തമിഴ്​നാട്ടിൽ 9, 10, 11 ക്ലാസ്​ വാർഷിക പരീക്ഷകൾ റദ്ദാക്കി; എല്ലാ കുട്ടികളെയും വിജയിപ്പിക്കും

ചെന്നൈ: തമിഴ്​നാട്ടിൽ 9, 10, 11 ക്ലാസുകളിലെ എല്ലാ കുട്ടികളെയും പരീക്ഷ എഴുതാതെ വിജയിപ്പിക്കും. മുഖ്യമന്ത്രി എടപ്പാടി പളനി സ്വാമിയാണ്​ ബുധനാഴ്ച തീരുമാനം പ്രഖ്യാപിച്ചത്​. എസ്​.എസ്​.എൽ.സി, പ്ലസ്​ വൺ പരീക്ഷകൾ നടത്താൻ സാഹചര്യം അനുവദിക്കുന്നില്ലെന്നതിനാൽ​ മെഡിക്കൽ വിദഗ്​ധർ നൽകിയ റിപ്പോർട്ട്​ പരിഗണിച്ചാണ്​ നടപടി. 2020-21 അക്കാദമിക വർഷത്തെ ഈ ക്ലാസുകൾക്കുള്ള വാർഷിക പരീക്ഷകൾ പൂർണമായി ഉപേക്ഷിച്ചു. രക്ഷിതാക്കൾ, അധ്യാപകർ, വിദ്യാഭ്യാസ വിദഗ്​ധർ എന്നിവരും ഇത്​ സംബന്ധിച്ച്​ ആവശ്യം ഉന്നയിച്ചതായി പളനി സ്വാമി പറഞ്ഞു.

ഇ​േന്‍റണൽ അസെസ്​മെന്‍റിൽ ലഭിക്കുന്ന മാർക്കാകും പരിഗണിക്കുക. അതായത്​, നേരത്തെ നടന്ന ആദ്യപാദ, അർധ വാർഷിക പരീക്ഷകൾക്ക്​ 80 ശതമാനവും ഹാജറിന്​ 20 ശതമാനവും മാർക്ക്​ നൽകും.

​സംസ്​ഥാനത്ത്​ േകാവിഡ്​ സാഹചര്യം ഇപ്പോഴും നിയന്ത്രണാതീതമായി തുടരുകയാണെന്നാണ്​ സർക്കാറിന്‍റെ വിലയിരുത്തൽ.

12ാം ക്ലാസ്​ പരീക്ഷ മേയ്​ മൂന്നു മുതൽ 21 വരെ നടത്തുമെന്ന്​ ​കഴിഞ്ഞ ദിവസം പ്രഖ്യാപിച്ചിരുന്നു. നീണ്ട ഇടവേളക്കു ശേഷം 10, 12 ക്ലാസുകൾ കഴിഞ്ഞ ജനുവരിയിൽ ആരംഭിക്കുകയും ചെയ്​തു. സ്​കൂളുകളിലെത്തിയ എല്ലാ വിദ്യാർഥികൾക്കും പ്രതിരോധത്തിനായി വൈറ്റമിൻ, സിങ്ക്​ ഗുളികകൾ നൽകിയതായും സർക്കാർ പറയുന്നു.

സംസ്​ഥാനത്ത്​ രോഗവ്യാപനം തടയാൻ മാർച്ച്​ 23 മുതൽ വീണ്ടും കർഫ്യൂ നിലവിൽ വരുമെന്നും മുഖ്യമന്ത്രി അറിയിച്ചു.