You are here

കോവിഡി​​െൻറ മറവിൽ അവർ മുസ്​ലിം വീടുകളും കടകളും ചു​ട്ടെരിച്ചു

20:41 PM
18/05/2020
തെലിനിപാറയിൽ അക്രമികൾ കത്തിച്ച വീടുകൾ (ഫോട്ടോ: ഹിമാദ്രി ഘോഷ്, ദി വയർ)

തെലിനിപാറ (പശ്ചിമ ബംഗാൾ): കോവിഡിനെ നേരിടാൻ ലോകം കൈമെയ്​ മറന്ന്​ പൊരുതു​മ്പോഴും വർഗീയ വൈറസുകൾ അടങ്ങിയിരിക്കുന്നില്ല. ഇൗ ലോക്​ഡൗൺ കാലത്തും അപരനെ ഇല്ലായ്​മ ചെയ്യാൻ സർവ സന്നാഹങ്ങളും ഒരുക്കി കാത്തിരിക്കുകയാണ്​ കണ്ണിൽചോരയില്ലാത്ത ഈ കൂട്ടർ. ഇത്തരമൊരു 'ഓപറേഷനാണ്​ ' മേയ്​ 10, 12 തീയതികളിൽ​ പശ്ചിമ ബംഗാളിലെ തെലിനിപാറയിലും അരങ്ങേറിയത്​. 

ആസൂത്രിതമായ വർഗീയ ആക്രമണമാണ്​ അവിടെ അരങ്ങേറിയതെന്ന്​ പ്രദേശം സന്ദർശിച്ച ‘ദി വയർ’ ലേഖകൻ ഹിമാദ്രി ഘോഷ്വ്യക്​തമാക്കുന്നു. പൗരത്വ പ്രക്ഷോഭം അടിച്ചമർത്താൻ ഡൽഹിയിൽ സംഘ്​ പരിവാർ നടപ്പാക്കിയ കലാപത്തി​ന്റെ മാതൃകയിലാണ്​ തെലിനിപാറയിലും അക്രമം അരങ്ങേറിയത്​. ആളപായം ഉണ്ടായില്ലെന്നു മാത്രം.

മേയ് 10 ഞായറാഴ്ച വൈകീട്ടാണ്​ കലഹം തുടങ്ങിയത്​. പൊലീസ്​ ഇടപെട്ട്​ അന്നുതന്നെ പരിഹരിച്ചു. മേയ് 11 തിങ്കളാഴ്ച പ്രശ്​നങ്ങളൊന്നുമുണ്ടായില്ല. പി​റ്റേന്ന്​, ചൊവ്വാഴ്ച ഉച്ചതിരിഞ്ഞ് ആയുധങ്ങളുമായി  പുറത്തുനിന്നെത്തിയവരടക്കമുള്ള ഒരു വലിയ ജനക്കൂട്ടം പ്രദേശത്ത് അക്രമം അഴിച്ചുവിടുകയായിരുന്നു. 

പ്രദേശത്തെ നൂറുകണക്കിന്​ മുസ്​ലിം വീടുകളും കടകളും വ്യാപകമായി കത്തിക്കുകയും ​കൊള്ളയടിക്കുകയും ചെയ്​തു. വാഹനങ്ങളും തീവെച്ച്​ നശിപ്പിച്ചു. അന്നുതന്നെ ജില്ലാ മജിസ്‌ട്രേറ്റ് നിരോധനാജ്ഞ നടപ്പാക്കിയതിനാൽ സംഘർഷം മറ്റുസ്​ഥലങ്ങളിലേക്ക്​ വ്യാപിച്ചില്ല. ഇൻറർനെറ്റ് സേവനങ്ങളടക്കം താൽക്കാലികമായി തടഞ്ഞുവെച്ചു. 

മേയ്​ 15ന്​ സംഘർഷ ബാധിത പ്രദേശം ഹിമാദ്രി ഘോഷ്​ സന്ദർശിച്ചു. വിവിധ മത, രാഷ്​ടീയ, സംഘടന പ്രവർത്തകരും പൊലീസുകാരും ഉദ്യോഗസ്​ഥരും നാട്ടുകാരും അടക്കമുള്ളവരുമായി സംസാരിച്ച്​ അദ്ദേഹം തയാറാക്കി ‘ദി വയറി’ൽ പ്രസിദ്ധീകരിച്ച റിപ്പോർട്ടി​​​െൻറ പ്രസക്​ത ഭാഗങ്ങൾ:

