റോഹിങ്ക്യൻ വിഷയം: ഹരജി ഡിസംബർ അഞ്ചിന്​ പരിഗണിക്കും

ഡൽഹി: റോഹിങ്ക്യൻ അഭയാർത്ഥികളെ തിരിച്ചയക്കുന്നത്​ സംബന്ധിച്ച കേസിൽ ഹരജി പരിഗണിക്കുന്നത്​ സുപ്രീംകോടതി ഡിസംബർ അഞ്ചിലേക്ക്​ മാറ്റി. 
അഭയാർത്ഥികളെ മ്യാൻമറിലേക്ക്​ തിരിച്ചയക്കുന്നത് അന്താരാഷ്ട്ര മനുഷ്യാവകാശ ഉടമ്പടികളുടെ ലംഘനമാണെന്ന് ആരോപിച്ച് രണ്ട് റോഹിങ്ക്യകള്‍ നല്‍കിയ ഹരജി പരിഗണിക്കുന്നതാണ്​ നീട്ടിയത്​. റോഹിങ്ക്യൻ അഭയാർത്ഥിക​ളുടെ കേസിൽ ചീഫ്​ ജസ്​റ്റിസ്​ ദീപക്​ മിശ്ര, ജസ്​റ്റിസ് എ.എം ഖാൻവിൽക്കർ, ഡി.വൈ ചന്ദ്രചൂഡ്​ എന്നിവരടങ്ങിയ ബെഞ്ചാണ്​ കേസ്​  പരിഗണിച്ചിരുന്നത്​. 

അനധികൃതമായി രാജ്യത്ത് താമസിക്കുന്ന റോഹിങ്ക്യന്‍ മുസ്ലിങ്ങളെ തിരിച്ചയക്കുന്നതുമായി ബന്ധപ്പെട്ട വിഷയത്തില്‍ സുപ്രീം കോടതി കേന്ദ്ര സര്‍ക്കാരിനോട് നേരത്തെ വിശദീകരണം തേടിയിരുന്നു.