സമൂഹ അടുക്കളകൾക്ക്​ മാതൃക പദ്ധതി തയാറാക്കാൻ കേന്ദ്രത്തോട്​ സുപ്രീംകോടതി

ന്യൂഡൽഹി: രാജ്യത്തെ സമൂഹ അടുക്കളകൾക്കായി (കമ്യൂണിറ്റി കിച്ചൻ) മാതൃക പദ്ധതി തയാറാക്കുന്നതും സംസ്ഥാനങ്ങൾക്ക്​ ഇക്കാര്യത്തിന്​ കൂടുതൽ ഭക്ഷ്യധാന്യം നൽകുന്നതും​ പരിഗണിക്കണമെന്ന്​ കേന്ദ്രത്തോട്​ സുപ്രീംകോടതി. അതേസമയം, ഇതുസംബന്ധിച്ച ശേഖരണ, ഗതാഗത പ്രശ്‌നങ്ങൾ സംസ്ഥാനങ്ങൾ നോക്കണമെന്നും ചീഫ് ജസ്റ്റിസ് എൻ.വി. രമണ, ജസ്റ്റിസ് എ.എസ്. ബൊപ്പണ്ണ, ജസ്റ്റിസ് ഹിമ കോഹ്​ലി എന്നിവരടങ്ങിയ ബെഞ്ച് വ്യക്തമാക്കി. പട്ടിണിമരണങ്ങൾ ഒഴിവാക്കാൻ സമൂഹ അടുക്കള നയം രൂപവത്​കരിക്കണമെന്ന് ആവശ്യപ്പെടുന്ന റിട്ട് ഹരജിയിലാണ്​ നിർദേശം​. പോഷകാഹാരക്കുറവ്, പട്ടിണി മരണങ്ങൾ തുടങ്ങിയ വിഷയങ്ങളിൽ സത്യവാങ്മൂലം സമർപ്പിക്കാനും പദ്ധതിയുമായി ബന്ധപ്പെട്ട് കേന്ദ്രത്തിന് നിർദേശങ്ങൾ നൽകാനും സംസ്ഥാന സർക്കാറുകൾക്ക്​ സമയം നൽകിയ ബെഞ്ച്​ കേസ് പരിഗണിക്കുന്നത്​ രണ്ടാഴ്ചത്തേക്ക്​ നീട്ടിവെച്ചു.

'പട്ടിണി, പോഷകാഹാരക്കുറവുമൂലം മരണം തുടങ്ങിയ വലിയ വിഷയങ്ങളല്ല കോടതിയുടെ പരിഗണനയിലുള്ളത്​. വിശപ്പകറ്റണം. പാവപ്പെട്ട ആളുകൾ തെരുവിൽ വിശക്കുകയാണ്​. ഈ പ്രശ്‌നമുണ്ടെന്ന് എല്ലാവരും സമ്മതിക്കുന്നു. വിഷയം മനുഷ്യത്വപരമായി എടുത്ത് പരിഹാരത്തിന്​ ശ്രമിക്കുക. ബുദ്ധി പ്രയോഗിക്കാൻ ഉദ്യോഗസ്ഥരോട് ആവശ്യപ്പെടാനും ചീഫ്​ ജസ്റ്റിസ്​ നിർദേശിച്ചു.

സംസ്ഥാനങ്ങൾ സത്യവാങ്മൂലങ്ങൾ ഹരജിക്കാരനും അറ്റോണി ജനറലിനും (എ.ജി) ഉടൻ അയച്ചാൽ അടുത്ത വാദംകേൾക്കലിന്​ എ.ജിക്ക് സമർപ്പിക്കാൻ കഴിയും. കൃത്യസമയത്ത് സത്യവാങ്മൂലം സമർപ്പിക്കാത്ത സംസ്ഥാനങ്ങൾക്ക് നേരത്തേ ചുമത്തിയിരുന്ന ചെലവുകളും കോടതി ഒഴിവാക്കി. 2019-2021ലെ കുടുംബാരോഗ്യ സർവേ റിപ്പോർട്ട്​ പ്രകാരമുള്ള കണക്കുകൾ പഴയതായതിനാൽ പട്ടിണിമരണങ്ങളുടെ പുതിയ വിവരങ്ങൾ നൽകാൻ കേന്ദ്ര സർക്കാറിന്​ കഴിയും. കേന്ദ്രം ഫണ്ട്​ നൽകിയാൽ ഭക്ഷണം നൽകാമെന്ന നിലപാടിലാണ്​ കൂടുതൽ സംസ്ഥാനങ്ങളും. ചില സംസ്ഥാനങ്ങൾ സ്വന്തം നിലക്കുതന്നെ സമൂഹ അടുക്കള നടത്തുന്നുണ്ട്​. ആവശ്യമുള്ളവർക്ക്​ ഭക്ഷണമോ സഹായമോ സർക്കാർ നൽകുന്നില്ലെന്നല്ല​ പറയുന്നതെന്നും മാതൃക പദ്ധതി രൂപവത്​കരിക്കാനാണ്​ നിർബന്ധിക്കുന്നതെന്നും ബെഞ്ച്​ പറഞ്ഞു. വിവിധ ഘടകങ്ങൾ പരിഗണിക്കേണ്ടതിനാൽ കേന്ദ്രത്തിന് പദ്ധതി രൂപവത്​കരിച്ച് നടപ്പാക്കൽ സംസ്ഥാനങ്ങൾക്ക് വിടാമെന്നും ചീഫ് ജസ്റ്റിസ് വ്യക്തമാക്കി.