തെലിനിപാറയിൽ തീയിട്ടുനശിപ്പിപ്പ പിക്കപ്പ്​ വാൻ
 

തുടങ്ങിയത്​ കക്കൂസ്​ ഉപയോഗത്തെ ചൊല്ലി

പൊതുകക്കൂസ്​ ഉപയോഗത്തെ ചൊല്ലിയുള്ള ചെറിയ തർക്കമാണ്​ കലാപത്തിന്​ വഴിമരുന്നിട്ടതെന്ന്​ പ്രദേശവാസിയായ ദിനേശ് ഷാ പറഞ്ഞു​. ഒരു മുസ്​ലിമിന്​ കോവിഡ്​ ഉണ്ടെന്നും മുസ്​ലിംകൾ പൊതു കക്കൂസ്​ ഉപയോഗിച്ചാൽ വൈറസ് പടരുമെന്നുമുള്ള സന്ദേശം പരന്നു.

തുടർന്ന്​ മുസ്‌ലിംകൾ പൊതുകക്കൂസ്​ ഉപയോഗിക്കുന്നത്​ ഹിന്ദു സമുദായത്തിലെ ചിലർ തടഞ്ഞു. മേയ്​ 10ന്​ വൈകീട്ട്​ തുടങ്ങിയ സംഘർഷം പൊലീസ്​ ഇടപെട്ടതോ​ടെ അന്നു രാത്രി തന്നെ അവസാനിച്ചു. തിങ്കളാഴ്ച പ്രത്യേകിച്ച്​ ഒന്നും സംഭവിച്ചില്ല. എന്നാൽ, അടുത്ത ദിവസം (മേയ്​ 12ന്​) ഒരു കലാപമുണ്ടാകുമെന്ന് ആരും കരുതിയിരുന്നില്ല -ഷാ പറഞ്ഞു.

കൊൽക്കത്തയിൽനിന്ന് 40 കിലോമീറ്റർ വടക്ക് ഹൂഗ്ലി ജില്ലയിലാണ്​ അക്രമം അരങ്ങേറിയ ഭദ്രേശ്വറിലെ തെലിനിപാറ പ്രദേശം സ്​ഥിതി ചെയ്യുന്നത്​. മുസ്​ലിം നിവാസികളെ ലക്ഷ്യമിട്ട് ആസൂത്രിതമായി നടപ്പിലാക്കിയ ആക്രമണമാണിതെന്ന് പൊലീസും നാട്ടുകാരും പറഞ്ഞു.

പേരും ചിഹ്നങ്ങളും തെരഞ്ഞുപിടിച്ച്​ അക്രമം

മുസ്​ലിം പേരും ചിഹ്നങ്ങളുമുള്ള കടകളും വീടുകളും തെരഞ്ഞുപിടിച്ചാണ്​ അക്രമികൾ നശിപ്പിച്ചതെന്നതിന്​ തെളിവുകൾ സാക്ഷി. കൊൽക്കത്തയിൽനിന്ന് ഗ്രാൻഡ് ട്രങ്ക് റോഡിലേക്ക് പോകുമ്പോൾ, തെലിനിപാറയിലേക്ക് തിരിയുന്നതിന് ഭദ്രേശ്വരിലെ ബാബർ ബസാർ ജങ്​ഷനിൽ തീപിടിച്ച ഒരു കട കണ്ടു. കറുത്ത ചുവരിൽ ‘സാദ്’ എന്ന പേര് ഇപ്പോഴും കാണാം. ഫയർ സ്​റ്റേഷന്​ എതിർവശത്തുള്ള മുസ്​ലിം ആരാധനാലയവും നശിപ്പിക്കപ്പെട്ടു. തകർന്ന ഇഷ്ടികകളും കീറിപ്പറിഞ്ഞ പതാകകളും തറയിൽ കിടക്കുന്നത് കാണാം.

ഭദ്രേശ്വറിൽ അക്രമികൾ തകർത്ത മുസ്​ലിം ആരാധനാലയം
 

ഭദ്രേശ്വരിൽ അന്തരീക്ഷം പൊതുവേ ശാന്തമായിരുന്നു. ആളുകൾ തെലിനിപാറ സംഭവത്തെക്കുറിച്ച് ചർച്ച ചെയ്യുന്നത് കേൾക്കാം. തെലിനിപാറ ഘട്ടിലേക്കുള്ള ദിനെർദംഗ റോഡിൽ പ്രവേശിക്കു​മ്പോൾ തന്നെ സ്​ഥിതി മാറി. ഈ റോഡ് പൊലീസ് ഭാഗികമായി തടഞ്ഞിട്ടുണ്ട്​. അക്രമം നടന്ന ഉൾ ഭാഗങ്ങളിലേക്ക് നടക്കുമ്പോൾ തെരുവിൽ കുറച്ച് ആളുകൾ മാത്രമേയുള്ളൂ. അവരുടെയൊക്കെ മുഖത്ത് ഭയം ദൃശ്യമാകുന്നുണ്ട്​.

