പൂജാ ചടങ്ങുകൾക്കിടെ അഞ്ച് പൂജാരിമാർ ക്ഷേത്രക്കുളത്തിൽ മുങ്ങിമരിച്ചു

ചെന്നൈ: താംബരത്തിനടുത്ത മടിപ്പാക്കം മൂവരസംപേട്ട ധർമലിംഗേശ്വരർ ക്ഷേത്രക്കുളത്തിൽ അഞ്ച്​ യുവാക്കൾ മുങ്ങിമരിച്ചു. ചെന്നൈ മടിപ്പാക്കം രാഘവൻ (18), മനീഷ് (20), കീഴ്​ക്കട്ടളൈ യോഗേശ്വരൻ (23), പാനേഷ് (22), നങ്കനല്ലൂർ സ്വദേശി ആർ. സൂര്യ (24) എന്നിവരാണ്​ ദാരുണമായി മരിച്ചത്​. ക്ഷേത്രത്തിലെ പങ്കുനിഉത്രം ഉത്സവത്തോടനുബന്ധിച്ച്​ ബുധനാഴ്ച രാവിലെ ഒമ്പതരയോടെ നടന്ന ‘തീർഥവാരി’യെന്ന ചടങ്ങിനിടെയാണ്​ സംഭവം.

പൂജാരിമാരും ഭക്തജനങ്ങളുമടങ്ങുന്ന മുപ്പതോളം പേരടങ്ങുന്ന സംഘം വിഗ്രഹം കയറ്റിയ പല്ലക്ക്​ തോളിലേറ്റി പൂർണകുംഭങ്ങളുമായി ക്ഷേത്രക്കുളത്തിൽ മൂന്നുതവണ മുങ്ങി വേദമന്ത്രോച്ചാരണങ്ങൾ നടത്തുന്ന ചടങ്ങിനിടെയാണ്​ ചിലരുടെ കാലുകൾ ചളിയിൽ താഴ്ന്നു മുങ്ങിയത്​.

അഞ്ചു യുവാക്കളെ കാണാതായതോടെ പൊലീസും അഗ്​നിരക്ഷാ സേനയുമെത്തി നടത്തിയ തിരച്ചിലിലാണ്​ മൃതദേഹങ്ങൾ കണ്ടെടുത്തത്​. മരിച്ചവരുടെ കുടുംബങ്ങൾക്ക്​ മുഖ്യമന്ത്രി എം.കെ. സ്റ്റാലിൻ രണ്ടുലക്ഷം രൂപ വീതം ധനസഹായം പ്രഖ്യാപിച്ചു.