നന്ദി, എല്ലാ ഡോക്​ടർമാർക്കും നന്ദി, ജീവത്യാഗം ചെയ്​തവർക്ക്​ ആദരാഞ്​ജലികൾ -മോദി

ഡോക്​ടേഴ്​സ്​ ഡേയിൽ രാജ്യത്തെ ആരോഗ്യമേഖലയിലുള്ളവരെ അഭിസംബോധന ചെയ്​ത്​ പ്രധാനമന്ത്രി നരേന്ദ്ര മോദി. ഇന്ത്യൻ മെഡിക്കൽ അസോസിയേഷൻ സംഘടിപ്പിച്ച ചടങ്ങിലാണ്​ മോദി സംസാരിച്ചത്​. പകർച്ചവ്യാധിയുടെ കാലത്ത്​ രാജ്യത്തെ സേവിച്ച എല്ലാ ആരോഗ്യ പ്രവർത്തരേയും അദ്ദേഹം അഭിനന്ദിച്ചു.

ഇൗ വിഷമകാലത്തും രാപകൽ രോഗികളെ ശുശ്രൂഷിച്ച ഡോക്​ടർമാർക്ക്​ അദ്ദേഹം നന്ദിപറഞ്ഞു. 'രാജ്യത്തെ 130 കോടി ജനങ്ങൾക്കുവേണ്ടി ഞാൻ എല്ലാ ഡോക്​ടർമാർക്കും നന്ദി പറയുന്നു'-മോദി പറഞ്ഞു. സേവനത്തിനിടയിൽ ജീവത്യാഗം ചെയ്​തവർക്ക്​ പ്രധാനമന്ത്രി ആദരാഞജലികൾ അർപ്പിച്ചു.

കോവിഡ്​ കാലത്ത്​ വികസിത രാജ്യങ്ങളെ അപേക്ഷിച്ച് ഇന്ത്യയുടെ അവസ്ഥ സുസ്ഥിരമായിരുന്നെന്നും അദ്ദേഹം പറഞ്ഞു. ആരോഗ്യമേഖലയുടെ വികസനത്തിന്​ 50,000 കോടിയുടെ പദ്ധതിയും പ്രഖ്യാപിച്ചിട്ടുണ്ട്​. കുട്ടികളുടെ ആരോഗ്യ സംവിധാനങ്ങൾ വികസിപ്പിക്കുന്നതിന്​ 22,000 കോടി അനുവദിച്ചതായും പ്രധാനമന്ത്രി പറഞ്ഞു.

യോഗയുടെ പ്രാധാന്യത്തെക്കുറിച്ചും പ്രധാനമന്ത്രി ത​െൻറ പ്രസംഗത്തിൽ ഉൗന്നിപ്പറഞ്ഞു. ആരോഗ്യവുമായി യോഗക്ക്​ അഭേദ്യമായ ബന്ധം ഉണ്ടെന്നും അദ്ദേഹം പറഞ്ഞു. 'ഡോക്ടർമാർ യോഗ പഠിക്കാൻ തയ്യാറായാൽ ലോകം മുഴുവൻ അതിനെ കൂടുതൽ ഗൗരവമായി കാണും. ഐ‌എം‌എയ്ക്ക് ഈ പഠനങ്ങളെ ഒരു ദൗത്യം എന്ന നിലയിൽ മുന്നോട്ട് കൊണ്ടുപോകാൻ കഴിയുമോ'-മോദി ചോദിച്ചു.