തെലിനിപാറ ഘട്ടിന് തൊട്ടുമുൻപുള്ള കവലയിൽ 30 ഓളം ഇന്ത്യൻ റിസർവ് ബറ്റാലിയൻ (എസ്‌.ഐ‌.ആർ.‌ബി) പൊലീസുകാർ നിൽപുണ്ടായിരുന്നു. ജിടി റോഡിൽ നിന്ന് ദിനെർദംഗ തെരുവിലേക്കുള്ള ​വഴിയും പരിസരവും ഹിന്ദു ഭൂരിപക്ഷപ്രദേശമാണ്​. ഇവിടെ തുടക്കത്തിൽ തന്നെ കത്തിച്ച രണ്ട് വാഹനങ്ങൾ കണ്ടു. വീടുകളോ സ്വത്തോ ഒന്നും നശിപ്പിക്കപ്പെട്ടിട്ടില്ല. കത്തിച്ച വാഹനത്തി​ന്റെ നമ്പർ ​മോ​ട്ടോർ വാഹനവകുപ്പ്​ വെബ്​സൈറ്റിൽ പരിശോധിച്ചപ്പോൾ അത്​ മുസ്​ലിമിന്റെതാണെന്ന്​ വ്യക്​തമായി. കത്തിച്ച മറ്റ് വാഹനത്തി​ന്റെ നമ്പർ പ്ലേറ്റ് കരിഞ്ഞുപോയതിനാൽ ഉടമയെ തിരിച്ചറിയാൻ കഴിഞ്ഞില്ല.

അവിടെ കണ്ടവരോടെക്കെ മെയ് 12 ലെ അക്രമത്തെക്കുറിച്ച് ചോദിച്ചു. എന്നാൽ, ആരും പ്രതികരിക്കാൻ കൂട്ടാക്കിയില്ല. “എനിക്ക് ഒന്നും അറിയില്ല” എന്നായിരുന്നു പൊതുവിൽ ലഭിച്ച മറുപടി.


വീടുകൾ കത്തിക്കാൻ ഉപയോഗിച്ചത്​ ഗ്യാസ് സിലിണ്ടറുകൾ

ഞങ്ങൾ ദിനെർദംഗ ജംഗ്ഷനിൽ നിന്ന് ഗൊണ്ടൽപാറ മില്ലിലേക്ക് നടന്നു. കത്തിക്കരിഞ്ഞ, വാതിലുകൾ തകർന്ന,  മുസ്​ലിം വീടുകളുടെ ഒരു നിര തന്നെ അവിടെ കാത്തിരിക്കുന്നുണ്ടായിരുന്നു. ഗ്യാസ് സിലിണ്ടറുകൾ പൊട്ടിത്തെറിച്ചതിനാൽ ഈ ചെറിയ വീടുകളുടെ മേൽക്കൂരയും ചുവരുകളും ഇടിഞ്ഞു തകർന്നു. ഇവിടെയുള്ള രണ്ട് വീടുകളിൽ നിന്ന് അപ്പോഴും കറുത്ത പുക ഉയരുന്നുണ്ടായിരുന്നു. വലിയ കല്ലുകൾ, വിറകുകൾ, ഇരുമ്പുവടികൾ, കുപ്പിച്ചില്ലുകൾ എന്നിവ നിറഞ്ഞിരുന്നു. കുപ്പികളിൽ ഭൂരിഭാഗവും മണ്ണെണ്ണ മണക്കുന്നുണ്ടായിരുന്നു.

തീവെച്ച്​ നശിപ്പിച്ച മുഹമ്മദ് മുഷ്​താഖി​​െൻറ ഫോ​ട്ടോസ്​റ്റാറ്റ്​ കട. തൊട്ടടുത്തുള്ള രണ്ട് കടകൾക്ക്​ ഒരുകേടുപാടും വരുത്തിയിട്ടില്ല
 

മുസ്‌ലിം ഉടമസ്ഥതയിലുള്ള ഫോട്ടോസ്​റ്റാറ്റ്​, പലചരക്ക്, ഇറച്ചി കടകൾ എന്നിവ കത്തിച്ചാമ്പലാക്കിയിരുന്നു. എന്നാൽ, അതിനോടുചേർന്നുള്ള ഹിന്ദു ഉടമസ്ഥതയിലുള്ള പലചരക്ക്, തയ്യൽ കടകൾ കേടുകൂടാതെ നിൽക്കുന്നു. തെരുവിൽ തീവെച്ചും മറ്റും നശിപ്പിച്ച ഇലക്​ട്രിക്​ റിക്ഷകൾ, മോട്ടോർ ബൈക്കുകൾ, സൈക്കിളുകൾ, ചെറിയ ടെമ്പോ എന്നിവയും കിടപ്പുണ്ടായിരുന്നു.

