പീഡനത്തെ തുടർന്ന്​ ആത്മഹത്യ ചെയ്​ത വിദ്യാർഥിനിയു​െട അധ്യാപകൻ ജീവനൊടുക്കി

കാരൂർ (തമിഴ്​നാട്​): ലൈംഗിക പീഡനത്തിനിരയായതിനെ തുടർന്ന് ദിവസങ്ങൾക്ക്​ മുമ്പ്​​ ജീവനൊടുക്കിയ പ്ലസ്​ ടു വിദ്യാർഥിനിയുടെ ഗണിത അധ്യാപകൻ ആത്മഹത്യ ചെയ്​തു.

പെൺകുട്ടി ആത്മഹത്യകുറിപ്പിൽ ആരുടെയും പേര് പറഞ്ഞിട്ടില്ലെങ്കിലും മരണവുമായി ബന്ധപ്പെട്ട് വിദ്യാർഥികളും മറ്റുള്ളവരും തന്നെ കളിയാക്കുകയും പൊലീസ്​ ചോദ്യംചെയ്യു​കയും ചെയ്​തത്​ നാണക്കേടുണ്ടാക്കിയെന്ന്​ എഴുതിവെച്ചാണ്​ ഗണിത അധ്യാപകനായ ശരവണൻ (42) ആത്മഹത്യ ചെയ്​തത്​.

കഴിഞ്ഞ ആഴ്ചയാണ്​ കാരൂർ ജില്ലയിൽ 12ാം ക്ലാസ്​ വിദ്യാർഥിനി ആത്മഹത്യ ചെയ്​തത്​. 'കരൂർ ജില്ലയിൽ ലൈംഗികാതിക്രമം മൂലം മരിക്കുന്ന അവസാനത്തെ പെൺകുട്ടി ഞാനായിരിക്കണം. എന്‍റെ ഈ തീരുമാനത്തിന് കാരണക്കാരൻ ആരാണെന്ന് പറയാൻ എനിക്ക് പേടിയാണ്. ഈ ഭൂമിയിൽ ജീവിക്കാനും മറ്റുള്ളവരെ സഹായിക്കാനും ഞാൻ ആഗ്രഹിച്ചു, പക്ഷേ എനിക്ക്​ എത്രയും പെട്ടെന്ന് ഈ ലോകം വിട്ടുപോകണം'-പെൺകുട്ടി ആത്മഹത്യ കുറിപ്പിൽ എഴുതി.

കേസ്​ അന്വേഷണത്തിന്‍റെ ഭാഗമായി സ്​കൂളിലെ അധ്യാകരെയും സ്റ്റാഫിനെയും പൊലീസ്​ ചോദ്യം ചെയ്​തിരുന്നു. ചോദ്യം ചെയ്യലിന്​ വിധേയമായ ശരവൺ തുടർന്ന്​ കടുത്ത മാനസിക സംഘർഷത്തിലായിരുന്നു. ഗണിത അധ്യാപകനെ കുറിച്ച്​ സംശയമില്ലായിരുന്നുവെന്ന്​ പൊലീസ്​ പറഞ്ഞു. ഭാര്യ പിതാവിന്‍റെ ​തിരുച്ചിറപ്പള്ളിയിലെ സ്​ഥലത്ത്​ വെച്ചായിരുന്നു അധ്യാപകൻ ആത്മഹത്യ ചെയ്​തത്​.