സൊമാറ്റോക്ക്​ പിറകെ കൂട്ടപിരിച്ചുവിടലിന് ഒരുങ്ങി സ്വിഗ്ഗി; 1100 പേർക്ക്​ ജോലി നഷ്​ടമാകും

ന്യൂഡൽഹി: കോവിഡ്​ മഹാമാരി പ്രഹരമേൽപ്പിച്ച ഓൺലൈൻ ഭക്ഷ്യവിതരണ കമ്പനികൾ ജീവനക്കാരെ കൂട്ടത്തോടെ പിരിച്ചുവിടുന്നു. അടുത്ത ഏതാനും ദിവസങ്ങൾക്കുള്ളിൽ 1,100 ഓളം ജീവനക്കാരെ പിരിച്ചുവിടുമെന്ന്​ ഭക്ഷ്യ വിതരണ കമ്പനിയായ സ്വിഗ്ഗി അറിച്ചു. 13 ശതമാനം തൊഴിലാളികളെ പിരിച്ചുവിടാനും 50 ശതമാനം വരെ ശമ്പളം വെട്ടിക്കുറക്കാനും മറ്റൊരു കമ്പനിയായ സൊമാറ്റോ തീരുമാനിച്ചിരുന്നു.

നിർഭാഗ്യകരമായ ഒരു ഘട്ടത്തിലൂടെ കടന്നുപോകേണ്ടി വരുന്നതിനാൽ  ഏറ്റവും സങ്കടകരമായ  കാര്യമാണിതെന്ന്​ സ്വിഗ്ഗി സഹസ്ഥാപകനും സി.ഇ.ഒയുമായ ശ്രീഹർഷ മ​ജേറ്റി തിങ്കളാഴ്​ച കമ്പനി ജീവനക്കാർക്ക് അയച്ച ഇമെയിലിൽ പറയുന്നു. വിവിധ നഗരങ്ങളിലും ഓഫീസുകളിലുമായി ജോലി ചെയ്യുന്ന  1,100 ജീവനക്കാരെ പിരിച്ചുവിടുമെന്നും സി.ഇ.ഒ വ്യക്തമാക്കി. 

ബിസിനസ്​ അടുത്ത 18 മാസത്തോളം അസ്ഥിരമായി തന്നെ മുന്നോട്ടുപോവുകയാണെങ്കിൽ സ്വിഗ്ഗി അടച്ചുപൂട്ടുകയോ കൈമാറുകയോ ചെയ്യേണ്ടിവരും. കോവിഡ്​ പ്രതിസന്ധി തങ്ങളുടെ ഭക്ഷ്യ വിതരണ ശ്യംഖലയെ സാരമായി ബാധിച്ചെന്നും ഹ്രസ്വകാലത്തേക്ക് ഇത് തുടരുമെന്നാണ് കരുതുന്നതെന്നും  അദ്ദേഹം പറഞ്ഞു.

കോവിഡ്​ വൈറസ് വ്യാപനം തടയുന്നതിനായി രാജ്യം നാലാംഘട്ട ലോക്​ഡൗണിലേക്ക്​  കടന്ന ഉടനെയാണ്  പിരിച്ചുവിടൽ നടപടിയുമായി കമ്പനികൾ രംഗത്തെത്തിയിരിക്കുന്നത്​.