ഹിന്ദു കുടുംബത്തി​ന്റെതാണെന്ന് തിരിച്ചറിയാൻ കഴിയുന്ന, ഒരുവീട്​ മാത്രം കാര്യമായ കേടുപാടില്ലാതെ ബാക്കിയായിരുന്നു. അതി​ന്റെ ഒരു വശത്തെ ചുമർ അൽപം തകർന്നിരുന്നു. “ഈ വീടിന് അടുത്തുള്ള മുസ്​ലിം വീട്ടിൽ ഗ്യാസ്​ സിലിണ്ടർ സ്​ഫോടനം നടത്തിയപ്പോഴുള്ള ആഘാതത്തിലാണ്​ ഈ ചുമർ തകർന്നതെന്ന്” പേരുവെളിപ്പെടുത്താത്ത പ്രദേശവാസി പറഞ്ഞു.

തെലിനിപാറയിൽ അക്രമികൾ കത്തിച്ച വീട്ടിനു പുറത്ത്​ സൈഫുല്ല
 

നാശനഷ്ടങ്ങൾ പരിശോധിക്കുകയായിരുന്ന പൊലീസ് ഉദ്യോഗസ്ഥനോട്​ ഞങ്ങൾ അക്രമ​ത്തെ കുറിച്ച്​ ചോദിച്ചു. ഒരു സമുദായത്തെ ലക്ഷ്യം വച്ചുള്ളതാണോ ഇതെന്ന് ചോദിച്ചപ്പോൾ, അദ്ദേഹം ഒരു കടയിലേക്ക് വിരൽ ചൂണ്ടി പറഞ്ഞു: “നോക്കൂ, ആ കടയ്ക്ക് കേടുപാടുകൾ ഇല്ല. അതി​ന്റെ പേര് വായിച്ചു നോക്കൂ. ആക്രമണം ആസൂത്രണം ചെയ്തതിൽ ചില നാട്ടുകാർക്കും പങ്കുണ്ട്​. ഓരോ വീടും കൃത്യമായി കണ്ടെത്താനും ടാർഗെറ്റുചെയ്യാനും പുറത്തുനിന്നുള്ളവർക്ക് സാധ്യമല്ല. ഇവിടെ ഉപയോഗിച്ച പെട്രോൾ ബോംബുകളുടെ അളവ് ആക്രമണകാരികൾ നന്നായി തയ്യാറെടുത്താണ്​ വന്നത്​ എന്നതിന്റെ തെളിവാണ്​’’.

ഇരുമ്പുവടികളും കല്ലുകളും പെട്രോൾ ബോംബുകളും ഉപയോഗിച്ച് ‘ജയ് ശ്രീ റാം’ എന്ന് ആക്രോശിച്ചാണ്​ ആയുധധാരികളായ അക്രമികൾ വന്നതെന്ന്​ 53 കാരനായ മുഹമ്മദ് മുഷ്​താഖ്​ പറഞ്ഞു. പ്രദേശത്തെ കേബിൾ ഓപ്പറേറ്ററായ ഇദ്ദേഹത്തിന്​ ഫോട്ടോസ്​റ്റാറ്റ്​ കടയുമുണ്ട്​. മുഖംമൂടി ധരിച്ച സംഘം അദ്ദേഹത്തി​ന്റെ വീടും കടയും കൊള്ളയടിക്കുകയും കത്തിക്കുകയും ചെയ്​തു. പുതിയ ഫോ​ട്ടോസ്​റ്റാറ്റ്​ മെഷീനും കത്തിച്ചു. ഇപ്പോൾ, ഞങ്ങൾ ധരിക്കുന്നതല്ലാതെ മറ്റൊന്നും ഞങ്ങളുടെ പക്കലില്ല -കണ്ണീരോടെ മുഷ്​താഖ്​ പറഞ്ഞു. 

‘‘ഫോട്ടോസ്​റ്റാറ്റ്​ ഷോപ്പിന് പുറമെ, ഞങ്ങൾക്ക് രണ്ട് ഷോപ്പുകൾ കൂടി ഉണ്ട്. രണ്ടും ഹിന്ദു സമുദായത്തിൽപെട്ടവർക്ക് വാടകയ്ക്ക്​ കൊടുത്തതാണ്​. ആ കടകൾക്ക് ഒന്നും സംഭവിച്ചില്ല. കലാപകാരികളുടെ ലക്ഷ്യം തെളിയിക്കാൻ കൂടുതൽ തെളിവുകൾ എന്താണ് വേണ്ടത്?” -ഇദ്ദേഹത്തി​ന്റ ഭാര്യ ഷബാന ഖാത്തുൻ പറഞ്ഞു.

