തദ്ദേശീയ മുസ്​ലിംകളെ വേർതിരിച്ചറിയാൻ സർവേക്കൊരുങ്ങി അസമിലെ ബി.ജെ.പി സർക്കാർ

ഗുവാഹത്തി: സംസ്ഥാന​ത്തെ തദ്ദേശീയരായ മുസ്​ലിംകളെ കണ്ടെത്താൻ സർവേ നടത്താനൊരുങ്ങുകയാണ്​ അസമിലെ ബി.ജെ.പി സർക്ക ാർ. മാർച്ച്​ മാസത്തോടെയാണ്​ സാമൂഹ്യ-സാമ്പത്തിക സർവെ​ സംഘടിപ്പിക്കുന്നത്​.

പഴയ കിഴക്കൻ ബംഗാളിൽ നിന്നും കിഴക്കൻ പാകിസ്​താനിൽ നിന്നും ബംഗ്ലാദേശിൽ നിന്നും കുടിയേറിയവരിൽ നിന്ന്​ തദ്ദേശീയ മുസ്​ലിംകളെ വേർതിരിക്കുകയാണ്​ സർവേയുടെ ലക്ഷ്യമെന്ന്​ ന്യൂനപക്ഷ വികസന ബോർഡ്​ ചെയർമാൻ മുമിനുൽ അവ്വൽ പറഞ്ഞു.

‘‘തദ്ദേശീയ മുസ്​ലിംകളുടേയും ബംഗ്ലാദേശി മുസ്​ലിംകളുടേയും പേര്​ സമാനമാണ്​. ഇതിൻെറ ഫലമായി വിവിധ ക്ഷേമ പദ്ധതികൾ നടപ്പാക്കുമ്പോൾ അവരെ തിരിച്ചറിയാൻ സർക്കാർ ബുദ്ധിമുട്ടുകയാണ്​. തദ്ദേശീയ മുസ്​ലിംകളുടെ ക്ഷേമം ഉറപ്പാക്കാൻ സർക്കാർ ബാധ്യതപ്പെട്ടിടത്തോളം കാലം അവർക്ക്​ വേറിട്ട വ്യക്തിത്വം ഉണ്ടായിരിക്കണം’’ -അദ്ദേഹം പറഞ്ഞു.

സർക്കാർ തദ്ദേശീയരായി കണക്കാക്കുന്ന ഗോറിയ, മോറിയ, ദേശി, ജോൽഹ ഗോത്ര സമൂഹങ്ങൾ എന്നിവർക്കിടയിലാണ്​ പ്രധാനമായും സർവേ നടക്കുക. സെൻസസുമായി ബന്ധപ്പെട്ട തയാറെടുപ്പുകൾ അന്തിമ ഘട്ടത്തിലാണെന്നും ഈ സാമ്പത്തിക വർഷത്തിൽ തന്നെ അത്​ നടപ്പാക്കാൻ സാധിക്കുമെന്നാണ്​ പ്രതീക്ഷയെന്നും അവ്വൽ പറഞ്ഞു.