കോവിഡ്​ പോരാട്ടത്തിനിടെ മരിക്കുന്നവർക്ക്​ 50 ലക്ഷം നഷ്​ടപരിഹാരവുമായി തമിഴ്​നാട്​​

ചെന്നെ: തമിഴ്​നാട്ടിൽ കോവിഡ് -19 നെതിരായ പോരാട്ടത്തിനിടെ ജീവൻ നഷ്​ടമാകുന്ന ഉദ്യോഗസ്​ഥരുടെ ആശ്രിതർക്ക്​ നൽകു ന്ന നഷ്​ടപരിഹാരം 10 ലക്ഷം രൂപയിൽനിന്ന് 50 ലക്ഷമായി വർധിപ്പിച്ചു. കുടുംബാംഗത്തിന് യോഗ്യതകളുടെ അടിസ്ഥാനത്തിൽ സർക ്കാർ ജോലിയും നൽകുമെന്ന് തമിഴ്‌നാട് മുഖ്യമന്ത്രി എടപ്പാടി കെ. പളനിസ്വാമി ബുധനാഴ്ച പ്രഖ്യാപിച്ചു.

കോവിഡ്​ പ്രതിരോധത്തിന്​ യുദ്ധകാലാടിസ്ഥാനത്തിൽ പ്രവർത്തിക്കുന്ന ആരോഗ്യം, പൊലീസ്, മറ്റുസർക്കാർ വകുപ്പുകൾ എന്നിവയിലെ ജീവനക്കാർക്ക്​ ഇത്​ ബാധകമാണ്​. കോവിഡ്​ ബാധിച്ച്​ മരിക്കുന്ന ആരോഗ്യ പ്രവർത്തകർക്ക് കേന്ദ്ര സർക്കാർ 50 ലക്ഷം രൂപയുടെ മെഡിക്കൽ ഇൻഷുറൻസ് പ്രഖ്യാപിച്ചിട്ടുണ്ട്​.
ശവസംസ്കാര ചടങ്ങുകൾക്ക് സംരക്ഷണം നൽകാൻ സംസ്ഥാന സർക്കാർ എല്ലാ നടപടികളും സ്വീകരിക്കുമെന്നും മുഖ്യമന്ത്രി പറഞ്ഞു. ചെന്നൈയിൽ ഡോക്​ടറുടെ ശവസംസ്​കാരം ജനക്കൂട്ടം തടയുകയും മൃതദേഹവുമായെത്തിയവരെ ആക്രമിക്കുകയും ചെയ്​ത സാഹചര്യത്തിലാണ്​ മുഖ്യമന്ത്രിയുടെ പ്രഖ്യാപനം.

ഡോക്ടർമാരും നഴ്‌സുമാരും ഉൾപ്പെടെയുള്ള ആരോഗ്യ പ്രവർത്തകർക്ക്​ സർക്കാർ, സ്വകാര്യ ആശുപത്രി എന്ന വ്യത്യാസമില്ലാതെ നഷ്​ടപരിഹാരം നൽകും. കോവിഡ്​ കേസുകൾ വേഗത്തിൽ നിർണയിക്കാൻ സ്ക്രീനിങ് ശ്രമങ്ങൾ ശക്തമാക്കണമെന്ന് ഉദ്യോഗസ്ഥരോട് നിർദ്ദേശിച്ചതായും മുഖ്യമന്ത്രി പറഞ്ഞു.