ഇ​ൻ​റ​ർ​നെ​റ്റി​ൽ വി​വ​രം തേ​ടു​ന്ന​ത്​ നി​യ​ന്ത്രി​ക്കാ​നാ​വി​ല്ല -സു​പ്രീം​കോ​ട​തി

ന്യൂഡൽഹി: ഇൻറർനെറ്റിൽനിന്ന് വിവരങ്ങൾ തേടാൻ എല്ലാ പൗരന്മാർക്കും അവകാശമുണ്ടെന്നും അത് നിയന്ത്രിക്കാനാകില്ലെന്നും സുപ്രീംകോടതി. ഗർഭസ്ഥ ശിശുവി​െൻറ ലിംഗ നിർണയവുമായി ബന്ധപ്പെട്ട പരിശോധനകളുടെയും മറ്റും വിശദവിവരങ്ങൾ നൽകുന്നതിൽ ഇൻറർനെറ്റ് കമ്പനികൾക്ക് നിയന്ത്രണം വേണമെന്ന് ആവശ്യപ്പെട്ട് സാബു മാത്യു േജാർജ് എന്നയാൾ നൽകിയ ഹരജിയിലാണ് ജസ്റ്റിസ് ദീപക് മിശ്രയുടെ നേതൃത്വത്തിലെ ബെഞ്ച് ഇക്കാര്യം വ്യക്തമാക്കിയത്.  
 ഗർഭസ്ഥശിശുവി​െൻറ ലിംഗ നിർണയവുമായി ബന്ധപ്പെട്ട വിഷയത്തിൽ വിവരം ഇൻറർനെറ്റിൽ വിലക്കുന്നത് പൗരന്മാരുടെ മൗലികാവകാശ ലംഘനമായി മാറും. എന്നാൽ, ഇത്തരം പരിശോധനകളുടെ പരസ്യമെന്നനിലക്കുള്ള വിവരങ്ങൾ ഇൻറർനെറ്റിൽ വരികയാണെങ്കിൽ അത് ഗർഭസ്ഥ ശിശുവി​െൻറ ലിംഗ നിർണയം നിരോധിക്കുന്ന വകുപ്പനുസരിച്ച്  കുറ്റകരമാണെന്നും കോടതി വ്യക്തമാക്കി.  

 കേന്ദ്ര സർക്കാറിനുവേണ്ടി ഹാജരായ സോളിസിറ്റർ ജനറൽ രഞ്ജിത് കുമാറും കോടതിയിൽ അറിയിച്ചതും ഇതേ നിലപാടാണ്. ഗർഭസ്ഥ ശിശുവി​െൻറ ലിംഗനിർണയ പരിശോധനകളുടെ പരസ്യം തങ്ങൾ നൽകാറില്ലെന്നും പ്രസ്തുതനയത്തിൽ മാറ്റം വരുത്തില്ലെന്നും ഇൻറർനെറ്റ് സേവനദാതാക്കളായ ഗൂഗ്ൾ, മൈക്രോസോഫ്റ്റ്, യാഹു തുടങ്ങിയ കമ്പനികൾ കോടതിയിൽ ഉറപ്പുനൽകി.