കർണാടകയിലെ ക്രിസ്​ത്യൻ മിഷനറികളുടെ കണക്കെടുപ്പ്​ സമുദായത്തെ ലക്ഷ്യ​ംവെച്ചെന്ന്​; സഭ ആശങ്ക പ്രകടിപ്പിച്ചു

ബംഗളൂരു: ക്രിസ്​ത്യൻ മിഷനറിമാരുടെയും ആരാധനാലയങ്ങളുടെയും കണക്കെടുക്കാനൊരുങ്ങി കർണാടക ബി.ജെ.പി സർക്കാർ. കണക്കെടുക്കാൻ സംസ്​ഥാന പിന്നാക്ക -ന്യൂനപക്ഷ ക്ഷേമ വകുപ്പിന്​ നിർദേശം നൽകിയതായാണ്​ വിവരം. അതേസമയം, ഈ തീരുമാനത്തിനെതിരെ സഭ ആശങ്ക പ്രകടിപ്പിച്ചു.

വടക്കൻ കർണാടകയിലെ ആക്രമണങ്ങളുടെ പശ്ചാത്തലത്തിൽ സംസ്​ഥാനത്തെ ആരാധനാലയങ്ങളെയും പുരോഹിതരെയും ലക്ഷ്യംവെച്ചാണിതെന്നും സഭ ആശങ്ക ഉയർത്തി.

'വിശാല ചിന്താഗതിക്കാരനും പ്രബുദ്ധ വ്യക്തിയുമായ ബഹുമാനപ്പെട്ട മുഖ്യമന്ത്രി ബസവരാജ്​ ബൊമ്മൈയെ ബഹുമാനിക്കുന്നു. സമൂഹത്തിലെ സമാധാനത്തിനും ഐക്യത്തിനും സഹവർത്തിത്വത്തിനും ഭംഗം വരുത്താൻ ആഗ്രഹിക്കുന്ന മൗലികവാദ ഗ്രൂപ്പുകളുടെ സമ്മർദ്ദങ്ങൾക്ക്​ വഴങ്ങില്ലെന്ന്​ പ്രതീക്ഷിക്കുന്നു' -ബംഗളൂരു ആർച്ച്​ഡയസ്​ ആർച്ച്​ ബിഷപ്പ്​ പീറ്റർ മച്ചാഡോ പറഞ്ഞു.

സംസ്​ഥാനത്ത്​ ശക്തമായ നിയമസംവിധാനം ഉറപ്പുവരുത്തുന്നതിനായി മറ്റു സംസ്​ഥാനങ്ങളിലെ മത പരിവർത്തന നിയമങ്ങൾ വിശദമായി പഠിക്കുമെന്ന്​ ഉഡുപ്പിയിൽ നടന്ന ചടങ്ങിനിടെ ബൊമ്മൈ പറഞ്ഞിരുന്നു. ഇതിനുപിന്നാലെയാണ്​ സഭയുടെ പ്രതികരണം.

ക്രിസ്​ത്യൻ മിഷനറിമാർ നടത്തുന്ന ആരോഗ്യ സ്​ഥാപനങ്ങളുടെയും വിദ്യാഭ്യാസ സ്​ഥാപനങ്ങളുടെയും കണക്കുകൾ സർക്കാർ എടുക്ക​േട്ട. രാജ്യത്തെ നിർമിക്കാനായി ക്രിസ്​ത്യൻ മിഷനറിമാർ നൽകിയ സംഭാവനകൾ അതിൽനിന്ന്​ വ്യക്തമാകും. ഇത്തരം സ്​ഥാപനങ്ങളിലും സ്​ഥലങ്ങളിലും എത്രപേർ മതപരിവർത്തനത്തിന്​ വിധേയരായി? ചിലർ ആരോപിക്കുന്നതുപോ​ലെ, ക്രിസ്​ത്യാനികൾ മതപരിവർത്തനം നടത്തുകയാണെങ്കിൽ, ക്രിസ്​ത്യൻ ജനസംഖ്യ മറ്റുള്ളവരുമായി താരതമ്യം ചെയ്യു​േമ്പാൾ കുറഞ്ഞിരിക്കുന്നതെങ്ങനെ?' -ആർച്ച്​ബിഷപ്പ്​ ചോദിച്ചു. സഭ നിർബന്ധിത മതപരിവർത്തനത്തിന്​ എതിരാണെന്നും ബിഷപ്പ്​ പറഞ്ഞു.