എല്ലാം കത്തിത്തീർന്ന ശേഷം പൊലീസ്​ എത്തി

മേയ് 12ന് ഉച്ച പന്ത്രണ്ടരയോടെയാണ്​ അക്രമം ആരംഭിച്ചതെന്ന്​ പെട്രോൾ ബോംബ്​ ആക്രമണത്തിൽ വീടുകത്തിക്കരിഞ്ഞ മുഹമ്മദ് അൻസാരി പറഞ്ഞു. ഗൊണ്ടൽപാറ മിൽ ഭാഗത്ത് നിന്ന് ആയുധധാരികളായ ചിലർ മുസ്‌ലിം വീടുകൾക്ക്​ നേരെ ബോംബ് എറിഞ്ഞതായി വാർത്ത ലഭിച്ചു. 

പൂർണ്ണമായും നശിപ്പിക്കപ്പെട്ട തെലിനിപാറയിലെ എസ്. ഖാ​​െൻറ ഉടമസ്ഥതയിലുള്ള ഓഡിയോ സ​െൻറർ
 

ഞാൻ ഭദ്രേശ്വർ പൊലീസിനെ വിളിച്ച്​ സ്ഥിതിഗതികളെക്കുറിച്ച് അറിയിച്ചു. എ​ന്റെ സഹോദരൻ അഗ്നിശമന സേനയെ വിളിച്ചു. എന്നിട്ടും  ഉച്ച രണ്ടരയ്ക്ക് ശേഷമാണ് 10-12 പൊലീസുകാർ വന്നത്. അപ്പോഴേക്കും എല്ലാം കത്തിത്തീർന്നിരുന്നു. അവർ പൊലീസിനെയും ആക്രമിക്കുകയും കല്ലെറിയുകയും ചെയ്തു. വൈകീട്ട്​ നാലു മണിയോടെയാണ്​ കൂടുതൽ പൊലീസ്​ എത്തിയത്​. 

അക്രമികളെ തടയാൻ ഹിന്ദു സഹോദരങ്ങളും സഹായിച്ചു
ഗൊണ്ടൽപാറയിലെ മുസ്​ലിം പ്രദേശത്തേക്ക് ആയുധധാരികൾ ഓടുന്നത് തടയാൻ താൻ ശ്രമിച്ചുവെന്ന് വിരമിച്ച ചണമിൽ തൊഴിലാളിയായ എസ്.കെ. ഷംസുദ്ദീൻ പറഞ്ഞു. അതിനി​ടെ അവരിൽ ഒരാൾ തന്നെ ക്രൂരമായി മർദ്ദിച്ചു. ഇവിടെയുള്ള പാൽ വിൽക്കുന്ന ഹിന്ദു ഗ്വാള സഹോദരങ്ങളും അക്രമികളെ തടയാൻ ഏറെ പരിശ്രമിച്ചു. അവർ വളരെയധികം സഹായിച്ചു. അല്ലെങ്കിൽ, കാര്യങ്ങൾ കൂടുതൽ മോശമാകുമായിരുന്നു -അദ്ദേഹം പറഞ്ഞു.

അഴുക്കുചാലിൽ തള്ളിയ മോട്ടോർ സൈക്കിൾ
 

ഗോണ്ടൽപാറയിൽനിന്ന് ഞങ്ങൾ ഭദ്രേശ്വർ മുനിസിപ്പാലിറ്റി ഒമ്പതാം വാർഡിലെ ഫെറി ഘട്ട് തെരുവിലേക്ക് പോയി. വഴി മധ്യേ ഇടുങ്ങിയ കൽ‌വർട്ടിന്​ താഴെ അഴുക്കുചാലിൽ ഗ്യാസ് സിലിണ്ടറുകളും മോട്ടോർ സൈക്കിളും കിടക്കുന്നുണ്ടായിരുന്നു. 

