ചന്ദ്രനിലേക്ക്​ യാത്ര, എല്ലാ കുടുംബങ്ങള്‍ക്കും മിനി ഹെലികോപ്​ടര്‍, പ്രതിവർഷം ഒരു കോടി രൂപ; ഞെട്ടിക്കുന്ന വാഗ്​ദാനങ്ങളുമായി ഒരു സ്വതന്ത്ര സ്​ഥാനാർഥി

ചെന്നൈ: തെരഞ്ഞെടുപ്പ്​ കാലത്ത്​ സ്​ഥാനാർഥികളിൽ നിന്ന്​ വാഗ്​ദാന പെരുമഴ പതിവാണ്​. എന്നാൽ, വാഗ്​ദാനങ്ങളിലൂടെ എല്ലാവരെയും ഞെട്ടിക്കുകയാണ്​ തമിഴ്​നാട്ടിലെ സ്വതന്ത്ര സ്​ഥാനാർഥിയായ തുലം ശരവണൻ. നിസ്സാര വാഗ്​ദാനങ്ങളൊന്നുമല്ല മധുര സൗത്ത്​ മണ്ഡലത്തിൽ മത്സരിക്കുന്ന ശരവണൻ മുന്നോട്ടുവെക്കുന്നത്​. എല്ലാ വീടുകളിലും മിനി ഹെലികോപ്​ടർ, ​പ്രതിവർഷ നിക്ഷേപമായി ഒരുകോടി രൂപ, വിവാഹത്തിന്​ സ്വർണാഭരണം, നിർധനർക്ക്​ മൂന്നുനില വീട്​ എന്നിങ്ങനെ നീളുന്നു ശരവണന്‍റെ വാഗ്​ദാനങ്ങൾ.

'ഇതൊക്കെ ചെറുത്​' എന്ന്​ തോന്നും ഇനിയുള്ള വാഗ്​ദാനങ്ങൾ കേട്ടാൽ. ചന്ദ്രനി​ലേക്കുള്ള യാത്രയാണ്​ വാഗ്​ദാനങ്ങളിലെ 'സൂപ്പർ സ്റ്റാർ'. വീട്ടമ്മമാരെ ജോലികളിൽ സഹായിക്കാൻ റോബോട്ട്​, എല്ലാ കുടുംബങ്ങൾക്കും ബോട്ട്​, അവയോടിക്കാൻ കനാലുകൾ, മണ്ഡലത്തിൽ ബഹിരാകാശ ഗവേഷണ കേന്ദ്രം, റോക്കറ്റ്​ ലോഞ്ച്​ പാഡ്​, മണ്ഡലത്തിലെ ചൂട്​ കുറക്കാൻ 300 അടി ഉയരമുള്ള കൃത്രിമ മഞ്ഞുമല എന്നിവയൊക്കെയും ശരവണന്‍റെ പ്രകടനപത്രികയിൽ ഇടംപിടിച്ചിട്ടുണ്ട്​.

വോട്ടർമാരെ മോഹന വാഗ്​ദാനങ്ങൾ നൽകി പറ്റിക്കുന്ന രാഷ്​ട്രീയക്കാരെ ട്രോളുന്നതിന്​ വേണ്ടിയാണ്​ പത്രപ്രവർത്തകനായ ശരവണൻ വിചിത്ര വാഗ്​ദാനങ്ങളുമായി രംഗത്തെത്തിയത്​. 'രാഷ്ട്രീയപാര്‍ട്ടികളുടെ പൊള്ളയായ വാഗ്​ദാനങ്ങളില്‍ വീഴാതിരിക്കാന്‍ ആളുകളില്‍ അവബോധം ഉണ്ടാക്കുകയാണ് എന്‍റെ ലക്ഷ്യം. സാധാരണക്കാരും നല്ലവരുമായ സ്ഥാനാർഥികളെ ജയിപ്പിക്കാന്‍ വോട്ടർമാരെ പ്രേരിപ്പിക്കാനാണ്​ ശ്രമം' -ശരവണൻ പറയുന്നു.

33കാരനായ ശരവണനടക്കം 14 സ്​ഥാനാർഥികളാണ്​ മണ്ഡലത്തിലുള്ളത്​. നിർധന കുടുംബത്തിലെ അംഗമായ ശരവണൻ അവിവാഹിതനാണ്​. 20,000 രൂപ പലിശക്ക്​ കടം വാങ്ങിയാണ്​ താൻ കെട്ടിവെക്കാനുള്ള കാശ്​ സംഘടിപ്പിച്ചതെന്നും ശരവണൻ പറയുന്നു.

'ജനങ്ങളുടെ ക്ഷേമമല്ല പല രാഷ്​ട്രീയ നേതാക്കളുടെയും ലക്ഷ്യം. അവർ രാഷ്​ട്രീയത്തെ പണം സമ്പാദിക്കാനുള്ള മാർഗമായി മാത്രമാണ്​ കാണുന്നത്​. അധികാരത്തിലിരിക്കു​േമ്പാൾ തൊഴിലവസരം സൃഷ്​ടിക്കാനോ കൃഷിയെ പരിപോഷിപ്പിക്കാനോ ഒന്നും അവർ ശ്രമിക്കാറില്ല. എന്നിട്ട്​ തെരഞ്ഞെടുപ്പ്​ വരു​േമ്പാൾ പണമെറിഞ്ഞ്​ വോട്ടർമാരെ സ്വാധീനിക്കാനും ശ്രമിക്കും' -ശരവണൻ പറയുന്നു.