ആമസോണിന് മുന്നറിയിപ്പുമായി സുഷമ: മാപ്പ് പറഞ്ഞില്ലെങ്കിൽ വിസ റദ്ദാക്കും

ന്യൂഡൽഹി: പ്രമുഖ ഒാൺലൈൻ ഷോപ്പിങ് കമ്പനിയായ ആമസോണിന് മുന്നറിയിപ്പുമായി വിദേശകാര്യ മന്ത്രി സുഷമാ സ്വരാജ്. കാനഡയിൽ ആമസോൺ കമ്പനി ഇന്ത്യൻ ദേശീയപതാകയുടെ രൂപത്തിലുള്ള ചവിട്ടി വിൽക്കുന്നതിനെതിരെയാണ് മന്ത്രി രംഗത്തെത്തിയത്. വിൽപന തുടർന്നാൽ ആമസോൺ ഉദ്യോഗസ്ഥരുടെ ഇന്ത്യയിലേക്കുള്ള വിസകൾ സർക്കാർ റദ്ദുചെയ്യുമെന്ന് മന്ത്രി ട്വീറ്റ് ചെയ്തു. 

ആമസോൺ ഉടനെ മാപ്പുപറയണം. രാജ്യത്തിൻറെ ദേശീയപതാകയെ അധിക്ഷേപിക്കുന്ന തരത്തിലുള്ള എല്ലാ ഉൽപ്പന്നങ്ങളും ഉടനെ പിൻവലിക്കണം, ഇത് അനുസരിക്കാതിരുന്നാൽ ആമസോൺ ഉദ്യോഗസ്ഥർക്ക് ഇന്ത്യൻ വിസ അനുവദിക്കാൻ സർക്കാർ തയ്യാറാവില്ലെന്ന് അറിയിക്കുന്നു. നേരത്തേ ഇഷ്യു ചെയ്ത വിസയും റദ്ദാക്കുമെന്നും സുഷമ കൂട്ടിച്ചേർത്തു. കാനഡയിലെ ഇന്ത്യൻ ഹൈകമ്മീഷനോട് ആമസോണിൽ നിന്നും വിശദീകരണം തേടാനും വിദേശകാര്യ മന്ത്രി നിർദേശിച്ചു.

കാനഡയിൽ ആമസോൺ ഇന്ത്യൻ പതാകയുടെ രൂപത്തിലുള്ള ചവിട്ടികൾ വിൽക്കുന്നത് ഒരു ട്വിറ്റർ ഉപഭോക്താവ് സുഷമയുടെ ശ്രദ്ധയിൽ കൊണ്ടുവന്നതിനെ തുടർന്നാണ് നടപടി.