കടൽക്കൊല കേസിൽ ബോട്ടുടമക്ക് രണ്ടുകോടി നൽകുന്നത് തടഞ്ഞ് സുപ്രീംകോടതി

ന്യൂഡൽഹി: കടൽക്കൊല കേസിൽ സെന്‍റ് ആന്‍റണീസ് ബോട്ടുടമക്കുള്ള നഷ്ടപരിഹാരത്തുക വിതരണം ചെയ്യുന്നത് സുപ്രീംകോടതി തടഞ്ഞു. അപകടത്തിൽ പരുക്കേറ്റ ഏഴ് മൽസ്യത്തൊഴിലാളികൾ സമർപ്പിച്ച ഹർജികളിലാണ് നടപടി. തങ്ങൾക്കും നഷ്ടപരിഹാരം അനുവദിക്കണമെന്നാണ് ഇവരുടെ ആവശ്യം.

സെന്റ് ആന്റണീസ് ബോട്ടുടമക്ക് നോട്ടിസ് അയക്കാൻ ജസ്റ്റിസ് ഇന്ദിര ബാനർജി അധ്യക്ഷയായ ബെഞ്ച് ഉത്തരവിട്ടു. രണ്ടാഴ്ചക്ക് ശേഷം ഹർജികൾ വീണ്ടും പരിഗണിക്കും. അതുവരെ ബോട്ടുടമക്കുള്ള രണ്ട് കോടി രൂപ വിതരണം ചെയ്യരുതെന്ന് ഹൈകോടതിക്ക് നിർദേശം നൽകിയിട്ടുണ്ട്.