പശുക്കളെ കുറിച്ച്​ സംസാരിക്കുന്നത്​ ചിലർക്ക്​ കുറ്റം; പശു ഞങ്ങൾക്ക്​ മാതാവ്​ -മോദി

ന്യൂഡൽഹി: യു.പിയിൽ തെരഞ്ഞെടുപ്പ്​ അടുത്തിരിക്കെ പ്രതിപക്ഷത്തിനെതിരായ വിമർശനം ശക്​തമാക്കി പ്രധാനമന്ത്രി നരേന്ദ്ര മോദി. ചിലർക്ക്​ പശുക്കളെ കുറിച്ച്​ പറയുന്നത്​ കുറ്റമാണ്​. പക്ഷേ ഞങ്ങളെ സംബന്ധിച്ച്​ പശു മാതാവാണെന്ന്​ മോദി പറഞ്ഞു. വാരണാസിയിൽ 870 കോടിയുടെ വികസന പദ്ധതികൾക്ക്​ തുടക്കം കുറിച്ചതിന്​​ ശേഷം സംസാരിക്കുകയായിരുന്നു മോദി.

ഇന്ത്യയിലെ ഡയറി മേഖലയെ ശക്​തിപ്പെടുത്തുകയെന്നത്​ സർക്കാറിന്‍റെ പ്രധാനലക്ഷ്യങ്ങളിലൊന്നാണ്​. പശുവിനെ കുറിച്ചും ഗോവർധനനെ കുറിച്ചും സംസാരിക്കുന്നത്​ ചിലർ കുറ്റകൃത്യമാക്കി മാറ്റി. രാജ്യത്തെ എട്ട്​ കോടി ജനങ്ങൾ പശുക്കളെ ഉപജീവിച്ചാണ്​ കഴിയുന്നതെന്നും അദ്ദേഹം കൂട്ടിച്ചേർത്തു.

രാജ്യത്തെ പാലുൽപ്പാദനം കഴിഞ്ഞ ഏഴ്​ വർഷത്തിനിടയിൽ 45 ശതമാനം വർധിച്ചു. ലോകത്ത്​ ഉൽപാദിപ്പിക്കപ്പെടുന്ന പാലിന്‍റെ 22 ശതമാനവും ഇന്ത്യയിലാണ്​. രാജ്യത്തിന്‍റെ വികസനത്തിൽ ഡയറി, മൃഗപരിപാലന മേഖലകൾക്ക്​ വലിയ പങ്കുവഹിക്കാൻ സാധിക്കും. മൃഗപരിപാലനം കർഷകർക്ക്​ അധിക വരുമാനം ലഭിക്കുന്നതിന്​ കാരണമാകും.

ഇന്ത്യയിൽ നിന്നുള്ള പാലുൽപ്പന്നങ്ങൾക്ക്​ വിദേശത്ത്​ വലിയ വിപണിയുണ്ട്​. ഈ മേഖലയിൽ വലിയ വളർച്ച കൈവരിക്കാൻ സാധിക്കുമെന്നും മോദി കൂട്ടിച്ചേർത്തു. അടുത്ത വർഷം യു.പിയിൽ തെര​ഞ്ഞെടുപ്പ്​ നടക്കാനിരിക്കെയാണ്​ പശുവിനെ മോദി വീണ്ടും ചർച്ചയാക്കിയതെന്നതും ശ്രദ്ധേയമാണ്​.