തമിഴ്​നാട്ടിൽ ആദ്യ ദിവസം വിറ്റത്​ 172 കോടി രൂപയുടെ മദ്യം

ചെന്നൈ:  തമിഴ്​നാട്ടിൽ ലോക്​ഡൗണിൽ ഇളവുകൾ വരുത്തി തസ്​മാക്​ മദ്യവിൽപ്പന ശാലകൾ തുറന്ന ആദ്യ ദിവസം വിൽപ്പന നടത്തിയത്​ 172 കോടി രൂപയുടെ മദ്യം. വ്യാഴാഴ്​ചയാണ്​ തമിഴ്​നാട്ടിലെ തസ്​മാക്​ ഷോപ്പുകൾ തുറന്നത്​.

മിക്കയിടങ്ങളിലും സാമൂഹിക അകലം പാലിക്കാ​തെ ജനങ്ങൾ മദ്യശാലകൾക്ക്​ മുമ്പിൽ ഒത്തുകൂടിയത്​ വാർത്തയായിരുന്നു. ജനക്കൂട്ടത്തെ നിയന്ത്രിക്കാൻ​ പൊലീസുകാർ ബുദ്ധിമുട്ടുന്ന വിഡിയോ സാമൂഹിക മാധ്യമങ്ങളിൽ പ്രചരിക്കുകയും ചെയ്​തിരുന്നു. ചിലയിടങ്ങളിൽ ജനങ്ങൾക്ക്​ നേരെ ലാത്തിച്ചാർജുമുണ്ടായി. 

മദ്യ വിൽപ്പന ശാലകൾക്ക്​ മുമ്പിൽ അഞ്ചുപേരിൽ കൂടുതൽ നിൽക്കരുതെന്ന്​ മദ്രാസ്​ ഹൈകോടതി കഴിഞ്ഞദിവസം ഉത്തരവിട്ടിരുന്നു. സാമൂഹിക അകലം പാലിക്കണമെന്ന നിർദേശവും നൽകിയിരുന്നു. 

തസ്​മാക്​ ഷോപ്പുകൾ തുറന്ന ആദ്യ ദിവസം 172 കോടിയുടെ വിൽപ്പന നടത്തിയതായും സാധാരണ ദിവസങ്ങളെ അപേക്ഷിച്ച്​ ഇത്​ വളരെ കൂടുതലാണെന്നും അധികൃതർ പറഞ്ഞു. 

5146 തസ്​മാക്​ ഷോപ്പുകളാണ്​ തമിഴ്​നാട്ടിലുള്ളത്​. സാധാരണ ദിവസങ്ങളിൽ 70 മുതൽ 80 കോടി രൂപയൂടെ വരുമാനമാണ്​ ദിവസേന ലഭിക്കാറ്​. ലോക്​ഡൗൺ മൂലം 3750 ഷോപ്പുകൾ മാത്രമേ തുറന്നിട്ടുള്ളൂ. ഇതിൽ നിന്നാണ്​ 172 കോടി രൂപയുടെ വരുമാനം. 

മധുര ​മേഖലയിലാണ്​ ഏറ്റവും കൂടുതൽ മദ്യം വിറ്റത്​. 46.78 കോടി രൂപയുടെ മദ്യമാണ്​ ഇവിടെ മാത്രം വിൽപ്പന നടത്തിയത്​. തിരുച്ചിയിൽ 45.67 കോടിയുടെയും സേലത്ത്​ 41.56 കോടിയുടെയും മദ്യം വിറ്റു. 

അതേസമയം തമിഴ്​നാട്ടിൽ കോവിഡ്​ രോഗബാധിതരുടെ എണ്ണം കൂടുന്നത്​ ആ​ശങ്ക ഉയർത്തുന്നുണ്ട്​. മഹാരാഷ്​ട്രക്ക്​ പുറമെ രാജ്യത്ത്​ ഏറ്റവും കൂടുതൽ കോവിഡ്​ രോഗബാധിതരു​ള്ളത്​ ഗുജറാത്തിലും തമിഴ്​നാട്ടിലുമാണ്​.