സമാധാന ​നൊബേലിന്​ മോദിയെ നോമിനേറ്റ്​ ചെയ്​ത്​ ബി.ജെ.പി

ചെന്നൈ: പ്രധാനമന്ത്രി നരേന്ദ്ര മോദിയെ സമാധാനത്തിനുള്ള നൊബേൽ പുരസ്​കാരത്തിന്​ നാമനിർദേശം ചെയ്​ത്​ തമിഴ്​നാട്​ ബി.ജെ.പി ഘടകം. ലോകത്തിലെ തന്നെ ഏറ്റവും വലിയ ആരോഗ്യ ഇൻഷുറൻസ് പദ്ധതിയായ ആയുഷ്മാൻ ഭാരത് അവതരിപ്പിച്ച മോദിയുടെ പേര്​ സമാധാനത്തിനുള്ള നൊബേലിന്​ നാമനിർദേശം ചെയ്​തതായി തമിഴ്​നാട്​ ബി.ജെ.പി ഘടകം പ്രസിഡൻറ്​ തമിഴിസൈ സൗന്ദർരാജൻ പറഞ്ഞു.

പ്രധാനമന്ത്രി ജൻ ആരോഗ്യ യോജന- ആയുഷ്​മാൻ ഭാരത്​ എന്ന ലോകത്തെ ഏറ്റവും വലിയ ആരോഗ്യ പദ്ധതി രാജ്യത്തിന്​ സമർപ്പിച്ച മോദിയുടെ പേര് 2019 ലെ സമാധാന നൊബേലിനായി താനും സർവകലാശാലാ വകുപ്പധ്യക്ഷനായ ഭർത്താവ്​ ഡോ. പി സൗന്ദർരാജനും നിർദ്ദേശിച്ചതായും തമിഴിസൈ അറിയിച്ചു. ഇന്ത്യയിലെ ആരോഗ്യരംഗത്ത് വഴിത്തിരിവായിത്തീരുന്ന പദ്ധതിയാണിതെന്നും അവർ പറഞ്ഞു.

2019 ജനുവരി 31ന്​ മുമ്പായാണ്​ നെ​ാബേലിനുള്ള നാമനിർദേശം സമർപ്പിക്കേണ്ടത്​. സെപ്​തംബർ മുതലാണ്​ നാമനിർദേശ പ്രക്രിയകൾ ആരംഭിക്കുക. തങ്ങളെ കൂടാതെ ബി.ജെ.പി എം.പിമാരും മോദിയെ നാമനിർദേശം ചെയ്​തിട്ടു​ണ്ടെന്നും തമിഴിസൈ അറിയിച്ചു.
ഞായറാഴ്ചയാണ് കേന്ദ്ര സർക്കാരി​​​െൻറ പുതിയ ആരോഗ്യ പദ്ധതിയായ പ്രധാനമന്ത്രി ജൻ ആരോഗ്യ യോജന ആയുഷ്മാൻ ഭാരത് നരേന്ദ്രമോദി പ്രഖ്യാപിച്ചത്.