തമിഴ്​നാട്ടിൽ നാലുജില്ലകളിൽ ഇന്നുമുതൽ സമ്പൂർണ ലോക്​ഡൗൺ

ചെന്നൈ: ​കോവിഡ്​ ബാധിതരുടെ എണ്ണം കുത്തനെ ഉയർന്ന സാഹചര്യത്തിൽ തമിഴ്​നാട്ടിലെ നാലു ജില്ലകളിൽ ഇന്നുമുതൽ സമ്പൂർണ ലോക്​ഡൗൺ. ഈ മാസം 31 വരെ അവശ്യ സേവനങ്ങൾക്ക്​ മാത്രമാകും അനുമതി. ചെന്നൈ, കാഞ്ചീപുരം, തിരുവള്ളൂർ,  ചെങ്കൽ​േപ്പട്ട്​ തുടങ്ങിയ ജില്ലകളിലാണ്​ സമ്പൂർണ ലോക്​ഡൗൺ. 

പലചരക്ക്- പച്ചക്കറി കടകള്‍ ഉച്ചക്ക് രണ്ട് മണി വരെ തുറന്ന് പ്രവര്‍ത്തിക്കും. ഓട്ടോ-ടാക്സി സര്‍വീസുകൾ ഉണ്ടാകില്ല. ഹോട്ടലുകളില്‍ നിന്ന് പാര്‍സല്‍ അനുവദിക്കും. എന്നാല്‍ അടിയന്തര ആവശ്യങ്ങള്‍ക്ക് കേരളത്തിലേക്ക്​ ഉള്‍പ്പെടെ പാസ് നല്‍കുന്നത് തുടരും. ചെന്നൈയില്‍ നിന്ന് വിമാന സര്‍വീസിനും തടസമില്ല. 

തമിഴ്​നാട്ടിലെ കോവിഡ്​ ബാധിതരുടെ എണ്ണം 50,000കടന്നു. 52,334 പേർക്കാണ്​ ഇതുവരെ രോഗം സ്​ഥിരീകരിച്ചത്​. മരണസംഖ്യ 625. വ്യാഴാഴ്​ച മാത്രം 49 മരണം സംസ്​ഥാനത്ത്​ റിപ്പോർട്ട്​ ചെയ്​തു. ചെന്നൈയിൽ മാത്രം കോവിഡ്​ ബാധിതരുടെ എണ്ണം 37,000കടന്നു.  

തമിഴ്​നാട്​ മുഖ്യമന്ത്രിയുടെ ഓഫിസിലും കോവിഡ്​ റി​േപ്പാർട്ട്​ ചെയ്യുകയും പ്രൈവറ്റ്​ സെക്രട്ടറി മരിക്കുകയും ചെയ്​തിരുന്നു. എടപ്പാടി പളനിസാമിയുടെ ഒാഫിസിലെ ഒമ്പതുപേർക്കാണ്​ ഇതുവരെ കോവിഡ്​ സ്​ഥിരീകരിച്ചത്​.