അവിടെയുണ്ടായിരുന്ന പൊലീസുകാരിൽ ഒരാൾ പറഞ്ഞു: “നിങ്ങൾ സ്​ഥലങ്ങൾ കണ്ടില്ലേ. ആരുടെ സ്വത്തുക്കളാണ്​ നശിപ്പിച്ചതെന്ന് കാണ്ടാൽ മനസ്സിലാകും. റോഡ് പൂർണ്ണമായും കുപ്പിച്ചില്ല്​ നിറഞ്ഞിരിക്കുകയാണ്​. ധാരാളം പെട്രോൾ ബോംബുകൾ ഉപയോഗിച്ചു. ആസിഡ്​ വരെ പയോഗിച്ചതായി സംശയമുണ്ട്​’’  “ഞങ്ങളുടെ പക്കൽ ലാത്തികളും മറ്റുമാണുള്ളത്​. ഇരുമ്പുദണ്ഡും ആയുധങ്ങളുമേന്തിവരുന്ന 500-600 പേരടങ്ങുന്ന സംഘത്തെ എങ്ങനെയാണ്​ ഞങൾ നിയന്ത്രിക്കുക?? ” -മറ്റൊരു പൊലീസുകാരൻ കൂട്ടി​ച്ചേർത്തു.

തെലിനിപാറയുടെ ഉൾഭാഗങ്ങളിലേക്ക്​ പോകുന്തോറും അക്രമത്തിന്റെ അടയാളങ്ങൾ കൂടുതൽ കാണാനുണ്ടായിരുന്നു. എല്ലാം നശിച്ച ഇവിടുത്തെ ചെറിയ ചെറിയ വീടുകളിൽ താമസിക്കുന്നവർക്ക്​ മുന്നിൽ ഭാവി ജീവിതം ചോദ്യചിഹ്നമാണ്​. 

രണ്ട് സമുദായങ്ങൾക്കിടയിൽ മുമ്പും അസ്വരസ്യങ്ങൾ ഉണ്ടായിട്ടു​ണ്ടെങ്കിലും ഇത്തവണ അത് ഭയങ്കരമായിരുന്നുവെന്ന്​ ബിശ്വനാഥ് സിക്ദാർ എന്ന പ്രദേശവാസി പറഞ്ഞു. രണ്ട് സമുദായങ്ങളും ഇപ്പോൾ ഭയത്തോടെയാണ് ജീവിക്കുന്നത് -അദ്ദേഹം കൂട്ടി​ച്ചേർത്തു. 

‘അക്രമികൾ അക്കരെ നിന്ന്​ നദി കടന്നു വന്നു’

ഹൂഗ്ലിയുടെ തീരത്താണ് ഗോണ്ടൽപാറ മിൽ സ്ഥിതിചെയ്യുന്നത്. എതിർവശത്ത് ബരാക്പൂർ ജില്ലയിൽ വരുന്ന ജഗത്ദാൽ പ്രദേശമാണ്​. ബിജെപി നേതാവ്​ അർജുൻ സിങ്ങാണ്​ ബരാക്പൂർ മണ്ഡലത്തിലെ എം.പി. സിങ്ങി​ന്റെ ആളുകൾ ചെറിയ ബോട്ടുകളിൽ തെലിനിപാറയിലേക്ക് വന്നതായി പ്രദേശവാസിയായ എം.ഡി. സലിം ആരോപിച്ചു. 

ഫെറി ഘട്ട് സ്ട്രീറ്റിലെ പൊലീസ്​ സബ് ഇൻസ്പെക്ടർ എം.ഡി നിഹാലി​ന്റെ വീടും നശിപ്പിക്കപ്പെട്ടിട്ടുണ്ട്​. അടുത്ത വീട്ടിൽ സിലിണ്ടർ പൊട്ടിച്ചതിനെ തുടർന്ന്​ ഇദ്ദേഹത്തി​ന്റെ വീടി​ന്റെ ചുമർ വിള്ളൽ വീണ നിലയിലാണ്​. നോർത്ത് 24 പർഗാനാസ് ജില്ലയിൽ ജോലി ചെയ്യുന്ന നിഹാൽ വീടു​പൂട്ടി കുടുംബസമേതം അവി​ടെയാണ്​ താമസം.  

അക്രമികൾ തകർത്ത വീട്
 

ഈ പ്രദേശത്തുതന്നെയുള്ള വീടും കത്തി നശിച്ച സുൽഫിക്കർ അൻസാരിയെയും ഞങ്ങൾ കണ്ടുമുട്ടി. ആക്രമണം നടക്കുമ്പോൾ അദ്ദേഹത്തി​ന്റെ അയൽവാസിയായ പ്രാദേശിക കൗൺസിലർ പോലും ഇടപെട്ടി​ല്ലെന്ന്​ അദ്ദേഹം പറഞ്ഞു. ​ “അവർ എ​ന്റെ വൃദ്ധനായ പിതാവിനെ അടിച്ചു. കൂപ്പുകൈയോടെ അപേക്ഷിച്ചിട്ടും അവർ കേട്ടില്ല. ജോലി നഷ്ടപ്പെട്ടശേഷം എന്റെ ഏക വരുമാന മാർഗ്ഗമായ പശുവിനെയും അവർ ​ കൊണ്ടുപോയി’ സുൽഫിക്കർ അൻസാരി പറഞ്ഞു.

