നീറ്റ്​ പരീക്ഷ വീണ്ടും നടത്തണമെന്ന ഹൈകോടതി വിധി​ സുപ്രീംകോടതി തള്ളി

ന്യൂഡല്‍ഹി: ഉദ്യോഗസ്ഥ വീഴ്ചമൂലം സെ്​പറ്റംബർ 12ന്​ നടന്ന നീറ്റ് പരീക്ഷയിൽ അവസരം നഷ്​ടപ്പെട്ട​ രണ്ട് വിദ്യാർഥികള്‍ക്കായി വീണ്ടും പരീക്ഷ നടത്തണമെന്ന്​ ബോംബെ ഹൈകോടതി വിധി സുപ്രീംകോടതി തള്ളി.

വിദ്യാര്‍ഥികള്‍ക്കുണ്ടായ അവസ്ഥയില്‍ സഹതാപമുണ്ട്. എന്നാല്‍ ഇവര്‍ക്കായി മാത്രം ദേശീയ പരീക്ഷ വീണ്ടും നടത്താനാകില്ലെന്ന്​ ​ബോ​ംബെ ഹൈകോടതി വിധി തള്ളികൊണ്ട്​ ജസ്​റ്റിസുമാരായ എല്‍.നാഗേശ്വര റാവു, ബി.ആര്‍.ഗവായി എന്നിവരുള്‍പ്പെട്ട ബെഞ്ച്​ വ്യക്​തമാക്കി.

രണ്ട്​ വിദ്യാര്‍ഥികൾക്കുണ്ടായ പ്രശ്​നം തീര്‍ക്കാമെന്നും ഫലം പ്രഖ്യാപിക്കുന്നത് തടയരുതെന്നും പരീക്ഷ നടത്തിപ്പ്​ ചുമതലയുള്ള എൻ.ടി.എ വ്യക്​തമാക്കിയതിനെ തുടർന്ന്​ നീറ്റ്​ ഫല പ്രഖ്യാപനത്തിന്​ നേരത്തെ സുപ്രീംകോടതി അനുമതി നൽകിയിരുന്നു.

മഹാരാഷ്​ട്ര സീലംപൂർ ശ്രീ നാരായണ ഗുരുകുലം സ്‌കൂളില്‍ നീറ്റ്​ എഴുതിയ വൈഷ്ണ വിഭോപലെ, അഭിഷേക് കപ്സെ എന്നിവര്‍ക്കാണ് പരീക്ഷയുടെ മേല്‍നോട്ടം നടത്തിയ ഉദ്യോഗസ്ഥരുടെ വീഴ്ച കാരണം അവസരം നഷ്​ടമായത്​.

പരീക്ഷ സമയത്ത്​ ​ വിദ്യാര്‍ത്ഥികള്‍ക്ക് നല്‍കുന്ന ഉത്തരക്കടലാസിനും ചോദ്യ പേപ്പറിനും വ്യത്യസ്​ഥ കോഡുകളുണ്ട്​. ഉദ്യോഗസ്​ഥർ ഇവ പരസ്​പരം മാറി നൽകിയതാണ്​ വിദ്യാർഥികൾക്ക്​ വിനയായത്​. പിഴവ്​ വിദ്യാർഥകൾ ഉദ്യോഗസ്​ഥരുടെ ശ്രദ്ധയിൽപ്പെടുത്തിയെങ്കിലും ഭീഷണിപ്പെടുത്തുകയാണ്​ ഉണ്ടായത്​.