മകൾക്ക്​ ടൈഫോയ്​ഡ്​, ഭാര്യയുടെ പ്രേതം കൂടിയതാണെന്ന്​ പിതാവ്​; ദുർമന്ത്രവാദത്തിനിരയായ 19കാരിക്ക്​ ദാരുണാന്ത്യം

ചെന്നൈ: തമിഴ്​നാട്ടിൽ ടൈഫോയ്​ഡ്​ ബാധിച്ച 19കാരിക്ക്​ ചികിത്സ ലഭിക്കാതെ ദാരുണാന്ത്യം. ഉച്ചിപുളി പ്രാഥമിക ആരോഗ്യകേന്ദ്രത്തിൽവെച്ച്​ ബുധനാഴ്ചയാണ്​ 19കാരി തരണി മരിച്ചത്​. തരണിയുടെ കഴുത്തിലും പുറത്തും പരിക്കേറ്റിരുന്നതായി പൊലീസ്​ പറഞ്ഞു.

തരണിയുടെ പിതാവ്​ വീര സെൽവം അന്ധവിശ്വസിയായിരുന്നു. ദിവസങ്ങൾക്ക്​ മുമ്പ്​ സുഖമില്ലാതായ മകൾക്ക്​ പ്രേതബാധ കൂടിയതാണെന്നായിരുന്നു വീര സെൽവത്തിന്‍റെ വി​ശ്വാസം.

ഒമ്പതുവർഷം മുമ്പ്​ തരണിയുടെ മാതാവ്​ മരിച്ചിരുന്നു. അമ്മയുടെ ശവകുടീരം സ്​ഥിരമായി സന്ദർശിക്കാറുണ്ടായിരുന്ന മകളുടെ ശരീരത്തിൽ​ ഭാര്യയുടെ പ്രേതം പ്രവേശിച്ചതോടെയാണ്​ അസുഖം ബാധിച്ചതെന്നായിരുന്നു വീര സെൽവത്തിന്‍റെ വാദം. അതിനാൽതന്നെ തരണിയെ ആശുപത്രിയി​െലത്തിക്കാതെ പകരം ദുർമന്ത്രവാദിയുടെ അടുത്തെത്തിക്കുകയായിരുന്നു ഇയാൾ.

തരണിയെ ദുർമന്ത്രവാദി ദേഹോപദ്രവം ഏൽപ്പിക്കുകയും പുക ശ്വസിപ്പിക്കുകയും ചെയ്​തു. ഇതോടെ ബോധം കെട്ടുവീണ തരണിയെ സമീപത്തെ ആശുപത്രിയ​ി​െലത്തിച്ചു. പരിശോധനയിൽ ടൈഫോയ്​ഡ്​ ആണെന്ന്​ സ്​ഥിരീകരിച്ചു.

ചികിത്സിച്ചില്ലെങ്കിൽ മരണം വരെ സംഭവിക്കാവുന്ന രോഗമാണ്​ ടൈ​േഫായ്​ഡ്​. എന്നാൽ വീരസെൽവം തരണിയെ മറ്റൊരു ദുർമന്ത്രവാദിയുടെ അടുത്തെത്തിക്കുകയായിരുന്നു. പിന്നീട്​ ആരോഗ്യനില വഷളായതോടെ പെൺകുട്ടി പ്രാഥമിക ആരോഗ്യ കേന്ദ്രത്തിൽവെച്ച്​ മരിച്ചു. വീരസെൽവത്തെയും ദുർമന്ത്രവാദികളെയും കുടുംബാംഗങ്ങളെയും പൊലീസ്​ ചോദ്യം ചെയ്​തു. പോസ്റ്റ്​മോർട്ടം റിപ്പോർട്ട്​ ലഭിച്ചതിന്​ ശേഷം അസ്വാഭാവിക മരണത്തിന്​ കേസെടുക്കുമെന്ന്​ പൊലീസ്​ അറിയിച്ചു.