കോവിഡ്​ വർധിക്കുന്നു, നിങ്ങൾ ജാഗ്രത പാലിക്കുക; കേന്ദ്രസർക്കാർ വിൽപനയുടെ തിരക്കിലാണ്​ -രാഹുൽ ഗാന്ധി

ന്യൂഡൽഹി: കോവിഡ്​ പ്രതിരോധത്തിലും ആസ്​തി വിൽപനയുമായി ബന്ധപ്പെട്ടും കേന്ദ്രസർക്കാറിനെതിരെ രൂക്ഷവിമർശനവുമായി കോൺഗ്രസ്​ നേതാവ്​ രാഹുൽ ഗാന്ധി. കോവിഡ്​ രോഗികളുടെ എണ്ണം വർധിക്കുന്നത്​ ആശങ്കയുണ്ടാക്കുന്നു. മൂന്നാം തരംഗം നേരിടാൻ വാക്​സിനേഷൻ വർധിപ്പിക്കേണ്ട സമയമാണിത്​. എന്നാൽ, നിങ്ങൾ തന്നെ ജാഗ്രത പാലിക്കു. കേന്ദ്രസർക്കാർ ഇപ്പോൾ വിൽപനയുടെ തിരക്കിലാണെന്ന്​ രാഹുൽ ഗാന്ധി ട്വിറ്ററിൽ കുറിച്ചു.

കോവിഡ്​ പ്രതിരോധത്തിലെ കേന്ദ്രസർക്കാറിന്‍റെ പാളിച്ചകൾ രാഹുൽ ഗാന്ധി ചൂണ്ടിക്കാട്ടിയിരുന്നു. വാക്​സിൻ ക്ഷാമം ഉൾപ്പടെ ചൂണ്ടിക്കാട്ടിയായിരുന്നു രാഹുൽ ഗാന്ധിയുടെ വിമർശനം. കോവിഡ്​ ബാധിച്ച്​ മരിച്ചവരുടെ കുടുംബാംഗങ്ങൾക്ക്​ നഷ്​ടപരിഹാരം നൽകാത്തതിലും രാഹുൽ ഗാന്ധിയുടെ വിമർശനമുണ്ടായിരുന്നു.

അടുത്ത അഞ്ച്​ വർഷം കൊണ്ട്​ സർക്കാറിന്‍റെ കീഴിലുള്ള ആറ്​ ലക്ഷം കോടിയുടെ ആസ്​തികൾ വിൽക്കാനുള്ള തീരുമാനത്തിനെതിരേയും രാഹുൽ വലിയ വിമർശനം ഉന്നയിച്ചിരുന്നു. കേന്ദ്രസർക്കാറിന്​ താൽപര്യമുള്ള വ്യവസായികൾക്കായി സർക്കാറിന്‍റെ സ്വത്തുക്കൾ വീതിച്ചു നൽകുകയാണെന്നായിരുന്നു രാഹുലിന്‍റെ വിമർശനം.