ന ആവശ്യവും ചിലർ ഉന്നയിച്ചു.

തരൂർ യുവജനങ്ങൾക്ക്​ പ്രചോദനമാണെന്നും ഒരു മാതൃകയായി അവതരിപ്പിക്കുക മാത്രമാണ്​ ചെയ്​തതെന്നും ചിലർ പരസ്യത്തെ ന്യായീകരിച്ചു.

തരൂർ ഒഴുക്കൻ ഇംഗ്ലീഷ്​ സംസാരിക്കുന്നതിന്​ പിന്നിലെ യഥാർഥ രഹസ്യം തേടിയും ചിലർ കമന്‍റ്​ ചെയ്​തിട്ടുണ്ട്​. 'ശരിക്കും തരൂരിനെ പോലെ എങ്ങനെയാണ്​ ഇംഗ്ലീഷ്​ സംസാരിക്കുക. താങ്കൾക്ക്​​ മാത്രമാണ്​ ആ ചോദ്യത്തിന്​ ഉത്തരം പറയാനാകുക' - ഒരാൾ തരൂരിനോട്​ ആവശ്യപ്പെട്ടു.