കോൺഗ്രസ് അംഗമായ ചിത്ര ചൗധരിയും ഭർത്താവുമാണ്​ 25 വർഷത്തിലേറെയായി തുടർച്ചയായി വാർഡ്​ കൗൺസിലർ. അയൽവാസികളെ ആക്രമിക്കുമ്പോൾ എന്തുകൊണ്ടാണ് സഹായിക്കാതിരുന്നതെന്ന്​ ചിത്ര ചൗധരിയോട് ചോദിച്ചപ്പോൾ മറുപടി ഇപ്രകാരമായിരുന്നു: “ആ സമയത്ത് എന്റെ മകൻ എന്നോടൊപ്പം ഉണ്ടായിരുന്നു. ഞാൻ എന്നെയും മകനെയും രക്ഷിക്കുക​യാണോ വേണ്ടത്​, അതോ മറ്റുള്ളവരെ രക്ഷിക്കാൻ പോകുകയോ? രണ്ട് സംഘവും ബോംബുകൾ എറിയുമ്പോൾ ഞാൻ അതിനിടയിൽ നിൽക്കണമെന്നാണോ പറയുന്നത്​”. 
തെരഞ്ഞെടുക്കപ്പെട്ട ഒരു പ്രതിനിധി എന്ന നിലയിൽ ഇരകളെ സന്ദർശി​ക്കേണ്ടത്​ കടമയല്ലേ എന്ന് ഞങ്ങൾ ചോദിച്ചപ്പോൾ “എനിക്ക് എന്തെങ്കിലും ചെയ്യാൻ കഴിവുണ്ടോ, പിന്നെ എന്തിനാണ് ഞാൻ ഇരകളുമായി കൂടിക്കാഴ്ചയ്ക്ക് പോകുന്നത്? ” എന്നായിരുന്നു മറുപടി.


ഒരു രാഷ്ട്രീയക്കാരൻ പോലും അവരെ സന്ദർശിച്ചിട്ടില്ലെന്ന് നാട്ടുകാർ പറഞ്ഞു. ചന്ദനഗർ എം.എൽ.എയും തൃണമൂൽ കോൺഗ്രസ്​ നേതാവുമായ ഇന്ദ്രനിൽ സെൻ, ത​ന്റെ മണ്ഡലം സന്ദർശിക്കാറേ ഇല്ലെന്ന് പലരും ആരോപിക്കുന്നു. സംസ്​ഥാന വിവര, സാംസ്കാരിക സഹമന്ത്രി കൂടിയായ സെൻ തിരഞ്ഞെടുപ്പ് സമയത്ത് മാത്രമേ സജീവമാകൂ എന്നും അവർ പറഞ്ഞു. 

‘മേയ്​ 10 ന്​ നടന്ന സംഘർഷം സ്വാഭാവികമായി ഉടലെടുത്തതാണെന്നാണ്​ നിഗമനം. എന്നാൽ, 12ന്​  മുൻകൂട്ടി ആസൂത്രണം ചെയ്ത അക്രമണമാണ്​ അര​ങ്ങേറിയത്​’ -ചന്ദനഗർ പൊലീസ് കമ്മീഷണർ ഹുമയൂൺ കബീർ പറഞ്ഞു. 24 മണിക്കൂറിനുള്ളിൽ 91 പേരെ അറസ്റ്റ് ചെയ്തു. അവരെ കോടതി 14 ദിവസത്തെ ജുഡീഷ്യൽ കസ്റ്റഡിയിൽ വിട്ടു. അടുത്ത ദിവസം 35 ഓളം പേരെയും അറസ്റ്റ് ചെയ്തു -കമ്മീഷണർ പറഞ്ഞു.

നുണപ്രചരണം സജീവം

മുസ്​ലിംകൾക്കെതിരെ നടന്ന ഏകപക്ഷീയ അക്രമണത്തെക്കുറിച്ച്​ സംഘ്​പരിവാർ കേന്ദ്രങ്ങൾ നേരെ തിരിച്ചാണ്​ പ്രചരിപ്പിക്കുന്നത്​. ഹൂഗ്ലിയിലെ ബി.ജെ.പി എം.പി ലോക്കറ്റ് ചാറ്റർജി സോഷ്യൽ മീഡിയയിൽ പോസ്​റ്റ്​ ചെയ്​ത വിഡിയോ ഉദാഹരണം. ‘തെലിനിപാറ കത്തുന്നു. ഹിന്ദു വീടുകൾ തീയിട്ടു നശിപ്പിക്കുകയാണ്​. സഹായം തേടി പ്രദേശവാസികളിൽ നിന്ന് എനിക്ക് ധാരാളം കോൾ വരുന്നുണ്ട്​. ഇത് ഏകപക്ഷീയമായ യുദ്ധമാണ്. സംസ്ഥാന ഭരണകൂടം നിശബ്ദ കാഴ്ചക്കാരനാണ്’’ എന്നായിരുന്നു ഇതി​ന്റെ കൂടെയുള്ള വിശദീകരണം. ബി.ജെ.പി ദേശീയ ജനറൽ സെക്രട്ടറിയും പശ്ചിമ ബംഗാളിലെ പാർട്ടിയുടെ കേന്ദ്ര നിരീക്ഷകനുമായ കൈലാഷ് വിജയവർഗിയയും മെയ് 12ന്​ ഉച്ചയ്ക്ക് ചാറ്റർജിയുടെ വീഡിയോ ട്വീറ്റ് ചെയ്തിട്ടുണ്ട്​.

തെലിനിപാറ അക്രമത്തെക്കുറിച്ച് വ്യാജവാർത്തകൾ പ്രചരിപ്പിക്കാൻ ഉപയോഗിച്ച ആനന്ദബസാർ പത്രികയുടെ പേരിലുള്ള വ്യാജ വെബ്‌സൈറ്റി​​െൻറ സ്ക്രീൻഷോട്ടുകൾ. ആനന്ദബസാർ പത്രികയുടെ യഥാർഥ സൈറ്റും കാണാം.
 

തെലിനിപാറയിൽ ഹിന്ദുക്കൾ അപകടത്തിലാണെന്ന് സമാനമായ നുണപ്രചരണം സോഷ്യൽ മീഡിയയിൽ വ്യാപകമായി പ്രചരിപ്പിച്ചു. മേയ് 12 ന്​ തന്നെ “2020 ടെലിനിപാറ ഹിന്ദു വിരുദ്ധ പദ്ധതി” എന്ന തലക്കെട്ടിൽ വിക്കിന്യൂസിൽ പേജ് സൃഷ്​ടിച്ചു.

ബംഗാളിലെ ഏറ്റവും പ്രചാരമുള്ള പത്രമായ ആനന്ദബസാർ പത്രികയുടെ പേരിൽ വ്യാജ വെബ്​സൈറ്റ്​ സൃഷ്​ടിച്ചും നുണവാർത്തകൾ പ്രചരിപ്പിച്ചു. തെലിനിപാറ സംഭവത്തെക്കുറിച്ച് തെറ്റായതും പ്രകോപനപരവുമായ വാർത്തകളാണ് ഈ വെബ്​സൈറ്റ്​ പടച്ചുവിട്ടത്​. 

പാകിസ്​താനിൽ നടന്ന അക്രമത്തി​ന്റെ ചിത്രങ്ങൾ തെലിനിപാറയിലേതെന്ന പേരിൽ  വ്യാപകമായി പ്രചരിച്ചതായും ഇന്ത്യാ ടുഡേ വസ്തുതാ പരിശോധന സംഘം കണ്ടെത്തി. ട്വിറ്റർ, ഫേസ്ബുക്ക് ഉപയോക്താക്കളും ഈ വ്യാജ ചിത്രങ്ങൾ പങ്കിട്ടു.

(തെലിനിപാറയിൽ മൂന്ന് മണിക്കൂറിലധികം ചെലവഴിച്ചാണ്​ ഞങ്ങൾ വസ്​തുതാന്വേഷണ റിപ്പോർട്ട്​ തയാറാക്കിയത്​. വിവിധ സമുദായങ്ങളിൽ നിന്നുള്ള നിരവധി പേരുമായി സംസാരിച്ചു. മുസ്​ലിം പ്രദേശങ്ങളിലാണ്​ ഏറിയ നാശനഷ്​ടവും കണ്ടെത്തിയത്. രാജ ബസാറിലെ ഹിന്ദു കുടുംബങ്ങളിലുള്ള ചില വീടുകൾക്ക് ഭാഗികമായി കേടുപാടുകൾ സംഭവിച്ചതായും കണ്ടെത്തി. ആസൂത്രിതമായി തെരഞ്ഞുപിടിച്ചാണ്​ അക്രമണം അരങ്ങേറിയത്​. പ്രദേശം പരിചയമുള്ള നാട്ടുകാരുടെ സഹായത്തോടെ പുറത്തുനിന്ന് വന്നവരാണ് ആക്രമണം നടത്തിയതെന്ന് നാട്ടുകാർ ആരോപിക്കുന്നു)

Loading...
COMMENTS